சிறப்பு செய்திகள்

அர்ப்பணிப்போடு செயல்படுங்கள்: பேச்சாளர்களுக்கு முதல்வர் அறிவுரை

சென்னை

அர்ப்பணிப்போடு செயல்படுங்கள் என்று பேச்சாளர்களுக்கு முதல்வர் அறிவுரை வழங்கினார்.

புரட்சித் தலைவி அம்மா அவர்களின் 72-வது பிறந்த நாள் விழாவை முன்னிட்டு சென்னையில் கழக இலக்கிய அணி சார்பில் நடைபெற்ற சொல்வோம் – வெல்வோம் சிறப்பு பயிற்சிப் பட்டறை நிகழ்ச்சியில் நேற்று தமிழ்நாடு முதலமைச்சர் எடப்பாடி கே. பழனிசாமி பேசியதாவது.

இதயதெய்வம் புரட்சித் தலைவி அம்மா தெய்வத்தை வணங்கி

இதயதெய்வம் புரட்சித் தலைவி அம்மா அவர்களுடைய 72-வது பிறந்த நாள் விழாவை முன்னிட்டு கழக இலக்கிய அணி சார்பாக “”””சொல்வோம், வெல்வோம்”” சிறப்புப் பயிற்சிப் பட்டறை பொருத்தமான தலைப்பிலே இன்றைய தினம் இந்த நிகழ்ச்சி நடைபெற்றுக் கொண்டிருக்கின்றது.

பொருத்தமான தலைப்பு

இன்றைக்கு பொருத்தமான நேரத்திலே, பொருத்தமான தலைப்பிலே இந்த சிறப்பு பயிற்சிப் பட்டறை இங்கே துவக்கப்படுகிறது. எனக்கு முன்னாலே மரியாதைக்குரிய கழக இலக்கிய அணி செயலாளர் குறிப்பிட்டதைப் போல, 2021 தேர்தலுக்கு இன்னும் ஒரு வருடகாலம் தான் இருக்கிறது. அந்தத் தேர்தலிலே, அரசு போட்ட திட்டங்களை நாட்டு மக்களுக்கு எப்படி எடுத்து வைப்பது, எப்படிச் சொல்வது, அதேபோல, எதிரிகள் நம்மைப் பற்றி விமர்சனம் செய்யும்போது, அதை நாகரிகமான முறையிலே பொதுக்கூட்டத்திலே எப்படி பேசுவது என்பதைப் பற்றிதான் இந்தப் பயிற்சிப் பட்டறையிலே விளக்குவதற்குத் தான் உங்களையெல்லாம் அழைத்திருக்கின்றார்கள்.

கழகத்தின் இதயம்

பேச்சாற்றல் என்பது ஒரு கழகத்திற்கு இதயம் போன்றது. ஆகவே, பேச்சாற்றல் வலிமையாக இருந்தால் தான் அந்தக் கட்சி வலிமை பெறும், ஆட்சி சிறக்கும். அரசாங்கம் போடுகின்ற திட்டமாகட்டும், கட்சியின் கொள்கைகள் ஆகட்டும் மக்களிடத்திலே கொண்டு போய் சேர்ப்பவர்கள் பேச்சாளர்கள். அப்படி உயர்ந்த இடத்திலிருக்கின்ற பேச்சாளர்கள், தெளிவாக அரசு போடுகின்ற திட்டங்களை தெரிந்து கொள்ள வேண்டும்.

கொள்கை

கட்சியினுடைய கொள்கைகள் முழுமையாக தெரிந்து மேடையிலே பேச வேண்டும். ஏனென்றால், வேண்டுமென்றே திட்டமிட்டு எதிர்க்கட்சியைச் சேர்ந்தவர்கள் அவதூறான பிரச்சாரத்தை பரப்பிக் கொண்டிருக்கிறார்கள். இன்றைக்கு, இந்தியாவிலேயே திறமை மிக்க மாநிலம், முதல் மாநிலம் என்ற பெயர் பெற்றிருக்கின்றது நம் மாநிலம், முதலிடத்திலே இருக்கின்றோம். பல்வேறு துறைகளில் சாதனைகள் பெற்று தேசிய அளவில் விருதுகளை குவிக்கின்றோம்.

