தற்போதைய செய்திகள்

வரும் தேர்தல்களில் கழகத்தின் வெற்றியை எந்த சக்தியாலும் தடுத்து நிறுத்த முடியாது – அமைச்சர் திண்டுக்கல் சி.சீனிவாசன் திட்டவட்டம்

திண்டுக்கல்:-

தமிழக மக்களின் நம்பிக்கையை தி.மு.க. இழந்து விட்டது. எனவே வரும் தேர்தல்களில் கழகத்தின் வெற்றியை எந்த சக்தியாலும் தடுத்து நிறுத்த முடியாது என்று அமைச்சர் திண்டுக்கல் சி.சீனிவாசன் கூறினார்.

புரட்சித்தலைவி அம்மா அவர்களின் 72-வது பிறந்தநாள் விழா, மற்றும் பட்ஜெட் விளக்க பொதுக்கூட்டம் திண்டுக்கல்லில் மாவட்ட கழக செயலாளரும், திண்டுக்கல் மாவட்ட மத்திய கூட்டுறவு வங்கி தலைவருமான வி.மருதராஜ் தலைமையில் நடைபெற்றது.

பகுதி செயலாளர்கள் மோகன், சேசு, சுப்பிரமணி ஆகியோர் முன்னிலை வகித்தனர். ஒன்றிய கழக செயலாளர் ஜெயசீலன், அபிராமி கூட்டுறவு பண்டக சாலை தலைவர் பாரதி முருகன், துணைத்தலைவர் வி.டி.ராஜன் ஆகியோர் வரவேற்றனர். மாவட்ட கழக துணை செயலாளரும், வேடசந்தூர் தொகுதி சட்டமன்ற உறுப்பினருமான டாக்டர் வி.பி.பரமசிவம், தலைமை கழக பேச்சாளர்கள் கோபாலகிருஷ்ணன், டி.கே.அமுல் கந்தசாமி ஆகியோர் பேசினர்.

இக்கூட்டத்தில் வனத்துறை அமைச்சர் திண்டுக்கல் சி.சீனிவாசன் பேசியதாவது:-

1972-ல் புரட்சித்தலைவர் எம்.ஜி.ஆர். திமுகவில் கணக்கு கேட்டதால் கட்சியில் இருந்து நீக்கப்பட்டார். இதையடுத்து அதிமுகவை அவர் தொடங்கினார். அவர் உயிரோடு இருக்கும் வரை முதலமைச்சராக இருந்து மறைந்தார். அவருக்குப்பின் புரட்சித்தலைவி அம்மா 6 முறை முதல்வராக இருந்து சிறப்பான ஆட்சியை மக்களுக்கு தந்தார். அம்மா மறைவுக்குப்பின் புரட்சித்தலைவர், புரட்சித்தலைவி அம்மா ஆகியோரின் ஆசியோடு எடப்பாடி கே.பழனிசாமி முதல்வரானார்.

அம்மா மறைவுக்கு பின் கழக ஆட்சியை கவிழ்க்க ஸ்டாலின் பல்வேறு முயற்சிகளை கையாண்டார். அத்தனையும் தோல்வியில்தான் முடிந்தது. தினகரனோடு சேர்ந்து கூட்டு சதி செய்து ஆட்சியை கவிழ்க்க நம்பிக்கை இல்லா தீர்மானம் கொண்டு வர செய்து அது தோல்வியில் முடிந்தது. அவர்களை நம்பி சென்ற 18 எம்எல்ஏக்கள் இன்று நடுத்தெருவில் நிற்கின்றனர். ஸ்டாலின், தினகரன் நயவஞ்சக புத்தி தோற்றுப்போனது.

முதல்வரும், துணை முதல்வரும் சிறப்பாக ஆட்சி நடத்தி வருகின்றனர். கடந்த சட்டசபை கூட்டத்தொடரில் துணை முதல்வர் அருமையான பட்ஜெட்டை தாக்கல் செய்தார். இதனை அனைவரும் பாராட்டினர். விவசாயத்துக்கு ஏராளமான திட்டங்கள், பாசன திட்டத்திற்கு குறிப்பிடத்தக்க அளவில் நிதி ஒதுக்கீடு செய்யப்பட்டுள்ளது எனக்கூறி அதனை ராமதாஸ் வரவேற்றுள்ளார். ஜி.கே.வாசன் வரவேற்றுள்ளார்.

தமிழ், ஆங்கில நாளேடுகள் வரவேற்று பாராட்டி எழுதி உள்ளன. பல்வேறு சங்கங்கள் இந்த நிதிநிலை அறிக்கையை பாராட்டி உள்ளது. நல்ல இதயம் படைத்தவர்கள் பாராட்டி உள்ளனர். ஆனால் ஸ்டாலின் குறை கூறுகிறார்.பஞ்சரான டயர் ராஜகண்ணப்பனை வைத்து திமுக அரசியல் செய்கிறது. அவரை வைத்துத்தான் 37 எம்பிக்களை பெற்ற மாதிரியும், ஆட்சியைப் பிடித்த மாதிரியும் ஸ்டாலின் பிதற்றுகிறார். ராஜகண்ணப்பன் இருந்தால் என்ன? இல்லாமல் போனால் என்ன? கழத்திற்கு எவ்வித பாதிப்பும் இல்லை.

