சிறப்பு செய்திகள்

எதிர்க்கட்சிகளின் சதித் திட்டங்களை மக்கள் துணையோடு முறியடிப்போம் – முதலமைச்சர் திட்டவட்டம்

சேலம்

எதிர்க்கட்சிகளின் சதித் திட்டங்களை மக்கள் துணையோடு முறியடிப்போம் என்று முதலமைச்சர் எடப்பாடி கே.பழனிசாமி திட்டவட்டமாக தெரிவித்தார்.

புரட்சித்தலைவி அம்மா அவர்களின் 72-வது பிறந்தநாளை முன்னிட்டு சேலத்தில் நேற்று  மாலை நடைபெற்ற பிரம்மாண்ட பொதுக்கூட்டத்தில் கழக இணை ஒருங்கிணைப்பாளரும், முதலமைச்சருமான எடப்பாடி கே.பழனிசாமி ஆற்றிய உரை வருமாறு:-

சேலம் தலைவாசலில், ஆசியாவிலேயே மிகப் பெரிய கால்நடைப் பூங்காவை துவக்கி வைத்தேன். விவசாயிகளுடைய வாழ்வாதாரம் பெருக வேண்டும், அவர்களது பொருளாதாரம் இரட்டிப்பாக வேண்டும் என்று அம்மாவின் அரசு அற்புதமான திட்டத்தைத் தீட்டி, 9.2.2020 அன்று சேலம் கூட்டு ரோட்டில் இதயதெய்வம் புரட்சித்தலைவி அம்மா அவர்களின் ஆசியோடு, அந்த கால்நடைப் பூங்காவை துவக்கி வைத்திருக்கிறோம்.

முதலமைச்சர் சிறப்புக் குறை தீர்க்கும் முகாம் என்ற திட்டத்தை நான் அறிவித்தவுடன் தமிழ்நாடு முழுவதும் இருக்கின்ற மக்களிடத்தில் மனுக்களை வாங்கி, அதற்கு உரிய தீர்வு காண்பதற்காக இந்த திட்டத்தை நான் அறிவித்தேன். இதன் மூலமாக, 5,23,000 மனுக்களுக்கு தீர்வு காணப்பட்டிருக்கிறது. 58,210 மனுக்கள் சேலம் மாவட்டத்தில் மட்டும் தீர்வு காணப்பட்டிருக்கிறது. இதெல்லாம் சாதாரண விஷயமா? அந்தத் திட்டத்தின் வாயிலாக முதியோர் உதவித் தொகை, பட்டா மாறுதல் போன்ற நன்மைகள் கிடைக்கின்றன.

பொதுமக்கள் அரசு அலுவலத்திற்கு நாடி செல்வதற்குப் பதிலாக, இந்த மனு மூலமாகக் கொடுத்தால், அரசு அலுவலர்கள் உங்களை நாடி வருவார்கள். இதன் மூலமாக இரண்டு மாதத்தில், சுமார் 2 லட்சம் பேருக்கு முதியோர் உதவித் தொகை கொடுத்திருக்கிறோம். மொத்தம் 5 லட்சம் பேருக்கு தருவதாகக் சொல்லியிருக்கிறோம். தகுதியானவர் அனைவருக்கும் முதியோர் உதவித் தொகை வழங்கப்படும்.

2016-ல் அம்மா அவர்கள் அம்மா இருசக்கர வாகனம் அளிக்கப்படும் என்று அறிவித்தார். அம்மா மறைந்தாலும், அம்மாவின் அரசு அந்தத் திட்டத்தின் மூலம் 1,92,856 நபர்களுக்கு அம்மா இருசக்கர வாகனம் கொடுத்திருக்கிறோம். கிராமத்தில் இருப்பவர்களுக்கு விலையில்லா கறவை மாடுகள், விலையில்லா வெள்ளாடுகள், கோழிக்குஞ்சு கூட கொடுக்கிறோம். அதேபோல பசுமை வீடுகள், வீட்டுமனை பட்டா, விலையில்லா வேட்டி, சேலைகள் கொடுக்கிறோம்.

