தற்போதைய செய்திகள்

வேலை வெட்டி இல்லாதவர்கள் தான் அரசை குறை கூறுவார்கள் – அமைச்சர் ஆர்.பி.உதயகுமார் கடும் தாக்கு

மதுரை:-

வேலை வெட்டி இல்லாதவர்கள் தான் அரசை குறை கூறுவார்கள் என்று அமைச்சர் ஆர்.பி.உதயகுமார் கூறினார்.

மதுரை மாவட்ட ஆட்சியர் அலுவலகத்தில் புதிதாக கட்டப்பட்டுள்ள ஆட்சித்தலைவர் அலுவலகத்தை வருவாய் மற்றும் பேரிடர் மேலாண்மை மற்றும் தகவல் தொழில்நுட்பவியல்துறை அமைச்சர் ஆர்.பி.உதயகுமார் நேரில் பார்வையிட்டு ஆய்வு செய்தார். அவருடன் மற்றும் வருவாய் நிர்வாக ஆணையர் டாக்டர் ஜெ.ராதாகிருஷ்ணன், பேரிடர் மேலாண்மை இயக்குனர் ஜெகநாதன், மாவட்ட ஆட்சித் தலைவர் வினய், மாவட்ட வருவாய் அலுவலர் செல்வராஜ் மற்றும் கோட்டாட்சியர்கள், வட்டாட்சியர்கள் உடன் சென்றனர்.

இதன்பின்னர் அமைச்சர் ஆர்.பி.உதயகுமார் செய்தியாளர்களிடம் கூறியதாவது:-

மதுரை மண்ணுக்கு எய்ம்ஸ் மருத்துவமனையை கொண்டு வந்தது போல் இன்றைக்கு ஒரே ஆண்டில் 11 மருத்துவ கல்லூரிகளுக்கு மத்திய அரசிடம் சிறப்பு அனுமதி பெற்று தந்துள்ளோம். முதல் கட்டமாக ராமநாதபுரம், விருதுநகர் மாவட்டத்தில் மருத்துவக் கல்லூரிகளுக்கு அடிக்கல் நாட்ட வருகை தந்த முதலமைச்சர் எடப்பாடி கே.பழனிசாமிக்கு வழியெங்கும் லட்சக்கணக்கான மக்கள் வரவேற்பு அளித்து நன்றி தெரிவித்தனர்.

இதன்மூலம் தெற்கு ஆசியாவிலேயே மருத்துவ தலைநகராக தமிழகத்தை உருவாக்கிய முதலமைச்சருக்கு கழக அம்மா பேரவையின் சார்பில் நன்றி தெரிவித்து தீர்மானம் நிறைவேற்றப்பட்டது. இதுபோன்ற சாதனை திட்டங்களை மக்களிடம் கொண்டு சேர்க்கும் புனித பணியை கழக அம்மா பேரவை செயலாற்றும் என்று சூளுரை ஏற்கப்பட்டது

மதுரை மாவட்டத்திற்கு கூடுதலாக ஆட்சியர் அலுவலக கட்டிடம் நீண்ட காலம் நிலுவையில் இருந்து வந்ததது. இதனை தாயுள்ளத்தோடு அறிந்துகொண்ட நமது முதலமைச்சர் புரட்சித்தலைவர் எம்ஜிஆர் நூற்றாண்டு விழாவினையொட்டி மதுரை, ஈரோடு, நாமக்கல் ஆகிய மாவட்டங்களுக்கு புதிதாக மாவட்ட ஆட்சியர் அலுவலகம் அமைக்க சட்டமன்றத்தில் 110 விதியின் கீழ் அறிவித்தார். அதோடு தனது பொற்கரங்களால் இத்திட்ட பணியை தொடங்கி வைத்தார்.

மதுரை மாவட்ட ஆட்சியர் கூடுதல் கட்டடத்திற்கு ஏற்கனவே 20 கோடி ரூபாய் ஒதுக்கப்பட்டது. தற்போது கூடுதலாக ரூ.10 கோடி ஒதுக்கப்பட்டுள்ளது. மொத்தம் 30 கோடியில் திட்டப்பணிகள் நடைபெற்று தற்போது முடியும் தருவாயில் உள்ளது. விரைவில் இதனை மக்கள் பயன்பாட்டிற்காக முதலமைச்சரும், துணை முதலமைச்சரும் திறந்து வைக்க உள்ளனர்.