கடந்த நாடாளுமன்ற தேர்தலின் போது தங்க நகை கடன் தள்ளுபடி செய்யப்படும் எனக்கூறி தமிழக மக்களை ஏமாற்றி தான் திமுக வெற்றி பெற்றது. அடுத்து நடைபெற்ற வேலூர் நாடாளுமன்ற தேர்தலில் திமுக வெறும் 8000 வாக்கு வித்தியாசத்தில் தான் வெற்றி பெற்றது. அதிலும் மூன்று தொகுதிகளை அதிமுக கைப்பற்றியுள்ளது.

அதற்கு அடுத்து நடைபெற்ற விக்கிரவாண்டி, நாங்குநேரி இடைத்தேர்தலில் கழகம் அமோக வெற்றியை பெற்றது. திண்டுக்கல் நாடாளுமன்ற தொகுதியில் திமுக வெற்றி பெற்றாலும் நிலக்கோட்டை தொகுதியில் கழகம் மகத்தான வெற்றியை பெற்றது. தமிழ்நாட்டை யார் ஆளவேண்டும்? என்பதற்காக மக்கள் இரட்டை இலைக்கு தான் தான் வாக்களித்துள்ளனர். உள்ளாட்சி தேர்தலிலும் சரிசமமான வெற்றியை பெற்றுள்ளது.

அகதிகள் போர்வையில் தீவிரவாதிகள் நம்நாட்டில் வந்து விடக்கூடாது என்பதற்காகத்தான் குடியுரிமை திருத்த சட்டம் கொண்டு வரப்பட்டு உள்ளது. அதனால் தான் கழகம் அதனை ஆதரித்தது. இந்தியாவில் ஒரு இஸ்லாமியர்களுக்கு கூட இச்சட்டத்தால் பாதிப்பு இல்லை. தமிழகத்தில் இந்துக்கள், இஸ்லாமியர்கள், கிறிஸ்தவர்கள் எல்லோரும் ஒற்றுமையாக உள்ளனர். ஆனால் ஸ்டாலின் இஸ்லாமியர்களை போராட்டம் நடத்த தூண்டி விடுகிறார். டெல்லியில் நடைபெற்ற கலவரத்தில் உயிரிழந்தோரை பார்க்கும்போது நெஞ்சம் பதை பதைக்கிறது.

அவர்களின் குடும்பங்கள் நிராகதியாக உள்ளது. அதே போன்று தமிழகத்தில் நடக்க வேண்டும் என ஸ்டாலின் கனவு காண்கிறார். அவரது கனவு நிச்சயம் பலிக்காது. இஸ்லாமியர்களுக்கு பாதிப்பு ஏற்பட்டால் அதனை எதிர்க்கும் முதல் இயக்கமாக அதிமுக இருக்கும். அண்ணன் தம்பிகளாக உறவினர்களாக உள்ளவர்களை பிரிக்க நினைக்கின்றனர். அவர்களின் நாடகத்தை நம்பாதீர்கள். டெல்லி கலவரம் போல தமிழகத்தில் வரவிடாமல் தடுக்க வேண்டியது நமது கடமை.

இந்தியாவிலேயே தமிழகம் நிர்வாகத்தில் முதன்மை மாநிலமாக திகழ்கிறது. இந்தியாவிலேயே தமிழகம் பல்வேறு துறைகளில் சிறப்பாக செயல்பட்டு வருவதால் மத்திய அரசிடமிருந்து விருதை பெற்றுள்ளது. எங்கும் ஊழல் இல்லாத ஆட்சியாக சிறப்பான ஆட்சியை முதல்வரும், துணை முதல்வரும் நடத்தி வருகின்றனர். வரக்கூடிய நகராட்சி, பேரூராட்சி தேர்தலில் நமக்குள் உள்ள குறைகளை நிவர்த்தி செய்து விட்டால் நமது வெற்றியை எந்த சக்தியாலும் தடுக்க முடியாது.

இவ்வாறு அமைச்சர் திண்டுக்கல் சி.சீனிவாசன் பேசினார்.

கூட்டத்தில் மாவட்ட எம்.ஜி.ஆர். மன்ற செயலாளர் திவான் பாட்சா, இளைஞரணி செயலாளர் சரவணன், தொழிற்சங்க செயலாளர் ஜெயராமன், பாசறை செயலாளர் ஆனந்தகுமார், மாவட்ட எம்.ஜி.ஆர். மன்ற இணை செயலாளர் ராஜேந்திரன், முன்னாள் தொகுதி கழக இணை செயலாளர் பழனிசாமி, மாவட்ட கூட்டுறவு ஒன்றிய தலைவர் சி.எஸ் ராஜ்மோகன், நகர கூட்டுறவு வங்கி தலைவர் பிரேம், அகரம் பேரூர் கழக செயலாளர் சக்திவேல் உள்ளிட்ட கழக நிர்வாகிகள் ஏராளமானோர் கலந்து கொண்டனர். கூட்டத்தில் 650 பேருக்கு நலத்திட்ட உதவிகளை வனத்துறை அமைச்சர் திண்டுக்கல் சீனிவாசன் வழங்கினார்.