சிறப்பு செய்திகள்

தமிழகத்தில் கொரோனா நோய் வரவில்லை, பயம் தேவையில்லை : முதல்வர் பேச்சு

கிருஷ்ணகிரி

கிருஷ்ணகிரி மாவட்டத்தில் அமைக்கப்படவுள்ள புதிய அரசு மருத்துவக் கல்லூரிக்கு இன்று அடிக்கல் நாட்டி முதல்வர் எடப்பாடி கே.பழனிசாமி பேசியதாவது

உலகமே அஞ்சும் கொரோனா

கொரோனா வைரஸ் குறித்து உலகமே அஞ்சும் நிலை வருகிறது. சீனா போன்ற நாடுகளில் இதன் பாதிப்பு அதிகமாக உள்ளது. இந்தியாவில் கொரோனா வைரஸ் பாதிப்பு ஏற்படாமல் இருக்க, வெளிநாட்டிலிருந்து வரும் பயணிகள் பரிசோதிக்கப்படுகிறார்கள். இந்தியாவில் சில நபர்களுக்கு கொரோனா வைரஸ் பாதிப்பு இருப்பதாக கண்டறியப்பட்டு, சிகிச்சை அளிக்கப்பட்டு வருகிறது. தமிழ்நாட்டில் கொரோனா பாதிப்பு யாருக்கும் இருப்பதாக இதுவரை கண்டறியப்படவில்லை.

போர்க்கால அடிப்படையில்

எனினும், நோய் தடுப்பிற்கான முன்னெச்சரிக்கை நடவடிக்கைகள் பற்றி மக்களுக்கு விழிப்புணர்வு ஏற்படுத்தவும், மருத்துவமனைகளை ஆயத்த நிலையில் வைக்கவும் உரிய நடவடிக்கை எடுக்க தமிழ்நாடு அரசின் மக்கள் நல்வாழ்வு மற்றும் குடும்பநலத் துறை மற்றும் மாவட்ட ஆட்சியாளர்கள் முழு வீச்சில் போர்க்கால அடிப்படையில் செயல்பட்டு வருகின்றனர். பொதுமக்கள் இதுபற்றி அச்சப்படத் தேவையில்லை, என்றாலும்,

பரிசோதனை

அடிக்கடி கைகளை சோப்பு போட்டு சுத்தம் செய்து கொள்வதன் மூலமும், சளி, இருமல் பாதிக்கப்பட்டவர்கள் கைக்குட்டை, முகக்கவசம் போன்றவற்றை பயன்படுத்துவதன் மூலமும் இதுபோன்ற தொற்றுநோய் பரவுவதைத் தடுக்க முடியும். அதுமட்டுமல்லாமல், காய்ச்சல், சளி, இருமல், மூச்சுத் திணறல் ஏதாவது ஏற்பட்டால், உடனடியாக அருகிலுள்ள மருத்துவமனைக்குச் சென்று பரிசோதனை செய்து கொள்ள வேண்டும் என்றும் இந்த நேரத்தில் தெரிவிக்க விரும்புகின்றேன்.

கொரோனா நோய் இதுவரை வரவில்லை

நம்முடைய தமிழகத்தில் கொரோனா நோய் இதுவரை வரவில்லை, அந்த பயம் நமக்குத் தேவையில்லை. இருந்தாலும், நாம் முன்னெச்சரிக்கையாக இருக்க வேண்டுமென்பதற்காக இதை நான் தெரிவிக்கின்றேன். அதேபோல, இதுபற்றி எடுக்கப்படும் தொடர்நடவடிக்கைகள் பற்றி ஆய்வை நானும் நேரடியாக மேற்கொள்ள உள்ளேன். எனவே பொதுமக்கள், தனிநபர் சுகாதாரத்திற்கு அதிக அளவு முக்கியத்துவம் தரவேண்டும் என இந்த நிகழ்ச்சியின் வாயிலாக கேட்டுக் கொள்கின்றேன். இதயதெய்வம் புரட்சித் தலைவி அம்மாவின் அரசு உங்களுடைய அரசு, மக்களுடைய அரசு, மக்கள் நலனை பேணிக் காப்பதிலே முதன்மை மாநிலமாக விளங்குகின்ற அரசு அம்மாவினுடைய அரசு என்பதைத் தெரிவித்துக் கொள்கிறேன்.

தரவரிசையில் முதலிடம்

இந்தியாவில் எத்தனை மாநிலங்கள் இருந்தாலும் கூட, இப்பொழுது மத்திய அரசின் மூலமாக அறிவிக்கப்பட்டது மத்திய அரசின் நல் ஆளுமைத் திறனுள்ள தரவரிசையில் முதலிடம் பெற்ற மாநிலம் தமிழ்நாடு. அதேபோல, துறைகள் வாரியாக மிகச் சிறப்பான முறையிலே நிர்வாகத் திறமையின் அடிப்படையில் இன்றைக்கு பல்வேறு சாதனைகளை புரிந்ததன் விளைவாக, இன்றைக்கு நம்முடைய மாநிலத்தில் தான், பல துறைகளிலே தேசிய விருதுகளைப் பெற்று சாதனை படைத்த அரசாக நம்முடைய அரசு திகழ்ந்து கொண்டிருக்கிறது என்பதை இந்த நேரத்திலே சுட்டிக்காட்டுகிறேன்.

பீடுநடை

எங்களுடைய அரசைப் பொறுத்தவரைக்கும், ஏழை, எளிய, ஒடுக்கப்பட்ட, தாழ்த்தப்பட்ட, கிராமப்புறத்தில் வாழ்கின்ற மக்களுடைய தேவைகளை அறிந்து, அவர்களுக்காக நன்மை செய்யக்கூடிய ஒரே அரசு அம்மாவினுடைய அரசு. புரட்சித் தலைவர் எம்.ஜி.ஆர் வழியிலே, புரட்சித் தலைவி அம்மா வழியிலே பீடுநடை போட்டு, தமிழகத்திலே ஏழை என்ற சொல் இல்லை என்ற நிலையை உருவாக்குவது தான் எங்களுடைய லட்சியம்.

இவ்வாறு பேசினார்.