சிறப்பு செய்திகள்

நோயாளிகளின் மனநலம் குறித்த ஆய்வுகள்: துணை முதலமைச்சர் தகவல்

சென்னை

மாநிலம் முழுவதும் நோயாளிகளின் மனநலம் குறித்த ஆய்வுகள் மேற்கொள்ளப்படும் என்று துணை முதலமைச்சர் ஒ.பன்னீர்செல்வம் பேசினார்.

சென்னையில் நடைபெற்ற தமிழ்நாடு சுகாதார சீரமைப்பு திட்டத் துவக்க விழாவில் துணை முதலமைச்சர் ஒ.பன்னீர்செல்வம் கலந்துகொண்டு பேசியதாவது

அம்மாவின் திட்டம்

தமிழகத்தில் உள்ள ஆண்கள், பெண்கள், குழந்தைகள், பெரியவர்கள், ஆகிய அனைவரும் நல்ல ஆரோக்கியத்துடன், எவ்வித நோய் நொடியும் இன்றி, சிறப்பாக தங்கள் உடல் நலத்தை பேணிப் பாதுகாத்திட வேண்டும் என்ற உன்னத நோக்கத்துடன், அம்மா அவர்கள், மிகச் சிறப்பான திட்டங்களைத் தீட்டி முனைப்புடன் அவற்றை செயல்படுத்தி, ஏழை, எளியோருக்கு, பணம் படைத்தவர்கள் மற்றும் வசதி படைத்தோர்களுக்கு நிகரான மருத்துவச் சேவைகளை செலவின்றி பெற்று, சீர்பெற்றிட, வழி வகுத்து நடைமுறைப்படுத்தினார்கள் என்பதை நாம் அனைவரும் அறிவோம்.

மருத்துவத் துறையில் சிறப்பான செயல்பாடு

அம்மா அவர்கள் வகுத்துத் தந்த அந்த வழியில், தமிழக முதலமைச்சர் எடப்பாடி கே பழனிசாமி அவர்களது தலைமையில் வீறு நடை போட்டு வரும் அம்மா அவர்களது அரசு, மருத்துவத் துறையில் சிறப்பான முறையில் செயல்பட்டு வருகிறது என்பதை சுட்டிக்காட்ட விரும்புகிறேன்.

புதிய திட்டங்கள்

கடந்த 9 ஆண்டுகளாக மக்கள் நல்வாழ்வுத் துறைக்கென அம்மா அவர்களது அரசு மற்ற மாநிலங்கள் வியக்கும் வண்ணம் ஏராளமான புதிய திட்டங்களைத் தீட்டி, அதற்குத் தேவையான அதிகமான நிதியை ஒதுக்கி, அவற்றை செம்மையாகச் செயல்படுத்தி வருகிறது. கடந்த ஆண்டு ஜனவரி மாதம் மதுரையில் எய்ம்ஸ் மருத்துவமனை தொடங்க பாரதப் பிரதமரால் அடிக்கல் நாட்டப்பட்டதன் மூலம், அம்மா அவர்களது கனவை அம்மா அவர்களது அரசு இன்றைக்கு நனவாக்கியுள்ளது என்பதை தெரிவித்துக் கொள்ள கடமைப்பட்டிருக்கிறேன்.

சாதனைகளுக்கு மகுடம்

இந்த சாதனைகளுக்கெல்லாம் மகுடம் சூட்டும் வண்ணம், ஒரே ஆண்டில் தமிழகத்திற்கு 11 புதிய அரசு மருத்துவக் கல்லூரிகள் தொடங்குவதற்கான அனுமதி, அம்மா அவர்களது அரசின் முதலமைச்சர் மற்றும் மக்கள் நல்வாழ்வு துறை அமைச்சரின் தீவிர முயற்சியால் மத்திய அரசிடமிருந்து பெறப்பட்டு, அவற்றில் இரண்டு கல்லூரிகளுக்கான அடிக்கல் நாட்டு விழா கடந்த 1-3-2020 அன்று ராமநாதபுரம், விருதுநகரிலும் மக்கள் நல விழாவாக சிறப்பாக நடைபெற்றது.

இச்சாதனைகளின் தொடர்ச்சியாகத்தான், இன்றைய தினம் தமிழக மக்களுக்கு வழங்கப்படும் சுகாதார சேவைகளை மேலும் மேம்படுத்தி, உலகத் தரமுடன் வழங்கும் பொருட்டு, உலக வங்கியின் துணையுடன் இன்றையதினம் தமிழ்நாடு சுகாதார சீரமைப்பு திட்டம், அம்மா அவர்களது அரசால் தொடங்கி வைக்கப்படுகிறது.

