தற்போதைய செய்திகள்

கீழ்நகர் ஆற்றுப்பகுதியில் ரூ.3.20 கோடியில் தடுப்பணை – அமைச்சர் சேவூர் எஸ்.இராமச்சந்திரன் தகவல்

திருவண்ணாமலை

குண்ணத்தூர் அடுத்த கீழ்நகர் ஆற்றுப்பகுதியில் ரூ.3.20 கோடி மதிப்பீட்டில் தடுப்பணை விரைவில் கட்டப்படவுள்ளது என்று அமைச்சர் சேவூர் எஸ்.இராமச்சந்திரன் தெரிவித்துள்ளார்.

திருவண்ணாமலை தெற்கு மாவட்டம் மேற்கு ஆரணி ஒன்றிய கழகம் சார்பில் புரட்சித்தலைவி அம்மாவின் 72-வது பிறந்தநாள் விழா பொதுக்கூட்டம் குண்ணத்தூரில் நடைபெற்றது. இக்கூட்டத்தில் இந்து சமய அறநிலையத்துறை அமைச்சர் சேவூர் எஸ்.இராமச்சந்திரன், கழக புரட்சித்தலைவி அம்மா பேரவை இணை செயலாளர் செவ்வை மு.சம்பத்குமார், செங்கை கோவிந்தராசன் ஆகியோர் சிறப்புரையாற்றினர்.

இக்கூட்டத்தில் அமைச்சர் சேவூர் எஸ்.இராமச்சந்திரன் பேசுகையில், குண்ணத்தூர் அடுத்த கீழ்நகர் ஆற்றுப்பகுதியில் ரூ.3.20 கோடி மதிப்பீட்டில் தடுப்பணை விரைவில் கட்டப்படவுள்ளது. இதனால் குண்ணத்தூர், சேவூர், ரகுநாபுரம், காமக்கூர், முள்ளிப்பட்டு, இரும்பேடு, அக்கராபாளையம், உள்ளிட்ட பத்துக்கும் மேற்பட்ட கிராமங்களில் நீர் ஆதாரம் பெருகும். மேலும் குண்ணத்தூர், ஆகாரம் ஆகிய கிராமங்கள் என்.ஆர்.ஜி.எஸ் திட்டத்தின் கீழ் தேர்வு செய்யப்படவுள்ளது. இத்திட்டம் மூலம் கிராமத்திற்கு தேவையான அடிப்படை வசதிகள் செய்து 6 மாதத்திற்குள் தன்னிறைவு பெற்ற கிராமமாக மாற்றப்படவுள்ளது. கழக அரசு மக்கள் பணியை என்றும் செய்து கொண்டிருக்கும். பொதுமக்கள் தொடர்ந்து கழக அரசுக்கு ஆதரவு தர வேண்டும் என்றார்.

இதன்பின்னர் 1000 பேருக்கு வேட்டி, சேலை, சில்வர் பாத்திரங்கள் உள்ளிட்ட நலதிட்டஉதவிகள் வழங்கப்பட்டது. கூட்டத்தில் அரசு வக்கீல் க.சங்கர், ஆவின் மாவட்ட துணைத்தலைவர் பாரி பி.பாபு, ஒன்றிய செயலாளர்கள் எம்.வேலு, பிஆர்ஜி.சேகர், பாசறை மாவட்ட செயலாளர் ஜி.வி.கஜேந்திரன், மாவட்ட கவுன்சிலர்கள் அ.கோவிந்தராசன், பூங்கொடி திருமால், மாவட்ட துணை செயலாளர் டி.கருணாகரன், மேற்கு ஆரணி ஒன்றிய குழுத்தலைவர் பச்சையம்மாள், குண்ணத்தூர் சேகர், புங்கம்பாடி சுரேஷ், உள்ளிட்டோர் கலந்து கொண்டனர்.