சிறப்பு செய்திகள் தமிழகம்

தமிழக சட்டப்பேரவை மீண்டும் மார்ச் 9-ந்தேதி கூடுகிறது – பேரவை செயலாளர் அறிவிப்பு

சென்னை

தமிழக சட்டப்பேரவை மார்ச் 9-ந்தேதி மீண்டும் கூட இருப்பதாக பேரவை செயலாளர் சீனிவாசன் அறிவித்துள்ளார்.

2020-2021-ம் நிதி ஆண்டுக்கான தமிழக பட்ஜெட் கடந்த 14-ந்தேதி தாக்கல் செய்யப்பட்டது. பட்ஜெட்டை நிதி அமைச்சரும், துணை முதலமைச்சருமான ஓ.பன்னீர்செல்வம் தாக்கல் செய்தார். இதனைத்தொடர்ந்து கடந்த 17-ந்தேதி மீண்டும் தொடங்கிய பட்ஜெட் கூட்டத்தொடர் 20-ந்தேதி வரை நடைபெற்றது.

இந்த கூட்டத்தில் முதலமைச்சர் எடப்பாடி கே.பழனிசாமி வரலாற்று சிறப்பு மிக்க காவேரி டெல்டா மாவட்ட விவசாயிகளின் நீண்ட நாள் கோரிக்கையான பாதுகாக்கப்பட்ட சிறப்பு வேளாண் மண்டல சட்டத்தை அறிமுகம் செய்தார். அது பேரவையில் நிறைவேற்றப்பட்டது. பின்னர் தேதி குறிப்பிடப்படாமல் பேரவை ஒத்திவைக்கப்பட்டது.

இந்நிலையில், பட்ஜெட் கூட்டத்தொடரின் இரண்டாவது அமர்வுக்காக தமிழக சட்டப்பேரவை மீண்டும் வரும் மார்ச் 9-ந்தேதி,
(திங்கள்) கூட இருப்பதாக சட்டப்பேரவை செயலாளர் கி.சீனிவாசன் நேற்று அறிவித்துள்ளார். இந்த கூட்டத்தொடரில், பல்வேறு துறைகளின் மானியக் கோரிக்கைகள் மீதான விவாதம் நடைபெறும்.

அப்போது, துறை ரீதியான பிரச்சினைகள் கூட்டத்தில்விவாதிக்கப்படும். மேலும், பழைய திட்டங்களின் நிலைமை, புதிய திட்டங்களை தொடங்குதல் குறித்து பல்வேறு கட்சிகளின் உறுப்பினர்கள் கேள்விகளை எழுப்புவர். அதற்கு சம்பந்தப்பட்ட துறை அமைச்சர்கள் பதிலளிப்பார்கள்.