தற்போதைய செய்திகள்

என்.சி.சி. மாணவ- மாணவிகள் அலுவலர்களுக்கு பேரிடர் மேலாண்மை திறன் மேம்பாட்டு பயிற்சி – அமைச்சர்கள் ஆர்.பி.உதயகுமார், செல்லூர் கே.ராஜூ பங்கேற்பு

மதுரை

மதுரை காமராஜர் பல்கலைக்கழகத்தில் என்.சி.சி. மாணவ, மாணவிகள் மற்றும் அலுவலர்களுக்கு பேரிடர் மேலாண்மை திறன் மேம்பாட்டு பயிற்சி வகுப்பு நேற்று தொடங்கியது. இந்நிகழ்ச்சியில் அமைச்சர்கள் ஆர்.பி.உதயகுமார், செல்லூர் கே.ராஜூ ஆகியோர் பங்கேற்றனர்.

தமிழக கடலோர பகுதிகளில் ஏற்படும் பேரிடர்களின் அபாயத்தை குறைக்கும் நோக்கில் தமிழக அரசு உலக வங்கி நிதி உதவியுடன் கடலோர பேரிடர் அபாயம் குறைப்பு திட்டம் ரூ.1560.194 கோடி திருத்திய மதிப்பீட்டில் செயல்படுத்தி வருகிறது. இத்திட்டத்தின் கீழ், ரூ.310 கோடி செலவில் பல்வேறு பேரிடர்களை தாங்கக்கூடிய 14347 வீடுகளும், 143 இடங்களில் அறிவிப்பு பலகைகளுடன் கூடிய முறையான இணைப்பு வழித்தடங்களும், ரூ.331.03 கோடி செலவில் 121 பல்நோக்கு பாதுகாப்பு மையங்களும், ரூ.325.91 கோடி செலவில் மீன்வள உட்கட்டமைப்புக்கள் மற்றும் நிலைத்த வாழ்வாதாரப் பணிகளும் முடிக்கப்பட்டுள்ளன.

மேலும், பேரிடர்களின் பாதிப்பிற்கு இலக்காகும் பொதுமக்களுக்கு உரிய நேரத்தில் எச்சரிக்கை தகவல்கள் வழங்கும் பொருட்டு ரூ.50 கோடி செலவில் முன்னெச்சரிக்கை கருவி அமைக்க திட்டமிடப்பட்டு பணிகள் முடிவுறும் தருவாயில் உள்ளது. வேளாங்கண்ணி மற்றும் கடலூர் நகராட்சிகளில் ரூ.406.83 கோடி செலவில் பூமிக்கு மேலுள்ள மின் இணைப்புகளை பூமிக்க கீழான இணைப்புகளாக மாற்றும் பணி செயல்படுத்தப்பட்டு நடைபெற்று வருகின்றன. இதுமட்டுமின்றி ரூ.15 கோடி செலவில் பேரிடர் அபாயத்திற்குள்ளாகும் கடலோரத்தில் வாழும் சமூகத்தினருக்கு சமுதாய அடிப்படையிலான பேரிடர் அபாய மேலாண்மை பயிற்சிகள் வழங்கப்பட்டுள்ளன. மேலும், ரூ.1.26 கோடி செலவில், 6 முதல் 12-ம் வகுப்பு பாடத்திட்டங்களிலும் மற்றும் ஆசிரியர் பயிற்சி வகுப்பு பாடத்திட்டங்களிலும் பேரிடர் மேலாண்மை குறித்த பாடங்கள் அறிமுகப்படுத்தப்பட்டு பேரிடர் மேலாண்மை குறித்து பெருமளவில் விழிப்புணர்வு ஏற்படுத்தப்பட்டுள்ளது.

மேலும், மனிதர்கள் மற்றும் இயற்கையினால் ஏற்படும் பேரிடர்களைத் தடுக்க மேற்கொள்ள வேண்டிய முன் எச்சரிக்கை நடவடிக்கைகள், குறிப்பாக நீர்நிலைகள் (ஆறுகள், காட்டாறுகள், நீர் அருவிகள், கால்வாய்கள், குளங்கள், ஏரிகள், வடிகால்கள், கைவிடப்பட்ட ஆழ்துளை கிணறுகள் முதலியவை) தொடர்பான விபத்துகள் குறித்து பொதுமக்களிடையே விழிப்புணர்வு ஏற்படுத்தும் விதமாக, வருவாய் மற்றும் பேரிடர் மேலாண்மைத் துறை அமைச்சர் ஆர்.பி.உதயகுமார் தலைமையில், மதுரை, திருச்சிராப்பள்ளி, சென்னை, திருவள்ளூர் மற்றும் காஞ்சிபுரம் ஆகிய 5 மாவட்டங்களில் பெருமளவிலான விழிப்புணர்வு கருத்தரங்குகள் நடைபெற்றன. எஞ்சியுள்ள 32 மாவட்டங்களில், ஒத்திகைப் பயிற்சிகள் மற்றும் விழிப்புணர்வு கருத்தரங்குகள் நடைபெற்று வருகிறது.

