தற்போதைய செய்திகள்

தமிழக மாணவர்களின் முன்னேற்றத்துக்கு தொலைநோக்கு திட்டங்கள் நிறைவேற்றம்- அமைச்சர் சேவூர் எஸ்.இராமச்சந்திரன் பேச்சு

திருவண்ணாமலை

தமிழக மாணவர்களின் முன்னேற்றத்துக்கு தொலைநோக்கு திட்டங்கள் நிறைவேற்றப்பட்டு வருகின்றன என்று அமைச்சர் சேவூர் எஸ்.இராமச்சந்திரன் தெரிவித்தார்.

திருவண்ணாமலை வடக்கு மாவட்ட கழக சிறுபான்மை நலப்பிரிவு சார்பில் கீழ்பெண்ணாத்தூர் ஒன்றியத்திற்கு உட்பட்ட சிறுநாத்தூர் நடுநிலைப்பள்ளியில் புரட்சித்தலைவி அம்மா அவர்களின் 72-வது பிறந்த நாளையொட்டி நலத்திட்ட உதவிகள் வழங்கும் விழா நடைபெற்றது. விழாவுக்கு மாவட்ட சிறுபான்மை நலப் பிரிவு செயலாளர் ஜாகிர் உசேன் தலைமை தாங்கினார்.

இவ்விழாவில் சிறப்பு விருந்தினராக திருவண்ணாமலை தெற்கு மாவட்ட கழக செயலாளரும், இந்து சமய அறநிலையத்துறை அமைச்சருமான சேவூர் எஸ்.இராமச்சந்திரன் கலந்து கொண்டு 300 மாணவ மாணவிகளுக்கு நோட்டுப் புத்தகங்கள், பேனா, பென்சில், தமிழ் அகராதி புத்தகம், டிபன் பாக்ஸ் மற்றும் அப்பள்ளிக்கு 3 மின்விசிறிகள் ஆகியவற்றை வழங்கினார்.

இந்நிகழ்ச்சியில் அமைச்சர் சேவூர் எஸ்.இராமச்சந்திரன் பேசியதாவது:-

முதலமைச்சர், துணை முதலமைச்சர் ஆணைக்கிணங்க திருவண்ணாமலை தெற்கு மற்றும் வடக்கு மாவட்டங்களில் கடந்த 10 நாட்களாக அம்மாவின் பிறந்த நாள் விழா சிறப்பாக கொண்டாடப்பட்டு வருகிறது. இந்நிகழ்வுகளில் ஏழை, எளியோர் நலத்திட்ட உதவிகள், பள்ளி மாணவ, மாணவிகளுக்கு கல்வி உபகரணங்கள் மற்றும் மாற்றுத்திறனாளிகளுக்கு நலத்திட்ட உதவிகள் வழங்கப்பட்டு வருகிறது.

அம்மாவின் அரசு ஒவ்வொரு ஆண்டும் தமிழக பட்ஜெட்டில் கல்வித் துறைக்கு அதிகமான நிதியை ஒதுக்கி வருகிறது. இந்த ஆண்டு பள்ளி கல்வித்துறைக்கு ரூ.34 ஆயிரத்து 181 கோடி ஒதுக்கீடு செய்யப்பட்டுள்ளது. அரசு பள்ளியில் பயிலும் மாணவ மாணவிகளுக்கு பள்ளி சீருடைகள், இலவச நோட்டு புத்தகங்கள், வண்ண பென்சில்கள், புத்தகப் பைகள் என 16 வகையான விலையில்லா பொருட்களை வழங்கி வருகிறது.

மேலும் 11-ம் வகுப்பு படிக்கும் மாணவ-மாணவிகளுக்கு விலையில்லா சைக்கிள். மடிகணினி மற்றும் இலவச பஸ் பாஸ், கல்வி உதவித்தொகை ஆகியவற்றை அம்மாவின் அரசு வழங்கி வருகிறது. தமிழக மாணவர்களின் முன்னேற்றத்துக்கு தொலைநோக்கு திட்டங்கள் நிறைவேற்றப்பட்டு வருகிறது. இதனை மாணவ மாணவிகள் நல்ல முறையில் பயன்படுத்தி கல்வி பயின்று தங்களுடைய வாழ்க்கை தரத்தையும் உயர்த்திக் கொள்ள வேண்டும்.

இவ்வாறு அமைச்சர் சேவூர் எஸ்.இராமச்சந்திரன் பேசினார்.