தற்போதைய செய்திகள்

சிறுபான்மை மக்களுக்கு பிரச்சினை என்றால் முதலில் குரல் கொடுக்கும் இயக்கம் அ.தி.மு.க. – துணை ஒருங்கிணைப்பாளர் கே.பி.முனுசாமி உறுதி

வேலூர்

சிறுபான்மை மக்களுக்கு ஏதாவது ஒரு பிரச்சினை என்றால் முதலில் குரல் கொடுக்கும் இயக்கம் அ.தி.மு.க. என்றுகழக துணை ஒருங்கிணைப்பாளர் கே.பி.முனுசாமி கூறினார்.

வேலூர் மேற்கு மாவட்டம் வேலூர் கிழக்கு பகுதியில் பகுதி கழக செயலாளர் எஸ்.குப்புசாமி தலைமையில் புரட்சித்தலைவி அம்மா அவர்களின் 72-வது பிறந்தநாள் விழா பொதுக்கூட்டம் நடைபெற்றது. பகுதி கழக செயலாளர்கள் அன்வர் பாஷா, ஏ.பி.எல்.சுந்தரம் ஆகியோர் வரவேற்றனர். பகுதி கழக செயலாளர்கள் சொக்கலிங்கம், எஸ்.நாகு, எ.ஜி.பாண்டியன், பொதுக்குழு உறுப்பினர் விஜிகர்ணல் ஆகியோர் முன்னிலை வகித்தனர். கழகத் துணை ஒருங்கிணைப்பாளரும், முன்னாள் அமைச்சருமான கே.பி.முனுசாமி, வேலூர் மேற்கு மாவட்ட கழக செயலாளரும், வணிகவரி மற்றும் பத்திர பதிவுத்துறை அமைச்சருமான கே.சி.வீரமணி ஆகியோர் சிறப்புரையாற்றினர்.

கழக துணை ஒருங்கிணைப்பாளர் கே.பி.முனுசாமி பேசியதாவது:-

1972-ல் அண்ணாவின் பெயரில் அண்ணாவின் உருவம் பொறித்த கொடியுடன் கழகம் என்ற பேரியக்கத்தை புரட்சித்தலைவர் எம்.ஜி.ஆர். தொடங்கினார். கருணாநிதி புரட்சித்தலைவரை மலையாளி என்றும் இந்த படம் 100 நாள் ஓடுமா என்றும் கேலி கிண்டல் செய்தார். கட்சியை துவங்கி ஆறு மாதத்திலேயே திண்டுக்கல் நாடாளுமன்ற இடைத் தேர்தலில் மாயாத்தேவரை
நிற்க வைத்து பல லட்சம் வாக்குகள் வித்தியாசத்தில் வெற்றிபெறச் செய்தவர் புரட்சித்தலைவர். எம்ஜிஆர் முதல்வராக இருந்த வரை தீயசக்தி கருணாநிதி கோட்டை பக்கமே வர முடியவில்லை. ஏழை எளியவர்கள் வாழ்க்கையில் முன்னேற எண்ணற்ற திட்டங்களை கொண்டு வந்தார். புரட்சித்தலைவர் எம்ஜிஆர் உலகம் போற்றும் திட்டமான சத்துணவு திட்டம் கொண்டுவந்து ஏழை எளிய மாணவர்களின் பசிப்பிணியை போக்கினார்.

எம்ஜிஆருக்கு பிறகு மூன்றாவது திராவிட தலைமுறைக்கு புரட்சித்தலைவி அம்மா அவர்கள் தலைமை ஏற்றார். பிளவுபட்ட இயக்கத்தை ஒன்றிணைத்து இழந்த சின்னத்தை மீட்டு தமிழகத்தில் புரட்சித்தலைவர் எம்ஜிஆரின் ஆட்சியை கொண்டு வந்த பெருமை புரட்சித்தலைவி அம்மா அவர்களையே சாரும். அம்மா அவர்களுக்கு பல்வேறு இன்னல்களை கருணாநிதி கொடுத்தார். அத்தனை இன்னல்களையும் தாங்கி இன்று ஒன்றரை கோடி தொண்டர்கள் உள்ள மாபெரும் இயக்கமாக கழகத்தை மாற்றியவர் அம்மா அவர்கள்.

ஏழை, எளிய மக்கள் வாழ்க்கையில் முன்னேற எண்ணற்ற மகத்தான திட்டங்களை கொண்டு வந்தார். பெண் சிசு கொலையை தடுக்க உலகமே போற்றிய உன்னத திட்டமான தொட்டில் குழந்தைகள் திட்டத்தை கொண்டு வந்தவர் அம்மா அவர்கள்.அம்மா அவர்கள் கல்வித்துறைக்கு அதிக நிதி ஒதுக்கீடு செய்து ஏழை எளிய மாணவர்களின் வாழ்க்கையில் ஒளி தீபம் ஏற்றினார்.மாணவ மாணவிகளின் இடைநிற்றலை தவிர்க்க 16 வகையான கல்வி உபகரணங்களை வழங்கினார். மாணவ, மாணவிகளுக்கு விலையில்லா மிதிவண்டிகள், விலையில்லா மடிகணினி ஆகியவற்றை வழங்கி அவர்களின் கல்வித் தரத்தை உயர்த்தினார்.

