திருவண்ணாமலை

கார்த்திகை தீபத் திருவிழா -அண்ணாமலையார் கோயிலில் ரூ.2.25 கோடி உண்டியல் வசூல்

திருவண்ணாமலை

கார்த்திகை தீபத் திருவிழாவையொட்டி திருவண்ணாமலை அண்ணாமலையார் கோயிலில் உண்டியல் மூலம் ரூ.2.25 கோடி காணிக்கையாக கிடைத்தது.திருவண்ணாமலை அண்ணாமலையார் கோயிலில் ஒவ்வொரு ஆண்டும் கார்த்திகை தீப திருவிழா 10 நாட்கள் சிறப்பாக கொண்டாடப்படுவது வழக்கம். அதன்படி இந்த ஆண்டு கார்த்திகை தீபத்திருவிழா கடந்த 1-ந் தேதி கொடியேற்றத்துடன் தொடங்கியது.

விழாவின் முக்கிய திருவிழாவான கார்த்திகை தீபத் திருவிழா 10-ந் தேதி கொண்டாடப்பட்டது. அன்று அதிகாலை 4 மணிக்கு கோயிலில் பரணி தீபமும் மாலை 6 மணிக்கு கோயில் பின்புறமுள்ள 2668 அடி உயரமுள்ள மலையில் மகாதீபம் ஏற்றப்பட்டது. இதில் இந்தியா முழுவதிலுமிருந்து சுமார் 35 லட்சத்திற்கும் மேற்பட்ட பக்தர்கள் கலந்து கொண்டு சாமி தரிசனம் செய்தனர்.

அண்ணாமலையார் கோயிலில் ஒவ்வொரு மாதமும் பவுர்ணமி முடிந்ததும் உண்டியல் காணிக்கை எண்ணப்படுவது வழக்கம். அதன்படி இந்த ஆண்டு கார்த்திகை தீபம் முடிவடைந்ததும் உண்டியல் காணிக்கை எண்ணும் பணி திருவண்ணாமலை அண்ணாமலையார் கோயில் திருக்கல்யாண மண்டபத்தில் நடந்தது. கோயில் இணை ஆணையர் ஞானசேகர் மேற்பார்வையில் நடைபெற்ற இப்பணியில் சுமார் 290 பேர் ஈடுபட்டனர். இதில் ரூ.2 கோடியே 25 லட்சத்து 62 ஆயிரத்து 155ம், 292 கிராம் தங்கம் 2684 கிராம் வெள்ளி காணிக்கையாக கிடைத்தது.