தற்போதைய செய்திகள்

சிறுபான்மையின மக்களின் நலன் காக்கின்ற அரசு எடப்பாடி அரசு – அமைச்சர் எம்.சி.சம்பத் பேச்சு

கடலூர், மார்ச் 2-

தேவாலயங்கள், மசூதிகள் ஆகியவற்றை பராமரிக்க ஆண்டுதோறும் 5 கோடி ரூபாய் வழங்கி சிறுபான்மையின மக்களின் நலன் காக்கின்ற அரசாக கழக அரசு உள்ளது என்று அமைச்சர் எம்.சி.சம்பத் கூறினார்.

கடலூர் மத்திய மாவட்டம் குறிஞ்சிப்பாடி கிழக்கு ஒன்றிய கழகத்தின் சார்பில் புரட்சித்தலைவி அம்மாவின் 72-வது பிறந்தநாள் விழா, பட்ஜெட் விளக்க பொதுக்கூட்டம் மற்றும் நலத்திட்ட உதவிகள் வழங்கும் விழா குறிஞ்சிப்பாடி தம்பிப்பேட்டை எம்ஜிஆர் திடலில் நடைபெற்றது. கூட்டத்திற்கு குறிஞ்சிப்பாடி கிழக்கு ஒன்றிய கழக செயலாளர் கே.ஜி.பாஷ்யம் தலைமை தாங்கினார்.

தம்பிப்பேட்டை ஊராட்சி கழக செயலாளர் சம்மந்தம் வரவேற்றார். மாவட்ட அம்மா பேரவை தலைவர் ஏ.கே.சுப்பிரமணியம், குறிஞ்சிப்பாடி பேரூர் கழக செயலாளர் சித.ஆனந்த பாஸ்கரன், குறிஞ்சிப்பாடி ஒன்றிய துணை பெருந்தலைவர் ஏ.கே.எஸ்.குணசுந்தரி, அரசு அலுவலர் ஒன்றிய முன்னாள் தலைவர் கோ.சூரியமூர்த்தி ஆகியோர் முன்னிலை வகித்தனர். கடலூர் மத்திய மாவட்ட கழக செயலாளரும், தொழில்துறை அமைச்சருமான எம்.சி.சம்பத், தலைமை கழக பேச்சாளர் அண்ணாநகர் நா.ரா.பாபு ஆகியோர் சிறப்புரையாற்றினர்.

இந்த கூட்டத்தில் அமைச்சர் எம்.சி.சம்பத் 4 பேருக்கு சலவைப் பெட்டி, 3 நபர்களுக்கு விவசாய மருந்து தெளிப்பான், 7 பேருக்கு குக்கர், 14 பேருக்கு குத்துவிளக்கு, 72 பேருக்கு தென்னங்கன்றுகள், 500 பேருக்கு வேட்டி துண்டு, 1200 பேருக்கு சேலை ஆகிய நலத்திட்ட உதவிகளை வழங்கி பேசியதாவது:-

புரட்சித்தலைவர் எம்.ஜி.ஆர். தமிழகத்தை பதினோரு ஆண்டுகள் ஆட்சி செய்தார். அம்மா 16 ஆண்டுகள் ஆட்சி செய்தார். அதற்குப்பின் முதல்வர் எடப்பாடி கே.பழனிசாமி 3 ஆண்டுகள் முடித்து 4-வது ஆண்டாக ஆட்சி செய்கிறார். கட்சி தொடங்கி 40 ஆண்டுகளில் 30 ஆண்டு காலம் ஆட்சி செய்த கட்சியாக தனித்தன்மையோடு கழகம் விளங்குகிறது. அம்மா தனது ஆட்சி காலத்தில் தொலைநோக்கு பார்வையோடு ஆட்சி நடத்தியவர். அம்மாவின் திட்டங்கள் இன்றளவும் உலக அளவில் பேசப்படுகின்ற திட்டங்கள். இதன் மூலம் அம்மா வரலாற்றில் நிரந்தர இடம் பிடித்துள்ளார்.

அம்மா அவர்கள் பெண்கள் முன்னேற வேண்டும், பெண்கள் கல்வி கற்க வேண்டும், பெண்கள் முன்னேறினால் தான் இந்த நாடு முன்னேறும் என்பதற்காக பெண்களுக்காகவே அனைத்து திட்டங்களையும் கொண்டு வந்த ஒரு உன்னத தலைவி. தொட்டில் குழந்தை திட்டம், மகளிர் காவல் நிலையம், பெண் கமாண்டோ படை என பெண்கள் ஆணுக்கு சரி சமமாக வரவேண்டும் என்று திட்டம் வகுத்தார். விலையில்லா ஆடு, மாடுகள், வீடுகள் அனைத்தும் பெண்களுக்கே வழங்கினார். பெண்களின் திருமணத்திற்கு தாலிக்கு தங்கம் வழங்கும் திட்டம், திருமண நிதி உதவி திட்டம், முத்துலட்சுமிரெட்டி மகப்பேறு திட்டம் என அனைத்து திட்டங்களின் பயன்களும் பெண்கள் கைகளுக்கு சென்றன. பெண்களின் பொருளாதாரத்தை உயர்த்துவதே எனது முதல் குறிக்கோள் என்று ஆட்சி நடத்தினார்.