நிர்வாக திறமை மிக்க அரசு

மாநிலத்தில் முதலிடம் வகிக்கின்ற அளவிற்கு நம்முடைய நிர்வாகம் திறமை மிக்க அரசாக இன்றைக்கு செயல்பட்டுக் கொண்டிருக்கிறது. பொன்மனச் செம்மல் புரட்சித் தலைவர் எம்.ஜி.ஆர் அவர்கள், இதயதெய்வம் புரட்சித் தலைவி அம்மா அவர்கள், இருபெரும் தலைவர்கள் என்னென்ன கனவு கண்டார்களோ, அவர்கள் மறைந்தாலும், அவர்களுடைய கனவை நனவாக்க இன்றைக்கு பல்வேறு திட்டங்களை செயல்படுத்திக் கொண்டிருக்கின்ற அரசு அம்மாவினுடைய அரசு என்பதை நீங்கள் மக்களுக்கு எடுத்துச் சொல்ல வேண்டும்.

இதயதெய்வம் புரட்சித் தலைவி அம்மா அவர்கள் 2011, 2016 இரண்டு தேர்தல்களிலுமே புரட்சித் தலைவி அம்மா அவர்கள் மக்களுக்கு கொடுத்த வாக்குறுதி, கழகத்தின் சார்பாக அறிவிக்கப்பட்ட அறிவிப்புகள் இன்றைக்கு அம்மாவினுடைய அரசால் நிறைவேற்றப்பட்டிருக்கிறது. அம்மாவும் நிறைவேற்றினார்கள், அம்மா மறைவிற்குப் பிறகு அம்மா அறிவித்த அத்தனை அறிவிப்புகளையும் நாம் நடைமுறைப்படுத்திக் கொண்டிருக்கின்றோம்.

மக்களிடம் எடுத்துச் சொல்ல வேண்டும்

இதையெல்லாம் நாட்டு மக்களிடத்தில் எடுத்துச் சொல்ல வேண்டும். மற்ற மாநிலங்களில் நடைமுறைப்படுத்தாத திட்டங்களையெல்லாம் இன்றைக்கு நாம் நடைமுறைப்படுத்திக் கொண்டிருக்கிறோம். எதிரிகள் வேண்டுமென்றே திட்டமிட்டு அவதூறான பிரச்சாரம், பொய்ப் பிரச்சாரம் செய்கிறார்கள்.

கிராமத்தில் சொல்வார்கள், பொய்யை பொருந்துகிற மாதிரி சொல்லிக்கொண்டே இருந்தால், மெய் திருதிரு என முழிக்கும் என்பார்கள். அதுபோல, ஒரு பொய்யை திருப்பி, திருப்பி மக்களிடத்தில் எடுத்துச் சொல்கின்றபொழுது, மக்களுக்கு ஒரு சந்தேகம் ஏற்படும். அதைத்தான் இப்பொழுது எதிர்க்கட்சியினர் செய்து கொண்டிருக்கிறார்கள்.

அரசின் திட்டங்கள்

அதை முறியடிக்க வேண்டிய கடமை நம் பேச்சாளர்களுக்கு இருக்கிறது. ஆகவே, இன்றைக்கு தலைமைக் கழகத்தின் மூலமாக கொடுக்கப்படுகின்ற அறிவிப்புகள், வெளியிடுகின்ற அறிவிப்புகள், அதேபோல, அரசால் போடுகின்ற திட்டங்கள் முழுமையாக செயல்படுத்த வேண்டுமென்று அன்போடு இந்த நேரத்தில் கேட்டுக் கொள்கின்றேன்.