உலக வங்கி நிதிவியுடன்

உலக வங்கியின் நிதி உதவியுடன், அம்மா அவர்களின் பொற்கால ஆட்சியில், கடந்த 2005ஆம் ஆண்டு முதல் 2015ஆம் ஆண்டு வரை ரூ.1300 கோடி மதிப்பீட்டில் தமிழ்நாடு சுகாதாரத் திட்டம் என்னும் உன்னத திட்டத்தின் மூலமாக அரசு மருத்துவமனைகளில் அதிநவீன தொழில்நுட்ப கருவிகளின் உதவியுடன் தொற்றா நோய் தடுப்பு, கண்டறிதல் மற்றும் சிகிச்சை, பேறுகால அவசர சிகிச்சை, சுகாதார தகவல் மேலாண்மை உள்ளிட்டவைகளை அம்மா அவர்களது அரசு சிறப்பாகச் செயல்படுத்தி வந்துள்ளது.

ரூ 857.101 கோடி முதலீடு

இன்று தொடங்கி வைக்கப்படும் தமிழ்நாடு சுகாதார சீரமைப்புத் திட்டம் 2857.003 கோடி ரூபாய் மொத்த மதிப்பீட்டில் செயல்படுத்தப்பட இருக்கிறது . இத்திட்டத்திற்கான உலக வங்கியின் பங்கு 1999.902 கோடி ரூபாய் ஆகும். அம்மா அவர்களது அரசு 857.101 கோடி ரூபாயை இதில் முதலீடு செய்ய உள்ளது. இத்திட்டம் 5 வருடங்களுக்கு சிறப்புடன் செயல்படுத்தியும், உலக சுகாதார அமைப்பின் இயக்குநர் அவர்கள் கூறியதை போல் “”””அனைவருக்கும், அனைத்து வயதினருக்குமான சுகாதார திட்டம்”” என்னும், நிலையான வளர்ச்சி இலக்குகள் முழுமையாக செயல்படுத்தப்படும் என்பதையும் மகிழ்ச்சியுடன் சுட்டிக்காட்ட விரும்புகிறேன்.

மேம்படுத்தப்பட்ட தரமான சிகிச்சை

இத்திட்டத்தின் முக்கிய குறிக்கோள்கள் மேம்படுத்தப்பட்ட தரமான சிகிச்சை, தொற்றாநோய்கள் மற்றும் காயங்களுக்கான மேம்படுத்தப்பட்ட மேலாண்மை, பேறுசார் மற்றும் குழந்தைகள் நலத் திட்டத்தில் காணப்படும் குறைபாடுகளை நீக்குதல் ஆகியன ஆகும். இத்திட்டம் தமிழ்நாடு முழுவதும் உள்ள அனைத்து மருத்துவ மையங்களிலும், அதாவது அரசு மருத்துவக் கல்லூரி மருத்துவமனைகளிலிருந்து, அரசு ஆரம்ப சுகாதார நிலையங்கள் வரை மேற்கொள்ளப்படவிருக்கிறது என்பதையும்,
இத்திட்டத்தைச் செயல்படுத்துவதன் மூலம், தனியார் மருத்துவமனைகளுக்கு நிகராக அனைத்து அரசு மருத்துவமனைகளின் தரம் விரைவில் உயர்த்தப்படும். இதனால் பொது மக்கள் உயர்தர சிகிச்சைகளைத் தடையின்றி பெற்றிட நல்ல வாய்ப்பாக அமையும்.

மேலும், மக்களின் இன்றைய முக்கிய மருத்துவப் பிரச்சினையாக உள்ள உயர் இரத்த அழுத்தம், சர்க்கரை நோய் மற்றும் புற்றுநோய் ஆகிய தொற்றா நோய்களை, வராமல் ஆரம்ப நிலையிலேயே தடுப்பதற்கு தகுந்த வாழ்க்கை முறை கல்வி அளிக்கப்படுவதோடு, ஆரம்ப நிலையிலேயே கண்டறிந்து மருத்துவ சிகிச்சை உட்பட மருந்து மாத்திரைகள் முற்றிலும் விலையின்றி வழங்கப்படுகின்றன.

மன நலம் குறித்த ஆய்வு

மாநிலம் முழுவதும், நோயாளிகளின், மனநலம் குறித்த ஆய்வுகள் மேற்கொள்ளப்பட்டு, மகிழ்ச்சி குன்றிய மக்களிடையே மனநலம் குறித்த விழிப்புணர்வு அளிக்கப்படும். தேவையான இடங்களில் மன நல ஆலோசனை மையங்கள் ஏற்படுத்தப்படும்.
தமிழகத்தில் சாலை விபத்துக்களைத் தடுக்க அம்மா அவர்களது அரசால் தீவிர நடவடிக்கைகள் மேற்கொள்ளப்படுகின்றன என்பதையும், இத்திட்டத்தின் கீழ் விபத்துக்களை பெரும் அளவு தடுக்கவும், சாலை விபத்துகளினால் ஏற்படக்கூடிய உயிர் இழப்புக்களை கட்டுப்படுத்தவும், புனர்வாழ்வினை மேம்படுத்தவும் தீவிர நடவடிக்கைகள் எடுக்கப்படும்.