கடலோர பேரிடர் அபாய குறைப்பு திட்டத்தின் கீழ், தமிழகத்தின் அனைத்து மாவட்டங்களிலுள்ள கல்லூரிகளின் தேசிய மாணவர் படை, மாணவ, மாணவிகள் மற்றும் அலுவலர்களுக்கான பேரிடர் மேலாண்மை திறன் மேம்பாட்டு பயிற்சியானது 1.23 கோடி ரூபாய் செலவில் வழங்க தமிழக அரசால் திட்டமிடப்பட்டு, இதன் துவக்க விழா 19.02.2020 அன்று சென்னை மாநிலக் கல்லூரியில் பேரிடர் தொடர்பான கண்காட்சிகள், கலைநிகழ்ச்சிகள் மாணவர்கள் அறிந்துகொள்ளும் வகையில் நடத்தப்பட்டது. அதன் தொடர்ச்சியாக, நேற்று மதுரை காமராசர் பல்கலைக்கழகத்தில் தேசிய மாணவர் படை, மாணவ, மாணவிகள் மற்றும் அலுவலர்களுக்கான பேரிடர் மேலாண்மை திறன் மேம்பாட்டு பயிற்சி நடைபெற்றது.

இந்தப் பயிற்சி தொகுப்பினில், 80 தேசிய மாணவர் படை அலுவலர்களுக்கும், தேசிய மாணவர் படையினைச் சார்ந்த 1500 மாணவ மாணவிகளுக்கும் பேரிடர் மேலாண்மை திறன் பயிற்சி அளிக்கப்பட்டது. மேலும் பேரிடர் தொடர்பான ஒத்திகை தீயணைப்பு மற்றும் மீட்புப்பணிகள் துறையின் மூலம் நடத்தப்பட்டது, மேலும் தமிழ்நாடு பேரிடர் மீட்புப்படை மற்றும் தீயணைப்பு மற்றும் மீட்பு பணிகள் துறை மற்றும் முக்கிய துறைகளின் பேரிடர் தொடர்பான கண்காட்சி நடத்தப்பட்டது.

இந்த பயிற்சி பெற்ற தேசிய மாணவர் படையினைச் சார்ந்த மாணவ, மாணவிகள், தமிழகத்தில் உள்ள பல்வேறு கல்லூரிகள் மற்றும் கிராமங்களுக்கு சென்று, சுமார் ஒரு லட்சத்திற்கும் மேற்பட்டவர்களுக்கு பேரிடர் குறித்து விழிப்புணர்வு ஏற்படுத்தும் வகையில் பயிற்சித் திட்டம் வடிவமைக்கப்பட்டுள்ளது. மேலும், இந்தப் பயிற்சி திட்டத்தில் பேரிடர் தொடர்பான விழிப்புணர்வை பொது மக்களுக்கு ஏற்படுத்தும் விதமாக தெருமுனை நாடகங்கள், பொம்மலாட்டம் மற்றும் வில்லுப்பாட்டு நிகழ்ச்சிகள் ஆகியவை நடத்தப்பட உள்ளன.

மேலும், பேரிடர் தொடர்பான குறும்படங்கள் வெளியிடப்படுவதோடு, பொது மக்களுக்கு பேரிடர் மேலாண்மை தொடர்பான துண்டுப் பிரசுரங்களும் பகிரப்பட உள்ளது. இதுவன்றி, விழிப்புணர்வுப் பேரணி, கண்காட்சி மற்றும் பேச்சுப் போட்டி, படம் வரைதல் உள்ளிட்ட போட்டிகளும் இந்தப் பயிற்சி தொகுப்பினில் நடத்தப்பட உள்ளது.இவ்விழாவில் வருவாய், பேரிடர் மேலாண்மை மற்றும் தகவல் தொழில்நுட்பவியல் துறை அமைச்சர் ஆர்.பி. உதயகுமார், கூட்டுறவு துறை அமைச்சர் செல்லூர் கே.ராஜூ ஆகியோர் கலந்துகொண்டு சிறப்புரை ஆற்றினர். பேரிடர் விழிப்புணர்வு தொடர்பான துண்டு பிரசுரத்தை கூட்டுறவுத்துறை அமைச்சர் வெளியிட வருவாய், பேரிடர் மேலாண்மைத் துறை மற்றும் தகவல் தொழில்நுட்பவியல் துறை அமைச்சர் பெற்றுக்கொண்டார்.

இவ்விழாவில், வருவாய் மற்றும் பேரிடர் மேலாண்மைத் துறையின் கூடுதல் தலைமைச் செயலர் அதுல்ய மிஸ்ரா, முதன்மைச் செயலர் / வருவாய் நிருவாக ஆணையர் டாக்டர் ஜெ. ராதாகிருஷ்ணன், காவல்துறை கூடுதல் தலைமை தலைவர் டேவிட்சன் தேவஆசிர்வாதம், தென்மண்டல காவல்துறை தலைவர் சண்முக ராஜேஸ்வரன், காவல்துறை துணைத்தலைவர் டாக்டர் அனிவிஜயா, பேரிடர் மேலாண்மை இயக்குநர் (மு.கூ.பொ.) முனைவர் டி.ஜகந்நாதன், மதுரை மாநகராட்சி ஆணையாளர் எஸ்.விசாகன், காவல்துறை கண்காணிப்பாளர் மணிவண்ணன், சட்டமன்ற உறுப்பினர்கள் வி.வி.ராஜன் செல்லப்பா, பி.நீதிபதி, கே.மாணிக்கம், பி.பெரியபுள்ளான் (எ) செல்வம், எஸ்.எஸ்.சரவணன் ஆகியோர் வாழ்த்துரை வழங்கினர். முடிவில் மதுரை காமராசர் பல்கலைக்கழக துணை வேந்தர் முனைவர் எம். கிருஷ்ணன் நன்றி கூறினார்.