11 மருத்துவ கல்லூரி அமைவதன் மூலம் கூடுதலாக மாணவர் சேர்க்கையும் அதனைத்தொடர்ந்து மக்களுக்கு உயர்தரமான சிகிச்சையும் கிடைக்கும். திமுகவில் குழப்பம் இருப்பதால்தான் முன்கூட்டியே ராஜ்யசபா வேட்பாளர்களை அறிவித்துள்ளனர். தேர்தல் தேதியை அறிவித்தவுடன் அதிமுக தலைமை கழகம் அறிவிக்கும்.

அம்மா அரசின் செயல்பாடுகளை திசைதிருப்பும் வகையில் வேலை வெட்டி இல்லாத எதிர்க்கட்சிகள் தான் பொய் பிரச்சாரம் மூலம் குறை கூறுகின்றனர். கேரளா, ஆந்திரா, தெலுங்கானா உள்ளிட்ட மாநிலங்களில் ஒரே ஆண்டில் 11 மருத்துவ கல்லூரிகளை உருவாக்கியது உண்டா என்பதை எதிர்க்கட்சிகள் நினைத்துப் பார்க்க வேண்டும். காய்த்த மரத்துக்கு தான் கல் அடிபடும் என்பதை போல் எதிர்க்கட்சிகள் பொய் பிரச்சாரத்தை மக்கள் நம்ப மாட்டார்கள்.

இவ்வாறு அமைச்சர் ஆர்.பி.உதயகுமார் கூறினார்.

இதனைத்தொடர்ந்து வாடிப்பட்டி, உசிலம்பட்டி, திருமங்கலம், ஆகிய தாலுகா அலுவலகத்திலும், மதுரை மாவட்ட ஆட்சியர் அலுவகத்திலும் அமைச்சர் ஆர்.பி.உதயகுமார் தலைமையில் ஆய்வுக்கூட்டம் நடைபெற்றது.

இக்கூட்டத்தில் அமைச்சர் ஆர்.பி.உதயகுமார் பேசியதாவது:- 

திங்கட்கிழமை தோறும் மாவட்ட ஆட்சியர் அலுவலகத்தில் குறை தீர்க்கும் முகாம், இரண்டாது புதன்கிழமை தோறும் மக்கள் தொடர்பு முகாம், வெள்ளிக்கிழமை தோறும் அம்மா திட்டம், மேலும் முதலமைச்சர் சிறப்பு குறை தீர்க்கும் முகாம் என பல்வேறு மனுக்கள் வருகின்றன. இதற்கு வருவாய் துறை அலுவலர்கள் சிறப்பாக தங்கள் பணியினை மேற்கொண்டு வருகிறீர்கள்.

மேலும் நத்தம் புறம்போக்கு பகுதியில் வசிக்கும் மக்களுக்கு பட்டா வழங்கிட வேண்டும். அதேபோல் நீர்நிலைகளில் வசிக்கும் மக்களுக்கு மாற்று இடத்தை நீங்கள் உருவாக்கி தர வேண்டும். முதியோர் ஓய்வூதிய திட்டத்தில் கூடுதலாக 5 லட்சம் நபர்களுக்கு வழங்க முதலமைச்சர் அறிவித்து நிதி ஒதுக்கி உள்ளார்.

ஏற்கனவே திமுக ஆட்சி காலத்தில் இத்திட்டத்திற்கு 1200 கோடி மட்டும்தான் ஒதுக்கப்பட்டது, அதன்பின் அம்மா அவர்கள் படிப்படியாக உயர்த்தி கொடுத்தார், கடந்த நிதிநிலை அறிக்கையில் இத்திட்டத்திற்காக 3900 கோடி ஒதுக்கப்பட்டது, தற்போது இந்த நிதிநிலை அறிக்கையில் இத்திட்டத்திற்காக 4350 கோடி ஒதுக்கப்பட்டுள்ளது. ஆகவே முதியோர் ஓய்வூதிய திட்டத்தில் தகுதியுள்ள நபர்கள் யாரும் விடாமல் அவர்களுக்கு வழங்கிடும் பணியை மேற்கொள்ள வேண்டும்.

முதியோர் ஓய்வூதியத் திட்டத்திலும் சரி , வீட்டுமனை பட்டா வழங்குவதிலும் சரி, உழவர் பாதுகாப்பு திட்டத்தில் சரி, எந்த திட்டமானாலும் மதுரை மாவட்டம் தான் ஒரு முன்மாதிரியாக திகழ்ந்து சிறப்பாக செயல்பட்டது என்ற நல்ல பெயரை நீங்கள் உருவாக்கித் தரவேண்டும். மக்கள் சந்தோஷமாக வந்து செல்லும் இடமாக வட்டாட்சியர் அலுவலகம் திகழும் வகையில் நீங்கள் உருவாக்கிட வேண்டும்.

இவ்வாறு அமைச்சர் ஆர்.பி.உதயகுமார் பேசினார்.