இந்தியா மற்றவை

நிர்பயா வழக்கு குற்றவாளிகள் 4 பேருக்கு 20-ந்தேதி தூக்கு – டெல்லி நீதிமன்றம் உத்தரவு

புதுடெல்லி

நிர்பயா வழக்கு குற்றவாளிகள் 4 பேரையும் 20-ந்தேதி தூக்கில் போட டெல்லி நீதிமன்றம் உத்தரவிட்டுள்ளது.

டெல்லி மருத்துவ மாணவி நிர்பயா கற்பழித்து கொலை செய்யப்பட்ட வழக்கில் முகேஷ்குமார் சிங், பவன்குப்தா, வினய்குமார் சர்மா, அக்‌ஷய்குமார் சிங் ஆகிய 4 குற்றவாளிகளுக்கு டெல்லி நீதிமன்றம் தூக்கு தண்டனை விதித்தது. உச்சநீதிமன்றமும் இதனை உறுதி செய்தது.அவர்கள் தரப்பில் ஒவ்வொருவராக மாறி மாறி தாக்கல் செய்த கருணை மனு, மறுஆய்வு மனு, சீராய்வு மனு போன்ற சட்ட நடவடிக்கைகளால் அவர்களை தூக்கில் போடுவது 2 முறை தள்ளிப்போய் இருந்தது. இந்த நிலையில், குற்றவாளிகள் 4 பேரையும் மார்ச் 3-ந்தேதி தூக்கில் போட டெல்லி நீதிமன்றம் கடந்த 17-ந்தேதி உத்தரவிட்டது.

குற்றவாளிகளில் ஒருவரான பவன் குப்தா தரப்பில், உச்சநீதிமன்றத்தில் தாக்கல் செய்யப்பட்ட மறு சீராய்வு மனு தள்ளுபடி செய்யப்பட்ட நிலையில், கடந்த 2-ந்தேதி குடியரசுத் தலைவர் முன் கருணை மனு ஒன்று தாக்கல் செய்யப்பட்டது. இந்த மனுவும் தள்ளுபடியானது. இதனால் குற்றவாளிகள் 4 பேரின் கருணை மனுக்களும் தள்ளுபடி செய்யப்பட்டுள்ள நிலையில், அவர்களை தூக்கில் போடுவதற்கான சட்டப்பூர்வ தடை எதுவும் இல்லாத சூழல் உள்ளது.

கருணை மனு நிராகரித்து 14 நாட்களுக்குள் அதன் விவரம் சட்டப்படி குற்றவாளிக்கு தெரிவிக்கப்பட வேண்டும். இதனால் குற்றவாளி பவன் குமார் குப்தாவுக்கு 14 நாட்கள் அவகாசம் கிடைத்து உள்ளது. இதனால் 4 குற்றவாளிகளையும் தூக்கிலிடுவது தள்ளி வைக்கப்பட்டது.

இதை தொடர்ந்து டெல்லி உயர்நீதிமன்றம் மறு உத்தரவு வரும் வரை நிர்பயா குற்றவாளிகளின் தூக்கு தண்டனையை நிறுத்தி வைக்க உத்தரவிட்டு உள்ளது. இதனால் 3-வது முறையாக தூக்கு தண்டனை நிறைவேற்றம் தள்ளி போனது. இந்நிலையில், நிர்பயா வழக்கு குற்றவாளிகள் 4 பேருக்கும் வரும் 20-ந்தேதி காலை 5.30 மணியளவில் தூக்கு தண்டனை நிறைவேற்ற டெல்லி நீதிமன்றம் புதிய உத்தரவை பிறப்பித்து உள்ளது.