சிறப்பு செய்திகள்

கொரோனா வைரஸ் நோய்க்கு மருந்து கண்டுபிடியுங்கள்: மருத்துவர்களுக்கு முதல்வர் வேண்டுகோள்

சென்னை

கொரோனா வைரஸ் நோய்க்கு மருந்து கண்டுபிடியுங்கள் என்று மருத்துவர்களுக்கு முதல்வர் வேண்டுகோள் விடுத்து பேசினார்.

தமிழ்நாடு முதலமைச்சர் எடப்பாடி கே.பழனிசாமி சென்னையில் தமிழ்நாடு சுகாதார சீரமைப்பு திட்டத்தை துவக்கி வைத்து பேசியதாவது.

குழந்தைகள் இறப்பு விகிதம் குறைவு

நீடித்து நிலைக்கக்கூடிய வளர்ச்சி குறியீடுகளில், அம்மாவின் அரசு எடுத்து வரும் முயற்சிகளால் தமிழ்நாட்டில் தாய்மார்கள் இறப்பு விகிதம் மற்றும் குழந்தைகள் இறப்பு விகிதம் தொடர்ந்து குறைந்து வருகிறது. இந்திய அளவில் தமிழ்நாடு முன்னிலை மாநிலமாக இருந்து வருகிறது. மாண்புமிகு அம்மாவும், அவரை தொடர்ந்து அம்மாவின் அரசும் சுகாதாரத் துறை மூலம் சிறப்பான மருத்துவ சேவைகளை வழங்கி வருவதால் நமது மாநிலத்தில் கர்ப்பிணி தாய்மார்களின் இறப்பு விகிதம் ஒரு லட்சம் பிரசவத்திற்கு 67-ஆகவும், சிசு இறப்பு விகிதம் ஆயிரம் குழந்தை பிறப்பிற்கு 16-ஆகவும் உள்ளது.

தேசிய அளவில் முறையே 122 மற்றும் 30-ஆக உள்ளதை விட தமிழ்நாட்டில் இவ்விகிதம் மிகவும் குறைவாக உள்ளது அம்மாவின் அரசின் சாதனையாகும். மேலும் 2030-ஆம் ஆண்டுக்குள் தாய்மார்கள் இறப்பு விகிதத்தை 30-ஆக குறைப்பதே அம்மா அரசின் குறிக்கோளாகும்.

அனைத்து மாவட்டங்களிலும் மருத்துவக் கல்லூரிகள்

மருத்துவக் கல்லூரி இல்லாத மாவட்டங்களில் படிப்படியாக ஒரு அரசு மருத்துவக் கல்லூரியை ஏற்படுத்தவேண்டும் என்பது புரட்சித் தலைவி அம்மா அவர்கள் அரசின் கொள்கையாகும். இது சம்பந்தமாக நாங்கள் ஒரு சரித்திர சாதனையை நிகழ்த்தி உள்ளோம். 11 மாவட்டங்களில் 11 புதிய அரசு மருத்துவக் கல்லூரிகள், 3 ஆயிரத்து 995 கோடி ரூபாய் மதிப்பீட்டில் நிறுவிட மத்திய அரசின் ஒப்புதல் பெறப்பட்டுள்ளது. 1.3.2020 அன்று இரண்டு மருத்துவ கல்லூரிகளுக்கு நான் அடிக்கல் நாட்டியுள்ளேன்.

அதிக நிதி

இந்தியாவிலேயே, தமிழ்நாட்டில் மட்டும் தான் கர்ப்பிணித் தாய்மார்களுக்கு டாக்டர் முத்துலட்சுமி ரெட்டி மகப்பேறு நிதி உதவித் திட்டத்தின் கீழ் உயர்ந்த அளவாக 18,000 ரூபாய் நிதி உதவி வழங்கப்படுகிறது. இந்த திட்டத்தில் இதுவரை 53.78 இலட்சம் கர்ப்பிணித் தாய்மார்கள் 5 ஆயிரத்து 223 கோடி ரூபாயை நிதி உதவியாக பெற்றுள்ளனர். அண்டை மாநிலங்களும் நமது திட்டத்தை பின்பற்ற தொடங்கி உள்ளன.