நேரத்திற்கு பள்ளிக்கு சென்று தரமான கல்வியை பயிலவும் தன்னம்பிக்கை வளரவும் விலையில்லா மிதிவண்டிகளை மாணவ-மாணவிகளுக்கு வழங்கினார் புரட்சித்தலைவி அம்மா அவர்கள்.திமுக ஆட்சியில் ஒகேனக்கல் கூட்டு குடிநீர் திட்டத்தை அறிவித்து விட்டு மட்டும் சென்று விட்டனர். ஆனால் அதற்கான டெண்டர், நிதி ஆதாரம் எதுவுமே செய்யவில்லை. பிறகு மீண்டும் அம்மா ஆட்சி வந்ததும் அப்பொழுது உள்ளாட்சித்துறை அமைச்சராக இருந்த நான் இந்த தகவலை அம்மாவிடம் தெரிவித்தேன்.

உடனே அம்மா அவர்கள் நிதி ஒதுக்கீடு செய்து டெண்டர் வைத்து மூன்றே மாதத்தில் அந்த திட்டத்தை நிறைவேற்றி
மக்களின் குடிநீர் பிரச்சினையை நிரந்தரமாக தீர்த்து வைத்தார். மனிதநேயமிக்க தாய் புரட்சித்தலைவி அம்மா அவர்கள். மக்களுக்காகவே தன்னை அர்ப்பணித்துக் கொண்ட தலைவி புரட்சித்தலைவி.அம்மா ஆட்சிக் காலத்தில் 30 அரசு கலைக் கல்லூரிகள், 27 உறுப்பு கல்லூரிகள், 29 தொழில்நுட்ப கல்லூரிகள், 4 பொறியியல் கல்லூரிகள் புதியதாக கொண்டு வரப்பட்டன.

ஐந்து முறை முதல்வராக இருந்த கருணாநிதி எத்தனை கல்லூரிகள் புதியதாக கொண்டு வந்தார் என்று சொல்ல முடியுமா? மத்திய அரசின் ஆட்சி பல்வேறு மாநிலத்தில் நடைபெற்று வருகின்றன. இருந்தபோதிலும் மத்திய அரசிடம் அனுமதி பெற்று
11 புதிய மருத்துவக் கல்லூரிகள் பெற்ற ஒரே மாநிலம் நம்முடைய தமிழ்நாடு மாநிலம் தான். அம்மாவின் வழியில் முதலமைச்சர் எடப்பாடி கே.பழனிசாமி, துணை முதலமைச்சர் ஓ.பன்னீர்செல்வம் ஆகியோர் சிறப்பாக கட்சியையும், ஆட்சியையும் வழி நடத்தி வருகின்றனர். இந்தியாவிலேயே தமிழகம்தான் வேளாண்மை, உயர்கல்வி, உள்ளாட்சித்துறை, சுகாதாரத்துறை உள்ளிட்ட அனைத்து துறையிலும் முதன்மை மாநிலமாக விளங்குகிறது.

இந்திய குடியுரிமை திருத்த சட்டத்தால் சிறுபான்மை மக்களுக்கு எந்த வித பாதிப்பும் கிடையாது.கருணாநிதி வழியில் வந்த மு.க.ஸ்டாலின் சிறுபான்மை மக்களிடம் பொய் பிரச்சாரம் மேற்கொண்டு ஓட்டுக்காக அவர்களை தவறான வழியில் அழைத்துச் செல்கின்றார். நாட்டின் அமைதியை சீர்குலைக்க முயற்சிக்கிறார். சிறுபான்மை மக்களுக்கு சிறு பிரச்சினை என்றாலும் முதலில் குரல் கொடுக்கும் கட்சி அண்ணா திமுக கட்சியாகத்தான் இருக்கும்.எல்லா மதமும் ஒரு மதம்தான். கழகம் என்ற பேரியக்கத்தில் ஜாதி, மதம் என்பதே கிடையாது.

ஹஜ் பயணிகள் தங்கும் இல்லத்திற்கு ரூபாய் 15 கோடி, உலாமக்களுக்கு ஓய்வூதியம் ரூ1500 லிருந்து 3 ஆயிரமாக உயர்த்தியும் ,பள்ளிவாசல்கள் பராமரிக்க ரூபாய் 6 கோடி நிதி கழக அரசு பட்ஜெட்டில் ஒதுக்கீடு செய்துள்ளது. சிறுபான்மை மக்களின் பாதுகாவலனாக கழக அரசு என்றும் விளங்கும்.

இவ்வாறு கழக துணை ஒருங்கிணைப்பாளர் கே.பி.முனுசாமி பேசினார்.