சிறப்பு செய்திகள் தற்போதைய செய்திகள்

கொள்ளிடத்தில் புதிய கதவணைகள் அமைக்கும் பணி 2021 ஜனவரி இறுதிக்குள் முடிக்கப்படும் : முதலமைச்சர் திட்டவட்டம்

திருச்சி

கொள்ளிடத்தில் புதிய கதவணைகள் அமைக்கும் பணி 2021-ம் ஆண்டு ஜனவரி இறுதிக்குள் முடிக்கப்படும் என்று முதலமைச்சர் எடப்பாடி கே.பழனிசாமி கூறினார்.

முதலமைச்சர் எடப்பாடி கே.பழனிசாமி  திருச்சி மாவட்டம், முக்கொம்பு கொள்ளிடம் மேலணையில் புதிய கதவணைகள் கட்டும் பணியினை ஆய்வு செய்த பின் செய்தியாளர்களுக்கு அளித்த பேட்டி:

ஏற்கனவே கொள்ளிடம் கதவணைகள் வலுவிழந்து உடைந்த காரணத்தினால், அதற்கு மாற்றாக புதிய கதவணைகள் கட்டப்படும் என்று அறிவிக்கப்பட்டு சுமார் 387.60 கோடி ரூபாய் மதிப்பீட்டில் இந்தத் திட்டம் தொடங்கப்பட்டு, பணிகள் துரிதமாக நடைபெற்று வருகிறது. இதுவரை 35 விழுக்காடு பணிகள் நிறைவு பெற்றிருக்கின்றன. எஞ்சிய பணிகள் 2021-ம் ஆண்டு ஜனவரி இறுதிக்குள் முடிக்கப்பட்டு பயன்பாட்டிற்குக் கொண்டுவர திட்டமிடப்பட்டுள்ளது. மொத்தமுள்ள 1,650 மீட்டர் நீளமுள்ள அடித்தள சுவற்றில் 711 மீட்டர் நீளமுள்ள அடித்தள சுவர் முடிக்கப்பட்டுள்ளது.

மொத்தமுள்ள 1,532 மீட்டர் நீளமுள்ள குறுக்கு வெட்டுச் சுவரில், 500 மீட்டர் நீளமுள்ள குறுக்கு வெட்டுச் சுவர் முடிக்கப்பட்டுள்ளது. மொத்தமுள்ள 7,800 எண்ணிக்கையிலான கான்கிரீட் பிளாக்குகளில், 1,489 எண்ணிக்கையிலான கான்கிரீட் பிளாக்குகள் முடிக்கப்பட்டுள்ளன. 45 மதகுக் கதவுகள் செய்து முடிக்கப்பட்டுள்ளன. இப்பணியானது விரைந்து மேற்கொள்ளப்பட்டு வருகிறது.

இந்த பணிகளை விரைந்து முடிப்பதற்கு இரவு, பகல் பாராமல் பணியாளர்கள் பணியாற்றிக் கொண்டிருக்கிறார்கள். 2021-ம் ஆண்டு ஜனவரி இறுதிக்குள் பணிகள் அனைத்தும் முடிக்கப்பட்டு மக்களுடைய பயன்பாட்டிற்கு கொண்டு வருவதற்கு திட்டமிடப்பட்டுள்ளது.

கேள்வி: மேட்டூரில் தண்ணீர் முழுவதுமாக இருப்பதினால் ஜூன் மாதம் இயற்கையாகவே திறந்துவிட வாய்ப்பிருப்பதினால், பணிகள் ஏதும் பாதிக்கப்படுமா?

பதில்: ஜூன் மாதம் டெல்டாவிற்குத் தான் திறந்து விடுகின்றோம். அதனால் இங்கே பாதிக்க வாய்ப்பு இல்லை. ஸ்டீல் பைப் அடித்திருக்கிறோம், எந்தவித பாதிப்பும் இல்லாமல் இந்தப் பணிகள் துரிதமாக நடைபெறுவதற்கு அனைத்து முதற்கட்டப் பணிகளும் செய்து கொடுக்கப்பட்டுள்ளன.

கேள்வி: பாதுகாக்கப்பட்ட வேளாண் மண்டலம் அமைத்ததற்கு விவசாயிகள் 7ஆம் தேதி உங்களுக்கு பாராட்டு விழா வைத்துள்ளார்கள். ஆனால், அவர்களுக்கு ஒரு அச்சத்தை ஏற்படுத்தும் விதத்தில், நேற்று காவிரி மேலாண்மை ஆணையத்தில் மீண்டும் மேகதாது அணை பிரச்சினையை கர்நாடகா எழுப்பியிருக்கிறது?

பதில்: கர்நாடகா இப்பொழுதா எழுப்புகின்றார்கள்? ஆரம்பத்திலிருந்தே எழுப்பிக் கொண்டிருக்கின்றார்கள். இதுகுறித்து உச்சநீதிமன்றத்தில் வழக்கு தொடரப்பட்டு வழக்கு நிலுவையில் இருக்கின்றது. ஏற்கனவே, உச்சநீதிமன்றத்தில் காவிரி நதிநீர் இறுதித் தீர்ப்பில் நமக்கு வழங்கப்படும் நீரைத் தடுக்கவோ, திருப்பி அனுப்பவோ கூடாதென்று தெளிவாகக் குறிப்பிடப்பட்டிருக்கிறது. அனைத்துப் பத்திரிகை, ஊடகங்களிலும் வெளியிட்டிருக்கின்றீர்கள். அவர்கள் வேண்டுமென்றே இப்படிப்பட்ட ஒரு செயலில் ஈடுபடுகின்றார்கள், இது தீர்ப்பிற்கு எதிரானது.