அதற்கு மேலாக, இன்றைக்கு எல்லா குடும்ப அட்டைக்கும் பொங்கலன்று, பொங்கல் தொகுப்புடன் ரூ.1000 கொடுத்த அரசு அம்மாவின் அரசு.இந்த ஆட்சியில் எந்த திட்டமும் நிறைவேற்றப்படவில்லை என்ற ஒரு தவறான குற்றச்சாட்டை எதிர்க்கட்சித் தலைவர் ஸ்டாலின் சொல்கிறார். இன்றைக்கு, துறை வாரியாக தேசிய விருதுகளை பெற்றுக் கொண்டிருக்கிறோம். மின்சாரத் துறையில், தேசிய விருது, வேளாண்மைத் துறையில் தொடர்ந்து ஐந்தாண்டு காலம் உணவு தானிய உற்பத்தியில் இன்றைக்கு இந்தியாவிலேயே அதிக அளவில் உற்பத்தி செய்து தேசிய விருதை பெற்ற ஒரே அரசு தமிழ்நாடு அரசு. உறுப்பு மாற்று அறுவை சிசிக்சையில் தொடர்ந்து தேசிய அளவில் விருதுகளை பெற்றிருக்கிறோம்.

பெண் குழந்தைகளை காப்போம், பெண் குழந்தைகளுக்கு கற்பிப்போம் திட்டத்திற்கு மத்திய அரசு விருது. தூய்மை பாரதம் திட்டத்திற்கு சிறந்த விருது, மாற்றுத் திறனாளிகளுக்கு அதிக கடனுதவி வழங்கியதற்காக, தமிழ்நாடு மாநில தலைமைக் கூட்டுறவு வங்கிக்கு தேசிய விருது. போக்குவரத்துத் துறையில், கல்வித் துறையில் விருதுகள் பெற்றிருக்கிறோம். அதற்கு மேலாக, மத்திய அரசின் திறன்மிக்க நல்லாட்சி தரவரிசையில் முதலிடம், முதன்மை மாநிலம் என்று இன்றைக்கு நாம் தேர்ந்தெடுக்கப்பட்டிருக்கிறோம் என்று சொன்னால், எந்த அளவுக்கு இன்றைக்கு சிறப்பாக ஆட்சி நடைபெற்றுக் கொண்டிருக்கிறது என்பதை எண்ணிப் பார்க்க வேண்டும்.

வேண்டுமென்றே திட்டமிட்டு இன்றைக்கு ஸ்டாலின் பொய்யான செய்தியை மக்களிடத்திலே பரப்புகிறார். ஆரம்பக் கட்டத்திலே நான் முதலமைச்சராக பொறுப்பேற்கின்றபொழுது, ஸ்டாலின் இந்த எடப்பாடி பழனிசாமியின் அரசு பத்து நாள் நீடிக்கும் என்றார், நீடித்தது. அப்புறம் 1 மாதம் தான் நீடிக்கும் என்றார், நீடித்தது. அதற்குப் பிறகு பட்ஜெட் போடுகிற வரைக்கும் இந்த ஆட்சி நீடிக்குமா என்றார், நீடித்தது. மானியக் கோரிக்கை முடியும் வரை இந்த ஆட்சி நீடிக்குமா என்றார்,

நீடித்தது, அப்புறம் 6 மாதங்கள் நீடிக்குமா என்றார், நீடித்தது. 1 வருடம் நீடிக்குமா என்றார், நீடித்தது. இப்பொழுது மூன்றாண்டுகள் நிறைவு பெற்று நான்காம் ஆண்டில் அடியெடுத்து வைத்திருக்கிறது. 2021-லும் அனைத்திந்திய அண்ணா திராவிட முன்னேற்றக் கழகம் தான் ஆட்சி அமைக்கும், அதையும் ஸ்டாலின் பார்க்கத் தான் போகிறார்.

