தற்போதைய செய்திகள்

மக்களுக்கு நல்லது செய்வதை தடுப்பது தி.மு.க. வாடிக்கை – அமைச்சர் ஓ.எஸ்.மணியன் கடும் தாக்கு

நாகப்பட்டினம்:-

மக்களுக்கு நல்லது செய்வதை தடுப்பது தி.மு.க.வின் வாடிக்கை என்று அமைச்சர் ஓ.எஸ்.மணியன் கூறினார்.

நாகை மாவட்டம் சீர்காழி பழைய பேருந்து நிலையம் அருகில் புரட்சிதலைவி அம்மா அவர்களின் 72-வது பிறந்த நாள் விழா, மற்றும் 2020-2021-ம் ஆண்டு நிதிநிலை அறிக்கை விளக்க பொதுக்கூட்டம் நகர அம்மா பேரவை செயலாளர் ஏ.வி.மணி தலைமையில் நடைபெற்றது. நகர கழக செயலாளர் ஏ.பக்கிரிசாமி வரவேற்றார். கைத்தறி மற்றும் துணிநூல்துறை அமைச்சர் ஓ.எஸ்.மணியன், சட்டமன்ற உறுப்பினர் பி.வி.பாரதி, தலைமை கழக பேச்சாளர் அரங்க.சத்தியமூர்த்தி. ஒன்றிய கழக செயலாளர்கள் செய.ராஜமாணிக்கம், நற்குணன், பேரூர் கழக செயலாளர் போகர் சி.ரவி ஆகியோர் சிறப்புரையாற்றினர்.

இக்கூட்டத்தில் அமைச்சர் ஓ.எஸ்,.மணியன் பேசியதாவது:-

புரட்சித்தலைவி அம்மா அவர்களின் புகழை சொல்லித் தெரிய வேண்டியதில்லை. தமிழக மகளிருக்காக அவர் அமல்படுத்திய திட்டங்கள், இயற்றிய சட்டங்கள் ஏராளம், ஏராளம். எனவே தான் அம்மா என்ற சொல் தமிழ் தாய்மார்களின் நம்பிக்கை என்றே சொல்லலாம். அமைதி, வளம், வளர்ச்சி என்ற பாதையில் சென்ற அம்மா காட்டிய வழியில் இன்று கட்சியும், ஆட்சியும் சிறப்பாக நடைபெறுகிறது. இதனால் தான் இந்தியாவில் உள்ள 18 மாநிலங்களில் முதன்மை மாநிலம் தமிழகம் என்று பாராட்டு பெற்றுள்ளது.

டெல்லியில் சுமார் 16 ஆண்டு காலத்திற்கு மேல் ஆட்சியில் இருந்த போது தி.மு.க.. தமிழக மக்களுக்காக என்ன செய்தது. எதுவும் செய்யவில்லை. தற்போது எந்த ஒரு நல்ல காரியத்தை தமிழகத்திற்கு செய்தாலும் அதற்கு தடை, தடை என்று அலைகிறார்கள் தி.மு.க.வினர். குடியுரிமை சட்டத்தை கையில் எடுத்துக் கொண்டு இல்லாத ஒன்றை சொல்லி போராட்டம், போராட்டம் என்று தூண்டி விடுகின்றனர். மீத்தேன், ஹைட்ரோ கார்பன் திட்டத்திற்கு அனுமதி அளித்தது தி.மு.க.. அதை தடுத்தவர் அம்மா. இதை சிந்தித்து பார்க்காமல் வெட்கம் இல்லாமல் இல்லாத ஒன்றை சொல்லி, பொய்யான ஒன்றை மக்கள் மனதில் விதைத்து அரசியல் ஆதாயம் தேட துடிக்கிறது தி.மு.க.. தமிழ் மக்கள் சிந்தித்து விடக்கூடாது என்று அற்ப புத்தியுடன் மக்களை திசைதிருப்புகிறது தி.மு.க