கடந்த 10 நாட்களுக்கு முன்பு காவேரி டெல்டா பாதுகாப்பு மண்டலமாக 4 மாவட்டத்தை முதலமைச்சர் அறிவித்துள்ளார். இது மிகப்பெரிய வரலாற்று சாதனை. பல ஆண்டுகாலமாக அந்த மக்களின் வாழ்வாதாரம் மிகவும் கேள்விக்குறியாக இருந்தது. தற்போது அந்த மக்களின் வாழ்வாதாரத்தை, விவசாயிகளின் வாழ்வாதாரத்தை,விவசாயக் கூலி வேலை செய்பவர்களின் வாழ்வாதாரத்தை இந்த அரசு உறுதி செய்துள்ளது. இனி ஒரு தலைமுறை மட்டுமல்ல, ஓராயிரம் தலைமுறைக்கும் இது காவிரி பாதுகாப்பு மண்டலமாக செயல்படும்.

முதல்வர் எளிதாக அணுகக்கூடிய முதல்வராக உள்ளார். யாரும் நேரில் சென்று உடனடியாக பார்க்கலாம். அனைவரையும் கருத்தறிந்து மக்களின் நலனுக்காகவே ஆட்சி நடத்துகின்ற முதல்வராக நமது முதல்வர் உள்ளார். அம்மாவின் பிறந்த நாளை பெண் குழந்தைகள் பாதுகாப்பு தினமாக முதலமைச்சர் அறிவித்துள்ளார். இந்த திட்டத்தின் மூலம் ஆதரவற்ற பெண்களுக்கு 21 வயது ஆகும் போது இரண்டு லட்சம் ரூபாயை அரசு வழங்கும்.

இதன் மூலம் அவர்கள் தங்கள் வாழ்க்கையை வளப்படுத்திக் கொள்ளலாம். இந்த திட்டம் 2020 அம்மா பிறந்தநாள் முதல் அமல்படுத்தப்படுகிறது. கடந்த 2019-ம் ஆண்டு முதல் பிளாஸ்டிக் தடை செய்யப்பட்ட மாநிலமாக தமிழகத்தை பிரகடனப்படுத்தி உள்ளார் தமிழக முதல்வர். மக்களுக்கு பெரும் தலைவலியான, சுற்றுச்சூழலுக்கு சீர்கேட்டை விளைவிக்கும் பிளாஸ்டிக்குக்கு தடைவிதித்து மக்கள் மனதில் நீங்கா இடம் பெற்றுள்ளார்.

உலமாக்களுக்கு 1500 ரூபாய் பென்ஷனை 3000 ரூபாயாக உயர்த்திய பெருமை நமது முதலமைச்சருக்கு உண்டு. தமிழகத்தில் உள்ள தேவாலயங்களை புதுப்பிக்க வருடத்திற்கு ஒரு கோடி என்பதை இந்த ஆண்டு முதல் ரூ.5 கோடியாக உயர்த்தி உள்ளார். மசூதிகளை புதுப்பிக்க ஆண்டுக்கு ரூ.80 லட்சம் என்று இருந்ததை ரூ.5 கோடியாக பராமரிப்புச் செலவுக்கு உயர்த்தியுள்ளார். இஸ்லாம் பெருமக்களின் நோன்பு கஞ்சிக்கு 5000 மெட்ரிக் டன் அரிசியை இந்த அரசு இலவசமாக வழங்குகிறது. ஹஜ் பயணிகள் புனித பயணம் செல்லும்போது அவர்களுக்கு விசா மற்றும் பல்வேறு நடைமுறைகளுக்காக இரண்டு மூன்று நாள் சென்னையில் தங்க வேண்டியுள்ளது என்பதற்காக அவர்களுக்காக ரூ.15 கோடி ரூபாயில் தங்குமிடம் அமைத்துக் கொடுத்த அரசு நமது கழக அரசு தான் என்பதை மிகவும் பெருமையோடு சொல்லிக் கொள்கிறேன்.

இந்திய பத்திரிகைகள் அனைத்தும் தமிழகம் சட்டம் ஒழுங்கு நிறைத்த மாநிலம், சுகாதாரம் நிறைந்த மாநிலம் என்று புகழ்கின்றன. மத்திய அரசு பல்வேறு காரணிகளை உள்ளடக்கி தமிழகம் இந்தியாவிலேயே முதன்மையான மாநிலம் என்று அறிவித்துள்ளது. இது ஸ்டாலினுக்கும் மற்ற எதிர்க்கட்சிகளுக்கும் பொறாமையாக உள்ளது. ஸ்டாலின் ஒரு ராசியில்லாதவர். நம் முதல்வர் அவருக்கு அடிமேல் அடி கொடுத்து வருகிறார்.

குடியுரிமை சட்டம் தொடர்பாக தமிழகத்தில் யாராவது ஒரு நபர் பாதிக்கப்பட்டுள்ளார்களா காட்டுங்கள் என்று நேருக்குநேர் சவால் விட்டார். இதுவரை அதற்கு பதில் சொல்ல முடியாத ஸ்டாலின் தேவையில்லாமல் குடியுரிமை சட்டம் தொடர்பாக போராட்டங்களை நடத்திக் கொண்டிருக்கின்றார். சிறுபான்மை மக்களின் நலன் காக்கின்ற அரசாக இந்த அரசு செயல்பட்டுக் கொண்டிருக்கிறது.

இவ்வாறு அமைச்சர் எம்.சி.சம்பத் பேசினார்.