மேம்படுத்தப்பட்ட சிறப்பு திட்டம்

மகளிர் மற்றும் பச்சிளம் குழந்தைகள் நலத்தினைச் சிறப்புடன் பேணும் வகையில் டாக்டர் முத்துலட்சுமி ரெட்டி மகப்பேறு நிதி உதவி, அம்மா குழந்தை நல பரிசுப் பெட்டகம் என பல்வேறு சிறந்த திட்டங்களை செயல்படுத்தி தாய் – சேய் நலத்தில் இந்தியாவிலேயே ஒரு முன்னோடியாக விளங்கும் அம்மா அவர்களது அரசால் இன்று துவங்கப்படும் இத்திட்டத்தின் கீழ், மேம்படுத்தப்பட்ட மகளிர் மற்றும் பச்சிளம் குழந்தை நலம் பேணும் சிறப்பு திட்டம் ஒன்று செயல்படுத்தப்பட உள்ளது.

கீழ்ப்பாக்கம், மதுரை மற்றும் கோயம்புத்தூர் அரசு மருத்துவமனைக் கல்லூரிகள் செம்மையாகச் செயல்பட, 368.20 கோடி ரூபாய் செலவில் உட்கட்டமைப்பு வசதிகள் ஏற்படுத்தப்பட்டு, 497.41 கோடி ரூபாய் செலவில் நவீன மருத்துவக் கருவிகளும்,
பரிந்துரை அரசு மருத்துவமனைகள் மற்றும் அரசு மருத்துவக் கல்லூரி மருத்துவமனைகளான சேலம், வேலூர், தஞ்சாவூர், திருநெல்வேலி, திருச்சிராப்பள்ளி, புதுக்கோட்டை, தூத்துக்குடி, கன்னியாகுமரி, திண்டுக்கல், கிருஷ்ணகிரி மற்றும் திருப்பூர் ஆகிய 11 இடங்களில் 201.07 கோடி ரூபாய் செலவில் நவீன மருத்துவக் கருவிகள் இத்திட்டத்தின் கீழ் அளிக்கப்பட உள்ளன என்பதையும்,

நவீன ஆய்வகம்

இரண்டாம் நிலை அரசு மருத்துவமனைகளான ஆவடி, அம்மாபேட்டை, வேலம்பாளையம் மற்றும் கண்டியப்பேரி ஆகியவை நோயாளிகளுக்கு மேலும் சிறப்பாகச் சேவையாற்ற, 109.50 கோடி உட்கட்டமைப்பு வசதிகள் ஏற்படுத்தப்பட்டு 51.43 கோடி ரூபாய் செலவில் நவீன மருத்துவக் கருவிகள் அளிக்கப்படும் என்பதையும், சென்னை மற்றும் மதுரையில் செயல்படும் மண்டல பயிற்சி நிலையங்களில், தொற்றா நோய்களுக்காக 10.90 கோடி ரூபாய் செலவில் நவீன ஆய்வகம் ஒன்று நிறுவப்பட்டு, ஆரம்ப சுகாதார பணியாளர்களுக்கு சிறந்த பயிற்சி அளிக்கப்படும் என்பதையும்,

ஏழை, பணக்காரர்

இந்த திட்டத்தை தமிழக மக்களுக்குச் செயல்படுத்துவதன் மூலம், வளர்ந்த நாடுகளுக்கு இணையாக தமிழகத்தின் சுகாதார அமைப்புகள் மேம்படும். ஏழை, பணக்காரர் என்ற வேறுபாடு இன்றி தமிழக மக்களுக்கு உயர்தர மருத்துவ சிகிச்சை அளிக்க வேண்டும் என்ற அம்மா அவர்களது உயர்ந்த நோக்கம் நிறைவேறும் என்பதை உறுதியுடன் நான் தெரிவித்துக் கொள்ள கடமைப்பட்டிருக்கிறேன்.

மக்கள் நல்வாழ்வுத் துறை அமைச்சர் டாக்டர் சி.விஜயபாஸ்கர் இத்துறையை சிறப்பாக நிர்வகித்து, அம்மா அவர்களது அரசிற்குப் பெருமையைச் சேர்த்து கொண்டு இருக்கிறார். சாதனைகள் படைத்து வருகிறார். இதற்காக அவரை நான் பெரிதும் பாராட்ட கடமைப்பட்டிருக்கிறேன்.

அம்மா அவர்களது அரசால் கொண்டுவரப்பட்டுள்ள இத்திட்டத்தினை தமிழக மக்கள் சிறந்த முறையில் பயன்படுத்திக்கொண்டு, உடல் வலிமையும், உள்ள வலிமையும் ஒருங்கே பெற்று திகழ வேண்டும் என்றும், தமிழகத்தில் ஆரோக்கியமான மனித சமுதாயம் அமைய வேண்டுமென்ற அரசின் முயற்சிகளுக்கு அனைத்து மருத்துவர்களும் ஒத்துழைக்க வேண்டும் .இவ்வாறு பேசினார்.