திருச்சி

சொத்துக்குவிப்பு வழக்கில் கோர்ட் படியேறி வரும் கே.என்.நேரு, கழக அரசை குறை கூற தகுதி கிடையாது – என்.ஆர்.சிவபதி சாடல்

திருச்சி

ஊழல் வழக்கில் குடும்பத்தோடு கோர்ட் படியேறி வரும் கே.என்.நேருவிற்கு கழக அரசை குறைகூற என்ன யோக்கியதை இருக்கிறது கழக எம்.ஜி.ஆர் இளைஞரணி செயலாளரும், முன்னாள் அமைச்சருமான என்.ஆர்.சிவபதி பேசினார்.

புரட்சித்தலைவி அம்மா அவர்களின் 72-வது பிறந்தநாளையொட்டி, திருச்சி புறநகர் மாவட்டம், முசிறி சட்டமன்ற தொகுதி, தாத்தையங்கார்பேட்டை ஒன்றியம், தும்பலத்தில் ஒன்றிய கழக செயலாளர் ஆர்.ஜெயம் தலைமையில் மாபெரும் பொதுக்கூட்டம் நடைபெற்றது.

இக்கூட்டத்தில் கழக எம்.ஜி.ஆர் இளைஞரணி செயலாளரும், முன்னாள் அமைச்சருமான என்.ஆர்.சிவபதி பேசியதாவது:-

தமிழகத்தில் புரட்சித்தலைவர் எம்.ஜி.ஆர் மற்றும் புரட்சித்தலைவி அம்மா ஆகியோரின் நல்லாட்சி கழக இணை ஒருங்கிணைப்பாளரும், முதலமைச்சருமான எடப்பாடியார் தலைமையில் சிறப்பாக நடைபெற்றுக் கொண்டிருக்கிறது. தமிழகத்தில் ஜாதி, மத மோதல்கள், கலவரங்கள், வன்முறைகள், நில அபகரிப்பு, கட்ட பஞ்சாயத்து போன்ற சமூக பிரச்சனைகள் இல்லாத நல்லாட்சியை முதலமைச்சர் எடப்பாடியார் வழங்கிறார். இதனால், சட்டம்-ஒழுங்கு பிரச்சனை இல்லாத அமைதி பூங்காவாக தமிழகம் விளங்குகிறது.

தி.மு.க. தலைவர் மு.க.ஸ்டாலின் கழக அரசின் திட்டங்களையும், சாதனைகளையும் மூடிமறைக்கும் வகையில் கழக அரசுக்கு எதிராக உண்மைக்கு புறம்பான கடுமையான பொய்களையும், அவதூறுகளையும் பரப்பி குழம்பிய குட்டையில் மீன்பிடிக்க முயற்சிப்பவர்களைப்போல், மக்கள் மனங்களை திசைதிருப்பி குழப்பி வருகிறார். மேலும், கடந்த பாராளுமன்ற தேர்தலில் நிறைவேற்ற முடியாத, பொய்யான வாக்குறுதிகளை சொல்லி, மக்களை ஏமாற்றி வெற்றிபெற்றதைப்போல், இனிவரும் தேர்தல்களிலும் வெற்றிபெற்று விடலாம் என் பகல்கனவு காண்கிறார். ஸ்டாலினை நம்பி இனி தமிழக மக்கள் வாக்களிக்கப்போவதும் இல்லை. ஸ்டாலின் பகல் கனவு ஒருபோதும் இனி பலிக்கப்போவதும் இல்லை.

சொத்துகுவிப்பு வழக்கில் குடும்பத்தோடு கோர்ட் படியேறிக் கொண்டிருக்கும் தி.மு.க முன்னாள் அமைச்சர் கே.என்.நேருவிற்கு நமது முதலமைச்சர் எடப்பாடியார் குறித்தும், கழக அரசு மீதும் குறைகூற என்ன யோக்கியதை இருக்கிறது. 1989-ம் ஆண்டுவரை அரியலூரில் மிளகாய் வியாபாரம் செய்துகொண்டிருந்த கே.என்.நேருவிற்கு லால்குடியில் 2000 ஏக்கர் நிலமும், ரூபாய் 5000 கோடிக்கும் சொத்தும் எங்கிருந்து வந்தது.

எனவே, தி.மு.கவினர் திட்டமிட்டு கழக அரசு மீது பரப்பிவரும் பொய் பிரச்சாரங்களையும், குற்றச்சாட்டுகளையும் முறியடிக்க விரைவில் நடைபெறவுள்ள நகர்புற உள்ளாட்சித் தேர்தலிலும், 2021-ம் ஆண்டு நடைபெறவுள்ள சட்டமன்ற பொதுத்தேர்தலிலும் கழகத்தின் மாபெரும் வெற்றிக்கு வித்திடும் வகையில் அயராது உழைப்பதற்கும், கழக அரசின் சாதனைகளை பட்டிதொட்டி எங்கும் பரப்புவதற்கும் புரட்சித்தலைவி அம்மாவின் 72-வது பிறந்தநாளில் நாம் அனைவரும் சபதம் ஏற்று பணியாற்றுவோம்.

இவ்வாறு கழக எம்.ஜி.ஆர் இளைஞரணி செயலாளரும், முன்னாள் அமைச்சருமான என்.ஆர்.சிவபதி பேசினார்.