உயர்தர மருத்துவ சிகிச்சை

நமது மாநிலத்தில் பொது மற்றும் தனியார் கூட்டு முயற்சியின் மூலம், ஏழை எளிய மக்கள் உயர்தர மருத்துவ சிகிச்சையை கட்டணமின்றி பெற முதலமைச்சரின் விரிவான மருத்துவக் காப்பீட்டுத் திட்டம் ஜனவரி 2012 முதல் செயல்படுத்தப்பட்டு வருகிறது. இத்திட்டத்தில் 1027 மருத்துவ மற்றும் சிகிச்சை முறைகளுக்கு சிகிச்சை அளிக்கப்படுகிறது. இதுவரை, 42 இலட்சம் பயனாளிகள், 6 ஆயிரத்து 740 கோடி ரூபாய் மதிப்பீட்டில் சிகிச்சை பெற்றுள்ளனர். மேலும் இத்திட்டத்துடன் மத்திய அரசின் பிரதான் மந்திரி ஜன் ஆரோக்ய யோஜனா இணைக்கப்பட்டு, தற்போது ஒரு குடும்பத்திற்கு 5 லட்சம் ரூபாய் வரை காப்பீடு அளிக்கப்படுகிறது.

உடல் உறுப்பு மாற்று அறுவை சிகிச்சையில் தொடர்ந்து முதலிடம்

இறந்தவர்களின் உடல் உறுப்பு மாற்று அறுவை சிகிச்சை திட்டத்தை அம்மாவின் அரசு திறம்பட செயல்படுத்தி வருகிறது. தமிழ்நாடு மாற்று அறுவை சிகிச்சை ஆணையத்தை நிறுவி, இந்த திட்டம் சிறப்பாக செயல்படுத்தப்படுகிறது. உடல் உறுப்பு மாற்று அறுவைச் சிகிச்சை திட்டத்தை செயல்படுத்துவதில் 2015 ஆம் ஆண்டு முதல் 2019 ஆம் ஆண்டு வரை தொடந்து ஐந்து ஆண்டுகளாக தமிழ்நாடு சிறந்த மாநில விருதை மத்திய அரசிடமிருந்து பெற்றுள்ளது.

அரசு மருத்துவமனைகளுக்கு தரச்சான்றிதழ் வழங்கும் பணி

நகர்ப்புறப் பகுதிகளில் சுகாதாரத்தை மேம்படுத்தும் நோக்கத்துடன் தமிழ்நாடு நகர்ப்புற சுகாதாரத் திட்டம் ஆயிரத்து 634 கோடி ரூபாய் மதிப்பீட்டில் செயல்படுத்தப்பட்டு வருகிறது. இத்திட்டத்திற்காக ஜப்பான் பன்னாட்டு கூட்டுறவு முகமை நிறுவனம் ஆயிரத்து 388 கோடி ரூபாய் நிதியை வழங்கியுள்ளது.

இத்திட்டத்தின் கீழ், அனைத்து நிலைகளிலும் உள்ள அரசு மருத்துவமனைகளுக்கு தரச்சான்றிதழ் வழங்கும் பணி மேற்கொள்ளப்படும். இதனால் நமது மாநிலத்தில் சுகாதார வசதிகள் பெருகி, நோயாளிகளுக்கு மேலும் தரமான சிகிச்சை வழங்கப்படும்.

தற்கொலை தடுப்பு அவசர தொலைபேசி

தேசிய அளவில் மக்களிடையே தொற்று நோய் அதிகமாக இருந்த நிலை மாறி, தற்பொழுது தொற்றா நோய் அதிகமாக உள்ளது. தமிழ்நாடு இதனை கவனத்தில் கொண்டு நீரிழிவு நோய், உயர் இரத்த அழுத்தம், கர்ப்பப்பை வாய் புற்றுநோய், மார்பக புற்றுநோய், மனநலம் மற்றும் தலைக்காயம், ஆகியவைகளை, ஆரம்ப நிலையில் பரிசோதனை மூலம் கண்டறிந்து, சிகிச்சை மற்றும் தொடர் கவனிப்பு ஆகியவற்றை வழங்க தமிழ்நாடு சுகாதார சீரமைப்பு திட்டம் கவனம் செலுத்தும்.

அவசரம் மற்றும் தலைக்காய சிகிச்சை வழங்க, அரசு மருத்துவமனைகளில், மருத்துவமனை முன் கவனிப்பு மற்றும் மருத்துவமனைகளுக்கிடையேயான மாற்றம் ஆகிய சேவைகளை மேம்படுத்தி, 108 ஆம்புலன்ஸ் சேவை வலுப்படுத்தப்படும்.மனநலம் பாதிக்கப்பட்டோர்களை மருத்துவமனையில் அனுமதிக்க, மீட்பு ஊர்திகளை பயன்படுத்துவதில் தமிழ்நாடு முதன்மை மாநிலமாக உள்ளது. மனநல நோயின் சுமையை குறைப்பதற்காக, தற்கொலை தடுப்பு அவசர தொலைபேசி ஒன்றை உருவாக்கி, 104 உதவி மையத்தை மேம்படுத்தப்படும்.

