தற்போதைய செய்திகள்

தமிழில் சிறந்த மொழி பெயர்ப்புக்காக எழுத்தாளர் கே.வி.ஜெயஸ்ரீக்கு சாகித்ய அகாடமி விருது

சென்னை

தமிழில் சிறந்த மொழிபெயர்ப்புக்கான சாகித்ய அகடாமி விருது எழுத்தாளர் கே.வி.ஜெயஸ்ரீக்கு அறிவிக்கப்பட்டுள்ளது. மலையாள எழுத்தாளர் மனோஜ் குரூரின் ‘நிலம் பூத்து மலர்ந்த நாள்’ நாவல் மொழி பெயர்ப்புக்காக இந்த விருது அறிவிக்கப்பட்டுள்ளது. நாட்டின் முக்கிய 24 மொழிகளில் வெளியாகும் சிறுகதை, நாவல், இலக்கிய விமர்சனம் போன்றவற்றுக்கு ஆண்டுதோறும் சாகித்ய அகாடமி விருது வழங்கப்படுகிறது.

2019-ம் ஆண்டின் தமிழ் மொழிக்கான விருதுக்கு எழுத்தாளர் சோ.தர்மன் தேர்வு செய்யப்பட்டார். அவர் எழுதிய ‘சூல்’ என்ற நாவலுக்காக இந்த விருது வழங்கப்படுவதாக கடந்த டிசம்பர் மாதம் அறிவிக்கப்பட்டது. இந்நிலையில் மொழி பெயர்ப்புக்கான சாகித்ய அகாடமி விருதுகள் நேற்று அறிவிக்கப்பட்டன.

மலையாள எழுத்தாளர் மனோஜ் குரூரின் ‘நிலம் பூத்து மலர்ந்த நாள்’ என்ற நாவலை கே.வி.ஜெயஸ்ரீ மிகச் சிறப்பாக தமிழில் மொழி பெயர்த்தார். வம்சி இதனை வெளியிட்டது. சங்க காலப் பாணர், கூத்தர்களின் ஆற்றுப்படையாக உரைநடையில் வந்துள்ள இந்நாவல், பாரியின் படுகொலையை கதை களனாக கொண்டது.

இந்நிலையில் இந்த நாவல் மொழிபெயர்ப்புக்காக தமிழ் எழுத்தாளர் கே.வி.ஜெஸ்ரீக்கு சாகித்ய அகாடமி விருது அறிவிக்கப்பட்டுள்ளது. 50 ஆயிரம் ரொக்கப் பணமும், செம்புப் பட்டயமும் விருதாக அளிக்கப்படுவது வழக்கம். விருது வழங்கப்படும் நாள் இன்னும் அறிவிக்கப்படவில்லை.