தற்போதைய செய்திகள்

தமிழகத்தில் எப்போதும் அ.தி.மு.க. அலை தான் வீசும் – அமைச்சர் கே.டி.ராஜேந்திரபாலாஜி உறுதி

விருதுநகர்

தமிழகத்தில் எப்போதும் அ.தி.மு.க. அலை தான் வீசும் என்று அமைச்சர் கே.டி.ராஜேந்திரபாலாஜி கூறினார்.

விருதுநகர் மாவட்டம் ஸ்ரீவில்லிபுத்தூர் அருகே மம்சாபுரத்தில் புரட்சித்தலைவி அம்மா அவர்களின் 72-வது பிறந்தநாள் விழா மற்றும் பட்ஜெட் விளக்க பொதுக்கூட்டம் நடைபெற்றது. கூட்டத்துக்கு ஸ்ரீவில்லிபுத்தூர் தொகுதி சட்டமன்ற உறுப்பினர் சந்திரபிரபா முத்தையா தலைமை வகித்தார். சிறப்பு அழைப்பாளராக பால்வளத்துறை அமைச்சர் கே.டி.ராஜேந்திரபாலாஜி, தலைமை கழக பேச்சாளர் நடிகை பபிதா ஆகியோர் பேசினர்.

இக்கூட்டத்தில் அமைச்சர் கே.டி.ராஜேந்திரபாலாஜி பேசியதாவது:-

அதிமுகவில் இளைஞர்கள் கூட்டம் அதிகரித்து வருகிறது. எம்பி தேர்தலில் தோல்வியுற்றாலும் உள்ளாட்சித்தேர்தலில் பாதிக்குமேல் அண்ணா திமுக வெற்றி பெற்றுள்ளது. இரட்டைஇலை சின்னத்திற்கு இருக்கும் மரியாதை என்றுமே மறையாது. அதிமுகவுக்கு என்றுமே அழிவு காலம் கிடையாது. அழிக்க நினைப்பவர்கள் அழிந்து தான் போவார்கள். எம்பி தொகுதிகளிலும் ஜெயித்து விட்டோம் என்று திமுக தலைவர் ஸ்டாலின் சந்தோஷமாக இல்லை.

ஏன் என்று கேட்டால் ஜெயித்தும் ஒன்றும் செய்ய முடியாத நிலை ஏற்பட்டுள்ளது. நாடாளுமன்றத்தில் தமிழர் பிரச்சினை குறித்து திமுக எம்பிக்கள் பேசுவது கிடையாது. தமிழகத்திற்கு 11 மருத்துவக்கல்லூரியை பெற்றுக் கொடுத்தவர் தமிழக முதல்வர் எடப்பாடியார். விருதுநகர் மாவட்டத்தில் மருத்துவ கல்லூரிக்கு வரும் மார்ச் 1-ந்தேதி அடிக்கல் நாட்டி பணிகளை துவக்கி வைக்க முதல்வர் விருதுநகர் வருகை தருகிறார்.

ஏழை, எளிய மக்களை பார்த்து நலத்திட்ட உதவிகளை தொடர்ந்து செய்து கொண்டிருக்கும் இயக்கம் அண்ணா திராவிட முன்னேற்றக் கழகம். தமிழகத்தில் எப்போதும் அதிமுக அலை தான் வீசும். அண்ணா திமுகவை அழிக்கவே முடியாது. நாங்கள் சாகா வரம் பெற்று வந்தவர்கள். தமிழகத்தின் முதல்வராக ஸ்டாலின் வர வாய்ப்பே கிடையாது. அவருக்கு அந்த யோகம் கிடையாது. ஒரு கட்சி வளர்கிறதா என்பதை ஒரு ஜவுளிக்கடையில் சென்று தெரிந்து கொள்ளலாம்.

ஜவுளி கடைகளில் அண்ணா திமுக கரை வேட்டி தான் அதிகமாக விற்பனை செய்யப்பட்டு வருகின்றன. உழைக்கும் தொண்டர்களுக்கு அண்ணா திமுகவில் என்றும் உரிய மரியாதை உண்டு. பெண்களுக்கு திட்டங்களை அள்ளிக் கொடுக்கின்ற ஆட்சியாக அதிமுக ஆட்சி உள்ளது. தமிழக முதல்வர் எடப்பாடியார் ஏழை எளிய மக்களின் நிலையறிந்து திட்டங்களை அறிவித்து செயல்படுத்தி வருகிறார்.

குடியுரிமை சட்டம் தொடர்பாக இஸ்லாமியர்களை திமுகவினர் தூண்டி விடுகின்றனர். இன்று சட்டசபை கூட்டத்தொடரில் எடப்பாடியாரின் கேள்விக்கு பதில் கூற முடியாமல் ஓடி போனவர் தான் ஸ்டாலின். கலவரத்தை தூண்டிவிட்டு ஆட்சிக்கு வர துடிக்கும் திமுக தலைவர் ஸ்டாலின் கனவு ஒருக்காலும் நிறைவேறாது. எந்த தேர்தல் வந்தாலும் வாக்காளர்கள் அதிமுகவிற்கு ஆதரவாக வாக்களிக்க வேண்டும்.

இவ்வாறு அமைச்சர் கே.டி.ராஜேந்திர பாலாஜி பேசினார்.