தற்போதைய செய்திகள்

தோவாளை பால் உற்பத்தியாளர் கூட்டுறவு சங்கத்துக்கு ரூ.20 லட்சத்தில் புதிய கட்டடம் – அமைச்சர் கே.டி.ராஜேந்திர பாலாஜி- என்.தளவாய்சுந்தரம் திறந்து வைத்தனர்

கன்னியாகுமரி

கன்னியாகுமரி மாவட்டம் தோவாளையில் ரூ.20 லட்சத்தில் புதிதாக கட்டப்பட்டுள்ள பால் உற்பத்தியாளர் கூட்டுறவு சங்க கூடுதல் கட்டடத்தை பால்வளம் மற்றும் பால்பண்ணை வளர்ச்சித்துறை அமைச்சர் கே.டி.ராஜேந்திர பாலாஜி, தமிழ்நாடு அரசின் டெல்லி சிறப்புப் பிரதிநிதி என்.தளவாய் சுந்தரம் ஆகியோர், மாவட்ட ஆட்சித்தலைவர் பிரசாந்த் மு.வடநேரே தலைமையில் குத்து விளக்கேற்றி கல்வெட்டினை திறந்து வைத்தார்.

விழாவில் அமைச்சர் கே.டி.ராஜேந்திர பாலாஜி பேசியதாவது: –

தோவாளை பால் உற்பத்தியாளர்கள் கூட்டுறவு சங்கமானது கடந்த 61 ஆண்டுகளாக செயல்பட்டு வருகிறது. இச்சங்கமானது, பால் உற்பத்தியாளர்களிடமிருந்து நேரடியாக வெண்டர்கள்மூலம் தரமான பாலினை கொள்முதல் செய்து, வாடிக்கையாளர்களுக்கு விற்பனை செய்வதன் மூலம் லாபம் ஈட்டுகிறது. பால் உற்பத்தியாளர்கள் கூட்டுறவு சங்கமானது எவ்வாறு மக்களிடம் செயல்பட வேண்டும் என்பதற்கு தோவாளை பால் உற்பத்தியாளர்கள் கூட்டுறவு சங்கம் ஒரு சிறந்த எடுத்துக்காட்டாகும்.

இச்சங்கத்தின்மூலம், நாள் ஒன்றுக்கு சராசரியாக 700 லிட்டர் பால் உற்பத்தி செய்யப்படுகிறது. இவ்வாறு உற்பத்தி செய்யப்படும் பாலின் அளவினை 2000 லிட்டராக அதிகரித்து, மிகப்பெரிய பால் உற்பத்தியாளர்கள் கூட்டுறவு சங்கமாக உருவாக்குவதற்கு தேவையான நடவடிக்கைகளை சங்க நிர்வாகிகள் மேற்கொள்ள வேண்டும். மேலும், நாடு முழுவதும் கூட்டுறவு சங்கங்களில் பால் உற்பத்தியாளர்கள் மூலம் பால்கோவா, குல்பி ஐஸ், ஐஸ் கிரீம் போன்ற உணவு பொருட்கள் தரமாக தயாரிக்கப்பட்டு விற்பனை செய்யப்படுகிறது. தோவாளை என்பதே பூக்களின் இடமாகும். இங்கு அதிக அளவில் பூக்கள் உற்பத்தி செய்யப்பட்டு, பூக்களின் விலை நிர்ணயம் செய்யப்படுகிறது.

இவ்வாறு அமைச்சர் கே.டி.ராஜேந்திர பாலாஜி பேசினார்.

தமிழ்நாடு அரசின் டெல்லி சிறப்புப் பிரதிநிதி என்.தளவாய் சுந்தரம் பேசுகையில்,

நான் சிறுவயதிலேயே வீட்டில் 10-க்கும் மேற்பட்ட பசுக்களை வளர்த்து, அதிலிருந்து பால் உற்பத்தி செய்து, தோவாளை பால் உற்பத்தியாளர்கள் கூட்டுறவு சங்கத்திற்கு பாலினை வழங்கியுள்ளேன். எனவே, தோவாளை பால் உற்பத்தியாளர்கள் கூட்டுறவு சங்கத்தில் உற்பத்தி செய்யப்படும் பாலின் அளவினை அதிகரித்து, மிகப்பெரிய பால் உற்பத்தியாளர்கள் கூட்டுறவு சங்கமாக உருவாக்குவதற்கு தேவையான நடவடிக்கைகளை சங்க நிர்வாகிகள் மேற்கொள்ள வேண்டும் என்று கேட்டுக் கொண்டார்.

முன்னதாக துணைப்பதிவாளர் (பால்வளம்) ஆர்.சுரேஷ் வரவேற்றார். முடிவில் பொதுமேலாளர் (ஆவின்) ற்றி.தியானேஷ் பாபு நன்றி கூறினார்.

விழாவில், சாத்தூர் தொகுதி சட்டமன்ற உறுப்பினர் எம்.எஸ்.ஆர்.ராஜவர்மன், மாவட்ட ஆவின் பெருந்தலைவர் எஸ்.ஏ.அசோகன், அரசு ரப்பர் வளர்ப்போர் கூட்டுறவு விற்பனை சங்கத்தலைவர் டி.ஜாண் தங்கம், திருநெல்வேலி மாவட்ட ஆவின் பெருந்தலைவர் சுதா கே.பரமசிவம், தூத்துக்குடி மாவட்ட ஆவின் பெருந்தலைவர் என்.சின்னத்துரை, ஆரல்வாய்மொழி தொடக்க வேளாண்மை கூட்டுறவு கடன் சங்கத்தலைவர் எஸ்.கிருஷ்ணகுமார், தோவாளை பால் உற்பத்தியாளர் கூட்டுறவு சங்க தலைவர் கே.மாடசாமி, பால் உற்பத்தியாளர்கள் கூட்டுறவு சங்க நிர்வாகிகள், அலுவலர்கள், பொதுமக்கள் மற்றும் பலர் கலந்து கொண்டனர்.