எங்கள் மடியிலே கனமில்லை, வழியிலே பயமில்லை. நீங்கள் எந்த குற்றச்சாட்டை சொன்னாலும், அதைப்பற்றி எங்களுக்கு கவலையில்லை, தப்பு செய்தால் தானே பயப்பட வேண்டும். உங்களுடைய ஆட்சியில் நடைபெற்ற ஊழல் போல எங்கள் ஆட்சியில் எந்த ஊழலும் நடைபெறவில்லை. எவ்வளவோ பொய்யான வழக்குகளை போட்டுப் பார்த்தீர்கள், அதையெல்லாம் நிரூபணம் செய்ய முடியவில்லை.

உங்களுடைய ஆட்சியில் பூச்சி மருந்து ஊழல், வீராணம் ஊழல், இன்னும் அந்த பைப் எல்லாம் காட்சியளிக்கிறது, அந்த ஊழலுக்கு அதுவே சாட்சி. எப்பொழுது பார்த்தாலும், அதிமுக அரசு ஊழல் அரசு என்று ஒரு பொய்யை திருப்பித் திருப்பிச் சொன்னால் மக்கள் நம்புவார்கள் என்று பார்க்கிறார், நிச்சயம் நம்பமாட்டார்கள். ஏனென்றால், நாங்கள் உண்மையைச் சொல்கிறோம், சொன்னதைச் செய்கிறோம். ஆகவே, மக்கள் எங்களை நம்புகிறார்கள். நீங்கள் அப்படியா இருக்கிறீர்கள்?

நடந்து முடிந்த நாடாளுமன்ற தேர்தலிலே எவ்வளவு பெரிய பொய் பேசினீர்கள். கொஞ்ச நஞ்சமாகவா பொய் பேசினீர்கள். கல்விக் கடன் ரத்து, விவசாயிகள் வாங்கிய கடன் தேசியமயமான வங்கியானாலும் சரி, கூட்டுறவு வங்கியானலும் சரி, தனியார் வங்கியானாலும் சரி, பொய் தானே சொல்கிறோம், விலை கொடுத்தா வாங்குகிறோம். இலவசமாக சொல்வது தானே. தனியார் வங்கியில் வாங்கிய கடன் கூட ரத்தாம். இப்படிப்பட்ட பொய் பேசுகின்ற மகா பொய்யாளி யார் என்றால் ஸ்டாலின் தான். அப்புறம் சொன்னார், 5 சவரனுக்கு கீழ் இருந்தால் நகைக் கடன் தள்ளுபடி, இது எல்லாம் செய்ய முடியுமா. நீங்கள் ஆட்சியிலா இருக்கிறீர்கள்.

ஆட்சியிலே இருப்பது நாங்கள். நாங்கள் சொல்வதை செய்ய முடியுமா, நீங்கள் சொல்வதை செய்ய முடியுமா. இப்படி ஏமாற்றி, பொய் பேசி நடந்து முடிந்த நாடாளுமன்ற தேர்தலில் வெற்றி பெற்றீர்கள். அது முடிந்து 5 மாதம் கழித்து உள்ளாட்சி தேர்தல் நடந்தது, நம்முடைய சேலம் மாவட்டத்தில் அனைத்திந்திய அண்ணா திராவிட முன்னேற்றக் கழகம் மாவட்ட கவுன்சிலர் 22-க்கு 18 நாங்கள் ஜெயித்திருக்கிறோம். ஐந்தே மாதத்தில் பொய் நிலைக்கவில்லை. உங்களுடைய பொய் முகம் வெளிச்சத்திற்கு வந்து விட்டது. மக்கள் அழகாக உண்மையை உணர்ந்தார்கள். எங்கள் பக்கம் வாக்கு அளித்தார்கள்.