தொலைதூர கிராமங்களுக்கும் மருத்துவ சேவை

முன்னுரிமை தேவைப்படும் 9 மாவட்டங்களில், பேறுசார் மற்றும் குழந்தை நலத் திட்டத்தின் கீழ், தாய் சேய் நலம், தடுப்பூசி மற்றும் குடும்ப நலம் ஆகியவைகள், தொலைதூர கிராமங்களுக்கும் கிடைக்கும் வண்ணம் தேவையான வசதிகள் செய்து தரப்படும்.

தமிழ்நாட்டில் தமிழ்நாடு சுகாதார சீரமைப்பு திட்டத்தை செயல்படுத்துவதன் மூலம், தமிழ்நாட்டு மக்களுக்கு மேலும் தரமான மருத்துவ சேவையை வழங்குவதில் வளர்ந்த நாடுகளுக்கு இணையாக தமிழ்நாடு விளங்கும் என்பதில் ஐயமில்லை.

மருத்துவ சிகிச்சை அளிப்பதில் முதலிடம்

இன்றைக்கு புரட்சித் தலைவி அம்மா வழியிலே நடைபெறுகின்ற எங்களுடைய அரசு, கிராமத்திலே வாழ்கின்ற ஏழை, எளிய மக்களுக்கு அங்கேயே உயர்தர சிகிச்சை அளிக்க வேண்டுமென்பதற்காக தமிழகத்திலே அதிகமான அளவு ஆரம்ப சுகாதார நிலையங்களை திறந்திருக்கிறோம். அதேபோல, நல்ல சிகிச்சை கிடைக்க வேண்டும் என்பதற்காக மேம்படுத்தப்பட்ட ஆரம்ப சுகாதார நிலையம், 30 படுக்கைகள் கொண்ட மருத்துவமனையாக தரம் உயர்த்தப்பட்டு இருக்கிறது.

ஆகவே, எல்லா வகையிலும் கிராமத்திலிருந்து நகரம் வரை மக்களுக்குத் தேவையான மருத்துவ சிகிச்சை அளிப்பதிலே முதன்மை மாநிலமாக இன்றைக்கு தமிழ்நாடு விளங்கிக் கொண்டிருக்கிறது என்று சொன்னால் அது மிகையாகாது. இந்தியாவில் எத்தனையோ மாநிலங்கள் இருந்தால் கூட, இன்றைக்கு மருத்துவத் துறையில் சேவை புரிவதிலே தலைசிறந்த மாநிலமாக தமிழ்நாடு திகழ்ந்து கொண்டிருக்கிறது என்பதில் ஐயமில்லை என்பதை இந்த நேரத்தில் தெரிவித்துக் கொள்கிறேன்.

மருந்து கண்டுபிடியுங்கள்

இங்கே வருகை புரிந்திருக்கின்ற மருத்துவ நிபுணர்கள் அர்ப்பணிப்புப் உணர்வோடு நீங்கள் செயல்பட்டுக் கொண்டிருக்கிறீர்கள். இந்த செயல்பாடு, உண்மையிலேயே வரவேற்கத்தக்கது. ஏனென்று சொன்னால், எத்தனையோ துறைகள் இருக்கின்றன, எந்தத் துறையிலும், உயிரை காப்பாற்றக்கூடிய அளவிற்கு துறைகள் இல்லை. ஆனால் உயிரை காப்பாற்றக்கூடிய துறையிலே இருக்கின்ற வல்லுநர்கள், மருத்துவ நிபுணர்கள் இங்கே அமர்ந்திருக்கின்றீர்கள். நம்முடைய பணி சிறக்க, சேவை சிறக்க, அரசுக்கு ஒத்துழைப்பு நல்க வேண்டும் என்று இந்த நேரத்தில் தெரிவித்துக் கொள்கிறேன்.

புதிய, புதிய நோய்கள் இப்பொழுது வந்து கொண்டிருக்கின்றன. உங்களுக்கு நன்றாகத் தெரியும், கொரோனா வைரஸ் அதற்கு மருந்தே கண்டுபிடிக்கவில்லையென்று உங்களைப் போல் இருக்கின்ற மருத்துவ நிபுணர்கள் தெரிவிக்கின்றார்கள். அப்படிப்பட்ட வைரஸை தடுக்க உங்களுடைய திறமையால் நீங்கள் அதற்கு தமிழகத்தில் மருந்து கண்டுபிடித்து இந்த நாட்டிற்கே முன்னுதாரணமாக திகழவேண்டும் என மருத்துவர்களைக் கேட்டுக்கொள்கிறேன்.

இவ்வாறு பேசினார்.