கேள்வி: மத்திய அரசின் ஆதரவு இருப்பதினால்தானே கர்நாடகா இந்தப் பிரச்சினையை தொடர்ந்து எழுப்பிக் கொண்டிருக்கிறது?

பதில்: நாம் யாரையும் குற்றம்சாட்டவில்லை. நான் ஏற்கனவே தெரிவித்ததைப் போல உச்சநீதிமன்றத் தீர்ப்பில் யாரும் தலையிட முடியாது.

கேள்வி: சேலத்தில் நீங்கள் பேசும்பொழுது, திருச்சி மற்றும் அரியலூர் மாவட்டங்கள் பாதுகாக்கப்பட்ட வேளாண் மண்டலத்தில் இணைக்கப்படும் என்று சொல்லியிருந்தீர்கள்?

பதில்: மீத்தேன் எடுக்கக்கூடிய பகுதிகள் என்று ஆய்வு செய்து அதிகாரிகளிடம் கேட்டபொழுது, தஞ்சாவூர், திருவாரூர், நாகப்பட்டினம் மாவட்டங்கள், கடலூர் மாவட்டத்தின் ஒரு பகுதி, புதுக்கோட்டை மாவட்டத்தின் ஒரு பகுதி ஆகியவைகள் மீத்தேன் இருக்கின்ற பகுதிகள் என்றதனால், அவைகள் மட்டும் பாதுகாக்கப்பட்ட வேளாண் மண்டலமாக அறிவிக்கப்பட்டன.

கேள்வி: ஏற்கனவே இருக்கின்ற திட்டங்கள் செயல்படுத்தப்படுமா என்கிற அச்சம் இருக்கிறதே?

பதில்: ஏற்கனவே இருக்கின்ற திட்டங்களை நாங்கள் நிறுத்தவில்லை. நாங்கள் அறிவிப்பிலும், அரசிதழிலும் தெரியப்படுத்தியிருக்கிறோம், பத்திரிகைகளிலும் நீங்கள் வெளியிட்டிருக்கின்றீர்கள். இன்னும் அந்தச் சந்தேகத்தை எழுப்ப வேண்டிய அவசியம் இல்லை.

கேள்வி: மத்திய அரசு தானே இதைச் செய்ய வேண்டும்?

பதில்: மத்திய அரசு செய்ய வேண்டுமென்று கிடையாது. வேளாண் துறையில் மாநில அரசுக்கு இருக்கின்ற அதிகாரத்தைப் பயன்படுத்தி நாங்கள் தெளிவாகச் சொல்லியிருக்கின்றோம். மத்திய அரசிடமும் இதுகுறித்து குறிப்பிட்டு அவர்களும் வேளாண் துறை சம்பந்தமாக மாநில அரசு எடுக்கின்ற முடிவு மாநிலத்தின் அதிகாரத்திற்கு உட்பட்டது என்று தெளிவுபடுத்தியுள்ளனர்.

கேள்வி: திருச்சியை இரண்டாவது தலைநகரமாக்க வேண்டுமென்று நீண்டகாலமாக ஒரு கோரிக்கை இருக்கின்றதே?
பதில்: அப்படிப்பட்ட எண்ணம் இதுவரை அரசுக்கு இல்லை.

கேள்வி: பாசனப் பகுதிகளை பாதுகாக்கப்பட்ட வேளாண் மண்டலத்தில் சேர்க்க வேண்டும், எதிர்காலத்தில் ஏதும் திட்டம் வந்தால் சிக்கலாகி விடும் என்று விவசாயிகள் கோரிக்கைகள் வைக்கின்றனரே?

பதில்: அதுபோல இதுவரைக்கும் என்னிடம் கோரிக்கை வைக்கவில்லை. திருச்சி, அரியலூர், கரூர் பகுதிகளில் அதிக தொழிற்சாலைகள் இருப்பதினால், அவைகள் பாதுகாக்கப்பட்ட வேளாண் மண்டலங்களாக அறிவிக்கப்பட்டால் இங்குள்ள தொழிற்சாலைகள் எதையும் செயல்படுத்த முடியாது. ஆகவே, அரசு ஆய்வு செய்து, ஆய்வின்படி நான் குறிப்பிட்ட பகுதிகளையெல்லாம் பாதுகாக்கப்பட்ட வேளாண் மண்டலமாக அறிவிக்கப்பட்டுள்ளது.

கேள்வி: வரவிருக்கும் மாநிலங்களவைத் தேர்தலுக்கான மூன்று வேட்பாளர்கள் தேர்ந்தெடுப்பது பற்றி?

பதில்: அதைத் தலைமைக் கழகம் கூடி, தலைமைக் கழகத்தின் மூத்த நிர்வாகிகள் தேர்ந்தெடுப்பார்கள். இன்றைக்குத் தான் இந்திய தேர்தல் ஆணையம் அறிவிப்பு வெளியிட்டுள்ளது, இனிதான் முடிவு செய்வோம்.

கேள்வி: மீத்தேன், ஹைட்ரோகார்பன் எதிப்புப் போராட்டத்தில் ஈடுபட்டதற்கான வழக்குகள்…..?

பதில்: அது அரசின் பரிசீலனையில் இருக்கிறது.

கேள்வி: பி.ஜே.பி. கூட்டணிக் கட்சியாக இருக்கக்கூடிய பீகாரில் என்.ஆர்.சி.க்கு எதிராக தீர்மானம் போட்டுள்ளனரே? அதுபோல் நம் மாநிலத்திலும் வாய்ப்பிருக்கிறதா?

பதில்: அவையெல்லாம் அரசின் பரிசீலனையில் இருக்கிறது.

இவ்வாறு முதலமைச்சர் எடப்பாடி கே.பழனிசாமி கூறினார்.