தற்போதைய செய்திகள்

விருதுநகரில் மருத்துவக்கல்லூரி அமைய முதல்வர் தீவிர நடவடிக்கை – அமைச்சர் கே.டி.ராஜேந்திரபாலாஜி தகவல்…

விருதுநகர்:-

பெருந்தலைவர் காமராஜர் அவதரித்த புண்ணியபூமியாம் விருதுநகரில் மருத்துவக்கல்லூரி அமைவதற்கு முதல்வர் தீவிரமாக முயற்சித்து வருவதாக பால்வளத்துறை அமைச்சர் கே.டி.ராஜேந்திரபாலாஜி தெரிவித்துள்ளார்.

தமிழகம் முழுவதிலும் உள்ள நாடார் சமுதாயக் கல்வி நிறுவனங்களுக்கு பாதுகாப்பாக திகழும் முதல்வர் எடப்பாடி கே.பழனிசாமி தலைமையிலான தமிழக அரசுக்கு பாராட்டு விழா நாடார் சமுதாய அமைப்புகள் சார்பில் விருதுநகர் செந்திக்குமார நாடார் கல்லூரியில் நடைபெற்றது.

இவ்விழாவிற்கு பெருந்தொழிலதிபர் சி.சண்முகப்பிரியா தலைமை வகித்தார். நாடார் மஹாஜன சங்கம் பொதுசெயலாளர் ஜி.கரிக்கோல்ராஜ் முன்னிலை வகித்தார். விழாவில் சிறப்பு விருந்தினர்களாக பால்வளத்துறை அமைச்சர் கே.டி.ராஜேந்திரபாலாஜி, கழக அமைப்புச்செயலாளர் பி.எச்.பி.மனோஜ்பாண்டியன், மதுரை விமான நிலைய ஆலோசனைக்குழு உறுப்பினர் எஸ்.எஸ்.கதிரவன் ஆகியோர் கலந்து கொண்டனர்.

இவ்விழாவில் பால்வளத்துறை அமைச்சர் கே.டி.ராஜேந்திரபாலாஜி பேசியதாவது:-

பெருந்தலைவர் காமராஜர் பிறந்த புண்ணிய பூமியாம் விருதுநகரில் மருத்துவக்கல்லூரி அமைய வேண்டும் என்று என்னிடம் நீங்கள் கோரிக்கை வைத்தீர்கள். கடந்த முறை முதலமைச்சர் எடப்பாடி கே.பழனிசாமி டெல்லி சென்று பிரதமர் நரேந்திரமோடியை சந்தித்த போது இந்தக் கோரிக்கைக்கு மிகப்பெரிய அழுத்தம் கொடுத்தார். மிகவும் பிற்பட்ட மற்றும் பொருளாதாரத்தில் பின்தங்கியுள்ள மாவட்டங்களான விருதுநகரிலும், ராமநாதபுரத்திலும் மருத்துவக்கல்லூரி அமைக்கப்பட வேண்டியதன் அவசியத்தை புள்ளி விபரங்களுடன் முதல்வர், பிரதமரிடம் அளித்த மனுவில் விரிவாக தெரிவித்துள்ளார்.

தமிழக அரசின் சார்பில் பிரதமருக்கு அளிக்கும் கோரிக்கைகள் பொதுநலன் வாய்ந்ததாகவும், நியாயமாகவும் இருக்கும் என்பதை நன்கு உணர்ந்தவர் தான் பிரதமர் நரேந்திரமோடி. எனவே வெகுவிரைவில் உங்கள் கோரிக்கையான மருத்துவக்கல்லூரிக்கு தமிழக அரசு செயல்வடிவம் கொடுக்கும்.

தமிழகம் முழுவதிலும் நாடார் சமுதாயத்தினரால் நடத்தப்படுகின்ற கல்வி நிறுவனங்கள் சேவை நோக்கத்துடன் தான் மிகச்சிறப்பாகச் செயல்பட்டு வருகிறது. முதல்வர் எடப்பாடி கே.பழனிசாமி, பள்ளிக்கல்வித்துறை அமைச்சர் கே.ஏ.செங்கோட்டையன் ஆகியோர் நீங்கள் நடத்துகின்ற கல்வி நிறுவனங்களின் வளர்ச்சிக்காக வழங்குகின்ற கோரிக்கைகளை உடனுக்குடன் நிறைவேற்றி வருகின்றனர்.

சென்னையில் இருந்து கன்னியாகுமரி வரை நீங்கள் நடத்துகின்ற கல்வி நிறுவனங்களை எந்தவிதமான பிரச்சனைகளோ அல்லது இடையூறோ இல்லாமல் நடத்துவதற்கு எடப்பாடி கே.பழனிசாமி தலைமையிலான ஆட்சி உறுதுணையாக இருந்து வருகிறது. அதனால் தான் நீங்கள் உற்சாகமாக இந்த பாராட்டு விழாவை தமிழக முதல்வருக்கு நடத்துகிறீர்கள். முதல்வரின் பிரதிநிதிகளாக நானும், அன்புச்சகோதரர் பி.எச்.பி.மனோஜ்பாண்டியனும் இந்த விழாவில் பங்குபெற்றதை மகிழ்ச்சியாக கருதுகிறோம்.

தமிழகத்தில் பெரும்பான்மையாக வசிக்கக் கூடிய சமுதாயங்களில் ஒன்றாகத் திகழும் நாடார் சமுதாயம் தான் திராவிட இயக்கங்கள் வளர்வதற்கு தேவையான அடிப்படைக் கட்டமைப்புகளை செய்தது. இத்தகைய சிறப்புகளைப் பெற்ற ஒரு சமுதாயம் நமது முதல்வரின் சிறப்பான சேவைகளைப் பாராட்டுகின்ற வகையில் ஒரு விழா எடுத்து, அதில் நாங்களெல்லாம் பங்கு பெறுவதை எங்களுக்குக் கிடைத்த பாக்கியமாகக் கருதுகிறோம்.

தமிழகத்தில் உள்ள அனைத்து கல்வி நிறுவனங்களும் எந்தவித அச்சுறுத்தலோ, பயமோ இல்லாமல் தங்கள் கல்விப்பணிகளை மேற்கொள்ள தேவையான அனைத்து உதவிகளையும் இந்த அரசு செய்து வருகின்றது. எங்களுக்கு நீங்கள் வழங்குகின்ற இந்த பாராட்டுகள் எங்களது பொதுவாழ்க்கையில் இன்னும் அதிகமாக நாங்கள் செயல்படுவதற்குத் தேவையான உத்வேகத்தை எங்களுக்கு வழங்கும். உங்களுக்குத் தேவையான எந்த உதவியானாலும் அதை உடனுக்குடன் செய்து தருவதற்கு இந்த அரசு தயாராக உள்ளது”

இவ்வாறு அமைச்சர் கே.டி.ராஜேந்திரபாலாஜி பேசினார்.

முன்னதாக செந்திக்குமார நாடார் கல்லூரியில் கட்டப்படும் புதிய வகுப்பறைக் கட்டிடங்களுக்கான அடிக்கல்லை அமைச்சர் கே.டி.ராஜேந்திரபாலாஜி நாட்டினார். புதிய பாடப்பிரிவுகளை கழக அமைப்புச் செயலாளர் பி.எச்.பி. மனோஜ்பாண்டியன் துவக்கி வைத்தார். சாதனை படைத்த மாணவர்களுக்கு அமைச்சர் பரிசுகளை வழங்கி வாழ்த்தினார்.