ஊராட்சி ஒன்றிய பெருந்தலைவர்கள், 20-க்கு 19 நாங்கள் தான் ஜெயித்து இருக்கிறோம். ஆக, நடந்து முடிந்த நாடாளுமன்ற தேர்தலில் பொய் பிரச்சாரம் செய்து மக்களை ஏமாற்றி அதன்மூலம் வெற்றி பெற்றீர்கள். பொய் என்றைக்கும் நிலைக்காது என்பதை உள்ளாட்சி மன்றத் தேர்தல் மூலமாக மக்கள் நிரூபித்து விட்டார்கள். வரஇருக்கின்ற மாநகராட்சி தேர்தலில் சேலம் மாநகராட்சியில் 60 வார்டுகள் இருக்கின்றது.

அனைத்திந்திய அண்ணா திராவிட முன்னேற்றக் கழக கூட்டணி அதனை முழுவதையும் வெற்றி பெறும். ஏன் என்று சொன்னால் நீங்கள் வைத்த கோரிக்கைகளை அனைத்தும் நிறைவேற்றி இருக்கின்றோம். நாங்கள் திட்டங்களை நிறைவேற்றியதால் கேட்கிறோம், நிறைவேற்றாமல் கேட்கவில்லை. வருகின்ற மாநகராட்சி தேர்தல் மிக முக்கியமான தேர்தல். நம்முடைய வேட்பாளர் வெற்றி பெற்றால் தான் அரசு செயல்படுத்தும் திட்டத்தை முழுமையாக நிறைவேற்ற முடியும்.

இந்த பகுதியினுடைய அடிப்படை தேவைகளை நிறைவேற்ற வேண்டும் என்று சொன்னால் அந்த உள்ளாட்சியிலே அனைத்திந்திய அண்ணா திராவிட முன்னேற்றக் கழகத்தை சேர்ந்தவர் அதில் பிரதிநிதியாக இருந்தால் தான் அரசு போடுகின்ற திட்டத்தை முழுமையாக நிறைவேற்ற முடியும். சேலம் மாவட்டம் முதலமைச்சரை பெற்றுள்ள மாவட்டம் என்பதை நீங்கள் எண்ணிப் பார்க்க வேண்டும். இந்த மாவட்ட மக்கள் என்னிடம் அளிக்கின்ற மனுக்களுக்கு உடனுக்குடன் நடவடிக்கைகள் எடுக்கப்பட்டு வருகின்றன.

ராஜீவ் காந்தி கொலை வழக்கிலே குற்றம் சாட்டப்பட்டுள்ள 7 பேர் விடுதலை பற்றி ஸ்டாலின் பேசினார். இதய தெய்வம் புரட்சித் தலைவி அம்மா அவர்களின் பிறந்த நாளான இன்று இதைப் பற்றி பேசுவது பொருத்தமாக இருக்கும் என்று நினைக்கின்றேன். அந்த 7 பேரை விடுதலை செய்ய வேண்டும் என்று அம்மா அவர்கள் முயற்சி செய்தார்கள். துரதிஷ்டவசமாக அம்மா அவர்கள் மறைந்து விட்டார்கள்.

ஆனால் அம்மா அவர்கள் எண்ணிய எண்ணத்தை நிறைவேற்றுகின்ற விதமாக, ராஜீவ் காந்தி கொலை வழக்கிலே குற்றம் சாட்டப்பட்டுள்ள 7 பேர் விடுதலை செய்ய வேண்டும் என்று அமைச்சரவை கூட்டத்திலே தீர்மானம் நிறைவேற்றப்பட்டு ஆளுநருக்கு அனுப்பி வைக்கப்பட்டு, ஆளுநரின் பார்வையில் இருக்கின்றது. ஸ்டாலின் கேட்கிறார் ஏன் இன்னும் விடுதலை செய்யவில்லை என்று. அதற்காக போராட்டம் நடத்தப்படும் என்று.

