தற்போதைய செய்திகள்

2021லும் கழகமே ஆட்சி பீடத்தில் இருக்கும் – ஆர்.கே.நகர் பொதுக்கூட்டத்தில் கழக அவைத்தலைவர் இ.மதுசூதனன் உறுதி

சென்னை

ஓ.பி.எஸ். இ.பி.எஸ் தலைமையில் 2021-லும் கழகம் மகத்தான வெற்றிபெற்று ஆட்சி பீடத்தில் இருக்கும் என்று கழக அவைத்தலைவர் இ.மதுசூதனன் கூறியுள்ளார்.

புரட்சித்தலைவி அம்மா அவர்களின் 72-வது பிறந்தநாளையொட்டி ஆர்.கே.நகர் பகுதி இளைய முதலி தெருவில் வடசென்னை வடக்கு (கிழக்கு) மாவட்ட கழக செயலாளரும், தமிழ்நாடு நுகர்வோர் கூட்டுறவு இணையத்தின் தலைவருமான ஆர்.எஸ்.ராஜேஷ், தலைமையில் கழக அவைத்தலைவர் இ.மதுசூதனன் முன்னிலையில் மாபெரும் பொதுக்கூட்டம், மற்றும் 18000 பேருக்கு நலத்திட்ட உதவிகள் வழங்கும் விழா நடைபெற்றது.

இதில் கழக ஒருங்கிணைப்பாளரும், துணை முதலமைச்சருமான ஓ.பன்னீர்செல்வம், கழக அவைத்தலைவர் இ.மதுசூதனன், வடசென்னை வடக்கு (கிழக்கு) மாவட்ட கழக செயலாளர் ஆர்.எஸ்.ராஜேஷ் ஆகியோர் அம்மா அவர்களின் திருஉருவ படத்திற்கு மலர்தூவி மரியாதை செலுத்தினர் இதனைத்தொடர்ந்து துணை முதலமைச்சர் ஓ.பன்னீர்செல்வம் சிறப்புரையாற்றி நலத்திட்ட உதவிகளை வழங்கினார். முன்னதாக துணைமுதல்வர் ஓ.பன்னீர்செல்வத்துக்கு மாவட்ட கழகத்தின் சார்பில் கேரள செண்டை மேளம், பேண்டு வாத்தியங்கள் முழங்க வழி நெடுகிலும் மலர்தூவி உற்சாகமான வரவேற்பு அளிக்கப்பட்டது.

இந்த பொதுக்கூட்டத்தில் கழக அவைத்தலைவர் இ.மதுசூதனன் பேசியதாவது:-

மனிதநேயமிக்க தலைவர்களில் இன்றளவும் போற்றக் கூடியவர்களில் அம்மாவும் ஒருவர். அவர் உருவாக்கிய திட்டங்களால் இந்திய தலைவர்கள் மட்டும் அல்ல, அயல்நாட்டு தலைவர்களும் அம்மாவை போற்றினர். அம்மா அவர்கள் நம்மை விட்டு சென்றாலும், அவர்கள் என்றும் நம்முடன் தான். தமது சொத்துக்கள் அனைத்தும் தமிழக மக்களுக்கு தான் எனவும் தமிழக மக்கள் தான் எனது சொந்தங்கள் என கூறியவர் அம்மா அவர்கள்.

ஓ.பி.எஸ், இ.பி.எஸ் தலைமையிலான கழகத்தின் நல்லாட்சி தொடரவும், வரும் 2021-ல் நடைபெறும் பொதுத்தேர்தலிலும் கழகம் மகத்தான வெற்றிபெற்று அம்மா அவர்களின் பாதங்களில் சமர்ப்பித்து நாம் ஆட்சி பீடத்தில் இருப்போம் என இன்றைய 72-வது பிறந்தநாள் விழாவில் நாம் சபதமேற்போம்.

இவ்வாறு கழக அவைத்தலைவர் இ.மதுசூதனன் பேசினார்.

பின்னர் பேசிய மாவட்ட செயலாளர் ஆர்.எஸ்.ராஜேஷ், அம்மாவின் ஆத்மா வாழும் இந்த ஆர்.கே.நகர் பகுதியில் வாழும் மக்கள் இதயங்களிலும் இல்லங்களிலும் அம்மா திட்டங்கள் இல்லாமல் இல்லை. அவர் வாழும் தெய்வமாக புகழ் பெற்றுள்ளார். துணை முதல்வர் ஓ.பன்னீர்செல்வம் ஒற்றுமையின் புரட்சி சாதனையாளர் என்றே கூறலாம். ஒரு தலைவன் உருவாக வேண்டுமானால் அவரின் அறிவுரைகளை ஏற்க வேண்டும். கழகத்தினர் அனைவரும் ஒன்றிணைந்து செயல்பட்டால் எதனையும் சாதிக்க முடியும். தமிழக மக்களுக்கான அனைத்து திட்டங்களையும் அண்ணா தி.மு.க. ஆட்சியில் மட்டுமே செயல்படுத்த முடியும். நூறாண்டுகள் ஆனாலும் அ.தி.மு.க. என்ற பேரியக்கத்தையும், ஆட்சியையும் தொட்டு பார்க்கவோ, அசைக்கவோ எந்த கொம்பனாலும் முடியாது என்றார்.