சிந்தாமல் சிதறாமல் புரட்சித் தலைவர் விட்டுச் சென்ற ஆட்சியை எப்படி சிறப்பாக புரட்சித் தலைவி வழி நடத்தி 6 – முறை முதல்வர் ஆனாரே அவரது வழியில் முதலமைச்சர் எடப்பாடியாரும், துணை முதலமைச்சர் ஓ.பன்னீர்செல்வமும் சிறந்த முறையில் ஒப்பற்ற ஆட்சியை நடத்தி தமிழகத்தில் 5 புதிய மாவட்டங்களை உருவாக்கியுள்ளனர். தமிழக மக்கள் அண்ணன் தம்பிகளாக, அக்கா தங்கையாக, மாமன் மச்சானாக ஒற்றுமையுடன் வாழ்ந்து வருகிறோம். தற்போது மக்கள் மத்தியில் பிளவு ஏற்படுத்தி அரசியல் ஆதாயம் தேடுபவர்கள் யார் என்று தமிழக மக்கள் புரிந்து கொள்ள வேண்டும். டெல்லியில் 20 பேர் உயிர் இழந்துள்ளனர்.

150 பேர் காயமடைந்து மருத்துமனையில் உள்ளனர். இதற்கு யார் காரணம் கூற முடியுமா? உச்ச நீதிமன்றத்தில் வழக்கு உள்ளது. விசாரித்து அவர்கள் யார் சரி, யார் தவறு என்று கூறுவார்கள் அப்படி இருக்கும் நிலையில் டெல்லியில் சுமூகமாக போராட்டம் நடைபெற்றது. கெஜிரிவால் வெற்றிபெற்று மத்திய அரசுடன் ஒத்துப் போவேன் என்று கூறிய பிறகு உயிர் பலி நடந்துள்ளது. எப்படி என்று பதில் சொல்ல யார் இருக்கிறார்கள்.

இறந்தவர்களுக்கு நம்மால் என்ன செய்ய முடியும். பணம் கொடுக்கலாம், வேலை கொடுக்கலாம். கணவனை இழந்த பெண்ணிற்கு என்ன செய்ய முடியும். கலவரத்தினை தூண்டி விடுவது எளிது. அதனால் விளையும் நஷ்டம் எவ்வளவு என்று சிந்திக்க வேண்டாமா? எனவே யார் எதை செய்ய நினைத்தாலும் நல்லது எது, சிறந்த வழி எது, என்பதை தெரிந்து, புரிந்து தமிழ் மக்கள் செயல்பட வேண்டும்.

இவ்வாறு அமைச்சர் ஓஎஸ்.மணியன் பேசினார்.

இக்கூட்டத்தில் முன்னாள் சட்டமன்ற உறுப்பினர்கள் பூராசாமி, சக்தி, மாவட்ட பொருளாளர் வா.செல்லையன், மாவட்ட மீனவரணி செயலாளர் நாகரத்தினம், மாவட்ட எம்.ஜி.ஆர். இளைஞரணி தலைவர் எம்.எஸ்.ராஜேந்திரன். முன்னாள் மாவட்ட ஊராட்சி குழு தலைவர் ஏ.கே.சந்திரசேகரன், ஒன்றிய எம்.ஜி.ஆர். இளைஞரணி அணி செயலாளர் என்.ஜி.திருமாறன், ஒன்றிய மகளிரணி செயலாளர் அஞ்சம்மாள் மணி, ஒன்றிய குழு உறுப்பினர் ரிமாராஜ்குமார், முன்னாள் நகரமன்ற தலைவர் இறை எழில், கழக வழக்கறிஞர் எஸ்.பி.நெடுஞ்செழியன், மற்றும் மாவட்ட, நகர, ஒன்றிய பேரூர், இளைஞர் பாசறை, இளம்பெண்கள் பாசறை, சார்பு அணிகள் மகளிரணியினர் கலந்துகொண்டனர். முடிவில் நகர சிறுபாண்மை பிரிவு எம்.பரக்கத் அலி நன்றி கூறினார்.