திராவிட முன்னேற்றக் கழக ஆட்சி நடைபெற்று கொண்டு இருந்த போது, கருணாநிதி முதலமைச்சராக இருந்த போது, அமைச்சரவை கூட்டி, 7 பேர் விடுதலை குறித்து பரிசீலிக்கப்பட்டது. அப்பொழுது என்ன முடிவு எடுத்தார்கள் என்றால், நளினியை மட்டும் விடுதலை செய்யலாம், மற்றவர்களுக்கு ஏற்கனவே நீதிமன்றம் வழங்கிய அந்த தீர்ப்பை நடைமுறைப்படுத்தலாம் என்று தீர்மானம் நிறைவேற்றப்பட்டது.

அப்போது ஸ்டாலின் மற்றும் துரைமுருகன் ஆகியோர் அமைச்சராக இருக்கிறார்கள். நளினியை மட்டும் விடுதலை செய்து, மற்ற 6 பேரை விடுதலை செய்ய கூடாது என்று தீர்மானத்தில் கையெழுத்திட்டு விட்டு, இப்போது நாடகத்தை அரங்கேற்றி வருகிறார்கள். இப்போது பொய் பேசி வருகிறார்கள். நீதிமன்றம் அளித்த தீர்ப்பை நளினியை தவிர்த்து 6 பேருக்கும் நிறைவேற்றப்படலாம் என்ற தீர்மானத்தை நிறைவேற்றி விட்டு இப்பொழுது நாடகம் ஆடுகிறார்.

பச்சோந்தி கூட கொஞ்சம் நேரம் கழித்து தான் நிறம் மாறும், ஆனால் திராவிட முன்னேற்றக் கழகத்தின் ஸ்டாலின் மாறிக் கொண்டே போகிறார். நேரத்திற்கு தகுந்தாற்போல் நிறத்தை மாற்றிக் கொள்கிறார். அப்படிப்பட்ட தலைவர் தான் ஸ்டாலின். அவர் எப்பொழுது பார்த்தாலும் முதலமைச்சர், முதலமைச்சர் என்று சொல்லிக் கொண்டே இருக்கிறார், நாங்களா வேண்டாம் என்று சொன்னோம், மக்கள் கொடுத்தால் நீங்கள் போய் எடுத்துக் கொள்ளுங்கள், நான் வேண்டாம் என்று சொல்லவில்லையே? அனைத்திந்திய அண்ணா திராவிட முன்னேற்றக் கழகத்தைப் பொறுத்தவரை, மக்கள் தான் முதலமைச்சர், நான் முதலமைச்சர் அல்ல.

மக்கள் தான் நாட்டை ஆளுகிறார்கள், நாங்கள் சேவகர்களாக இருக்கின்றோம். உங்களைப் போல் எப்பொழுது பார்த்தாலும், முதலமைச்சராக வருவேன், வருவேன் என்று கொக்கரித்துக் கொண்டிருப்பவர்கள் நாங்கள் அல்ல. பொன்மனச் செம்மல் புரட்சித் தலைவர், புரட்சித் தலைவி அம்மா அவர்கள், அனைத்திந்திய அண்ணா திராவிட முன்னேற்றக் கழகத் தொண்டரிலிருந்து இதுநாள் வரை மக்களுக்கு சேவை செய்ய வேண்டுமென்பதற்காக கட்சியும், ஆட்சியும் நடத்திக் கொண்டிருக்கிறோம் ஸ்டாலின் அவர்களே.

ஸ்டாலின் அதிமுக ஆட்சியில் கடன் அதிகமாகி விட்டது என்று சொல்கிறார். இப்பொழுது 4 லட்சம் கோடி இருப்பதை இல்லை என்று சொல்லவில்லை. ஆனால், 2011-ல் மக்களால் நிராகரிக்கப்பட்டீர்கள். அப்பொழுது தமிழ்நாட்டின் கடன் ரூ.1 லட்சம் கோடி. 10 ஆண்டுகளில் எவ்வளவு வட்டி வந்திருக்கும்? அதையும் இதில் சேர்த்துத்தான் வருகிறது.