இன்றைய தினம் கூட பல ஆண்டுகாலமாக டெல்டா மாவட்டங்களில் உள்ள விவசாயப் பெருங்குடி மக்களும், பொதுமக்களும் தங்களது உரிமைக்காக குரல் கொடுத்து வந்தார்கள். அந்த உரிமைக் குரலை நிறைவேற்றிய அரசு அம்மாவினுடைய அரசு. பாதுகாக்கப்பட்ட வேளாண் மண்டலம் என்ற அறிவிப்பை கொடுத்து, அங்கிருக்கின்ற விவசாயிகளுக்கும், பொதுமக்களிடத்திலே பால் வார்த்தது அம்மாவினுடைய அரசு, அனைத்திந்திய அண்ணா திராவிட முன்னேற்றக் கழக இயக்கம் என்பதை நீங்கள் எடுத்துச் சொல்ல வேண்டும்.

பொதுப்பணித் துறையில் ஏராளமான திட்டங்கள்

சுகாதாரத் துறையில், பொதுப்பணித் துறையில் ஏராளமான திட்டங்கள், புதியபுதிய தொழிற்சாலைகள் தமிழ்நாட்டில் வந்து கொண்டிருக்கின்றன. வேண்டுமென்றே திட்டமிட்டு தமிழகத்தில் எந்த பணியும் நடைபெறவில்லை என்ற ஒரு தவறான தோற்றத்தை இன்றைக்கு பரப்பி வருகிறார்கள், அதையெல்லாம் முறியடிக்கின்ற வேலையில் நீங்கள் ஈடுபட வேண்டும். இன்றைக்கு சொல்வோம், அரசாங்கள் போடுகின்ற திட்டங்களையும், நம்முடைய கட்சியின் பணிகளையும் மக்களிடத்தில் சொல்வோம், வெல்வோம், பல்வேறு திட்டங்களை நாட்டு மக்களுக்கு எடுத்துச் சொல்வோம், தீய சக்திகளை வெல்வோம்.

அதிமுக மட்டுமே நிலைத்து நின்று ஆட்சி செய்யும்

2021-ல் இதயதெய்வம் புரட்சித் தலைவி அம்மா அவர்கள் கண்ட கனவு, எனக்குப் பின்னாலும் இன்னும் நூறாண்டு காலம் அனைத்திந்திய அண்ணா திராவிட முன்னேற்றக் கழகம் இருக்கும் என்று சொன்னார்கள். ஆட்சி அதிகாரத்திலே அம்மா தொடர்ந்து ஆண்ட கட்சி மீண்டும் ஆளுகின்ற நிலையை ஏற்படுத்தினார்கள். அதைத் தொடர்ந்து தொன்றுதொட்டு இன்றைக்கு அனைத்திந்திய அண்ணா திராவிட முன்னேற்றக் கழகம் தான் நிலைத்து நின்று ஆட்சி செய்யும் என்ற நிலைபாட்டை 2021-ல் நாம் சாதனை படைக்க வேண்டும்.

அர்ப்பணிப்போடு செயல்படுங்கள்

பொன்மனச் செம்மல் புரட்சித்தலைவர் காலத்திலிருந்து, அம்மா காலத்திலிருந்து இன்று வரைக்கும் மேடையிலே ஏறி பேசக்கூடிய நல்ல பேச்சாளர்கள், நல்ல கருத்தை எடுத்துரைக்க வேண்டும். அதுமட்டுமல்ல, நீங்கள் ஒரு சாதாரண பேச்சாளராக இருந்தால் கூட, நாடாளுமன்ற, சட்டமன்ற உறுப்பினர்களுக்கு இணையாக உங்கள் பெயரை பத்திரிகையில் பொறிக்கின்றார்கள். அதைவிட நமக்கு என்ன பாக்கியம் வேண்டும்? ஆகவே, இந்த இயக்கத்திற்காக பாடுபடுங்கள், அரசுக்காக பாடுபடுங்கள், மக்களுக்காக பாடுபடுங்கள். ஆகவே, “”””சொல்வோம் வெல்வோம்”” 2021-ல் வென்று ஆட்சி தொடர நீங்கள் அர்ப்பணிப்போடு செயல்பட வேண்டும்.இவ்வாறு பேசினார்.