அதுமட்டுமல்ல, பத்தாண்டுகளுக்கு முன்பு விலைவாசி என்ன? இப்பொழுது விலைவாசி என்ன? அன்றைக்கு ரூ.1 லட்சம் கோடி என்பது பெரிய தொகை. இன்றைக்கு ரூ.4 லட்சம் கோடி என்பது நீங்கள் வாங்கிய கடனுக்கு வட்டியும் சேர்த்து ரூ.4 லட்சம் கோடி வந்திருக்கிறது. அன்றைய பண மதிப்பு என்ன? இன்றைய பண மதிப்பு என்ன? புரட்சித்தலைவி அம்மா ஆட்சியிலும் சரி, அம்மா மறைவிற்குப் பிறகு என் தலைமையில் நடைபெறுகின்ற ஆட்சியிலும் சரி, மக்களுடைய திட்டங்களுக்காக நாங்கள் கடன் வாங்கி செலவழித்துக் கொண்டிருக்கிறோம்.

நீங்களெல்லாம் அப்படி செய்தீர்களா? கிடையாது. மின்சாரம் உற்பத்தி செய்ய வேண்டும் என்பதற்காக கடனைப் பெற்று புதிய அனல் மின் நிலையம் உருவாக்குவதற்கு நடவடிக்கை எடுக்கிறோம். அதேபோல, பல்வேறு இடங்களில் தடுப்பணை கட்ட வேண்டும், அதற்கு உலக வங்கி மூலமாக நிதி ஆதாரத்தைப் பெறுகிறோம். தமிழ்நாடு முழுவதும் சிறப்பான சாலைகள். உங்களுடைய ஆட்சியில் இருந்ததா? தமிழ்நாடு முழுவதும் சிறப்பான சாலைகள் உள்ளதால் தான், புதிய, புதிய தொழிற்சாலைகள் தமிழ்நாட்டிற்கு வருகிறது. உட்கட்டமைப்பு சிறப்பாக இருந்தால் தான் புதிய தொழிற்சாலைகள் வரும். அதற்காக உலக வங்கியிடம் நிதியைப் பெற்று புதிய சாலைகளை உருவாக்கிக் கொண்டிருக்கிறோம்.

புதிய கட்டடங்கள், புதிய மருத்துவமனை, 11 அரசு மருத்துவக் கல்லூரிகளுக்கு கட்டடம் வேண்டுமென்று சொன்னால், அதற்கு உலக வங்கியிடமிருந்து நிதி ஆதாரத்தைப் பெறுகிறோம். சொத்து உருவாகிறது. ஒரு சொத்து உருவாக்குவதற்கு அரசு கடன் வாங்குகிறது. உங்கள் ஆட்சியில் எந்தக் கடனும் இல்லாததுபோலவும், அனைத்திந்திய அண்ணா திராவிட முன்னேற்றக் கழக ஆட்சியில் தான் கடன்சுமை அதிகமானது போல் ஒரு பொய்யான தோற்றத்தை மக்களுக்கு ஏற்படுத்தி, ஒரு தவறான செய்தியை ஸ்டாலின் பரப்பி வருகிறார். அனைத்திந்திய அண்ணா திராவிட முன்னேற்றக் கழக அரசு ஒரு ரூபாய் செலவு செய்தாலும், அது நாட்டுமக்களுக்கு நன்மை பயக்கக்கூடிய திட்டமாக இருக்க வேண்டும் என்று எண்ணிப் பார்த்து செலவழிக்கின்ற அரசு அம்மாவின் அரசு.

புரட்சித் தலைவர் எம்.ஜி.ஆர் தோற்றுவித்த இயக்கம், புரட்சித் தலைவி அம்மா அவர்கள் கட்டிக் காத்த இயக்கம் அந்த வழியிலே வந்த நாங்கள் உண்மையை சொல்வோம், சொல்வதை செய்வோம். எத்தகைய சூழ்நிலையிலும் நாங்கள் மாற மாட்டோம். அதுதான் அனைத்திந்திய அண்ணா திராவிட முன்னேற்றக் கழக கொள்கை என்பதை பல காலக்கட்டத்தில் நிரூபித்துக் காட்டியிருக்கிறோம்.

உங்களைப் போல் சொல்வது ஒன்று, நடப்பது வேறு அல்ல. சொல்லும் செயலும் ஒன்றாக இருப்பது அனைத்திந்திய அண்ணா திராவிட முன்னேற்றக் கழக அரசு. வேண்டுமென்றே திட்டமிட்டு நாட்டிலே குழப்பத்தை உண்டாக்க வேண்டும் என்பதற்காக எதிர்க்கட்சிகள் போடும் சதித்திட்டத்தை மக்கள் துணையோடு முறியடிப்போம் என்பதை இந்த நேரத்திலே தெரிவித்துக் கொள்கிறேன்.

சிறுபான்மை மக்களுக்காக ஏராளமான திட்டங்களை இதய தெய்வம் புரட்சித் தலைவி அம்மா அவர்கள் வழங்கி இருக்கிறார்கள். என்னுடைய அரசு சிறுபான்மை மக்களுக்கு நலன் செய்யும் அரசாக பல்வேறு திட்டங்களை அறிவித்து கொண்டு இருக்கின்றோம். ஆகவே, சிறுபான்மை மக்கள் அச்சப்பட வேண்டியதில்லை. உங்களுக்கு பாதுகாப்பாக இருப்போம். உங்களுக்கு ஒரு பிரச்சனை என்றால் எங்களுக்கு வரும் பிரச்சனையாக கருதி அந்த பிரச்சனையை தீர்ப்பதற்கு நாங்கள் தயாராக இருக்கின்றோம் என்பதை இந்த நேரத்திலே உறுதிப்பட கூறுகின்றேன்.

இன்றைக்கு தமிழகம் அமைதிப் பூங்கா இருக்கின்றது, சட்டம் ஒழுங்கு சிறப்பாக இருக்கின்றது. இந்தியாவிலே எத்தனை மாநிலங்கள் இருந்தாலும், இன்றைக்கு சட்டம் ஒழுங்கை பேணிக் காப்பதில் முதல் மாநிலம் என்று இந்தியா டுடே என்ற ஆங்கில நாளேடு தொடர்ந்து இரண்டு முறை விருதை கொடுத்திருக்கின்றது. அப்படி அமைதியாக வாழுகின்ற மாநிலத்தில் வேண்டுமென்ற திட்டமிட்டு, தூண்டுதலின் பேரிலே இன்றைக்கு அவதூறான செய்திகளைப் பரப்பி, ஒரு சட்டம் ஒழுங்கை சீர்குலைக்கும் ஒரு சூழ்நிலையை உருவாக்க முயற்சிக்கின்றார்கள்.

எந்த வகையிலும், அம்மாவுடைய அரசு அதற்கு துணை நிற்காது என்பதை இந்த நேரத்திலே தெரிவித்து, தமிழகத்திலே வாழ்கின்ற ஒவ்வொரு தமிழரும், சிறுபான்மை மக்களாக இருந்தாலும், வேறு மக்களாக இருந்தாலும் சரி, அத்தனை பேரையும் பாதுகாக்கின்ற அரசு அம்மாவுடைய அரசு, அம்மாவுடைய அரசு என்று இந்த நேரத்திலே சுட்டிக்காட்டி, இதய தெய்வம் புரட்சித் தலைவி அம்மாவுடைய பிறந்த நாள் விழா, மிக எழுச்சியோடும் சிறப்போடும் சேலம் மாவட்ட கழகம் ஏற்பாடு செய்து இன்றைக்கு அம்மாவுக்கு ஒரு புகழை தேடித் தந்திருக்கிறீர்கள் என்று நன்றி தெரிவித்து, விடைபெறுகிறேன்.

இவ்வாறு முதலமைச்சர் எடப்பாடி கே.பானிசாமி பேசினார்.