திண்டுக்கல்

தமிழக மக்கள் முன்னேற்றத்துக்கு பாடுபடும் ஒரே இயக்கம் கழகம் – மாவட்ட கழக செயலாளர் வி.மருதராஜ் பேச்சு

திண்டுக்கல்

தமிழக மக்கள் முன்னேற்றத்துக்கு பாடுபடும் ஒரே இயக்கம் கழகம் தான் என்று திண்டுக்கல் மாவட்ட கழக செயலாளர் வி.மருதராஜ் கூறினார்.

திண்டுக்கல் மாவட்டம் ஆத்தூர் ஒன்றிய கழகம் சார்பில் சித்தரேவு கிராமத்தில் புரட்சித்தலைவி அம்மா அவர்களின் 72-வது பிறந்த நாள்விழா மற்றும் தமிழக அரசின் பட்ஜெட் விளக்க பொதுக்கூட்டம் நடைபெற்றது. இக்கூட்டத்திற்கு ஆத்துர் ஒன்றிய செயலாளரும், முன்னாள் சட்டமன்ற உறுப்பினருமான பி.கே.டி.நடராஜன் தலைமை தாங்கினார். ஒன்றிய எம்.ஜி.ஆர் இளைஞரணி செயலாளர் தங்கவேல், சித்தையன்கோட்டை நகர செயலாளர் அக்பர்அலி, அய்யம்பாளையம் நகர செயலாளர் சவுந்தரபாண்டியன், சின்னாளபட்டி நகர செயலாளர் கணேஷ்பிரபு ஆகியோர் முன்னிலை வகித்தனர்.

இக்கூட்டத்தில் திண்டுக்கல் மாவட்ட கழக செயலாளரும், மத்திய கூட்டுறவு வங்கி தலைவருமான வி.மருதராஜ் பேசியதாவது:-

புரட்சித்தலைவர் எம்.ஜி.ஆர். கழகத்தை வழிநடத்தும் பொறுப்பை புரட்சித்தலைவி அம்மா அவர்களிடம் ஒப்படைத்தார். அதனைத் தொடர்ந்து அம்மா மறைவுக்கு பின் இரட்டை குழல் துப்பாக்கி போல் முதல்வரும், துணை முதல்வரும் சிறப்பாக கட்சியையும், ஆட்சியையும் வழிநடத்தி வருகின்றனர். அம்மாவின் வழியில் ஏராளமான நலத்திட்டங்களை வழங்கி வருகின்றனர்.

கழக ஆட்சியில் தான் தமிழகம் முன்னேற்றப் பாதையில் பீடுநடை போட்டுக் கொண்டிருக்கிறது. நாடாளுமன்றத்தில் மத்திய அரசு குடியுரிமை திருத்த சட்டத்தை கொண்டு வந்த போது திமுக மற்றும் கூட்டணி கட்சியினர் 39 எம்.பி.க்கள் இருந்தனர். அப்போது எவ்வித நடவடிக்கையும் எடுக்காமல் வாய்மூடி மவுனியாக இருந்துவிட்டு தமிழக சட்டசபையில் வந்து பேசுவது நியாயமா? தமிழகத்தில் உள்ள முஸ்லிம் மற்றும் சிறுபான்மை மக்களுக்கு ஏதேனும் பாதகம் ஏற்பட்டால் முதலில் அரணாக நிற்பவர்கள் எங்களது அம்மாவின் வழிவந்த முதல்வர் மற்றும், துணை முதல்வர், அமைச்சர்கள் மட்டுமே.
ஆற்று மணலை கூட எண்ணி விடலாம். ஆனால், அம்மா ஆட்சியில் இன்று வரை செயல்படுத்தப்பட்ட திட்டங்களை எண்ண முடியாது. அந்த அளவிற்கு சாதனைகளை செய்து வருகிறோம்.

மத்திய அரசுடன் தமிழக அரசு இணக்கமாக செல்வதினால் தமிழக மக்களின் நலனுக்காக 11 அரசு மருத்துவ கல்லூரிகள் கிடைத்துள்ளன. அதே சமயம் கடந்த ஆட்சியின் போது மத்திய அரசில் அங்கம் வகித்த திமுகவினர் கருணாநிதியின் குடும்ப உறுப்பினர்களுக்கு பதவி மற்றும் பொருளாதார உயர்வுக்கான பதவிகளை தான் கேட்டு பெற்றார்கள். ஆனால், தமிழக மக்களுக்கு எந்தவிதமான நன்மை பயக்கும் திட்டங்களை கேட்டு பெற்றதில்லை.

இதிலிருந்து நீங்களே யோசித்து பாருங்கள். தமிழக மக்களின் முன்னேற்றத்துக்கு பாடுபடும் ஒரே இயக்கம் அதிமுக. இன்னும் ஓராண்டில் தமிழகத்திற்கு பல்வேறு திட்டங்களை தமிழக அரசு செயல்படுத்த உள்ளது. மக்கள் இப்போதும் எப்போதும் தெளிவாக புரிந்து விட்டார்கள். வரும் சட்டமன்ற தேர்தலில் 200 இடங்களுக்கு மேல் அமோக வெற்றிபெற செய்வோம் என்று பொதுமக்கள் தயாராக இருக்கிறார்கள்.

இவ்வாறு மாவட்ட கழக செயலாளர் வி.மருதராஜ் பேசினார்.

இந்த கூட்டத்தில் முன்னாள் சித்தரேவு கூட்டுறவு சங்க தலைவர் விஜயன், முன்னாள் சித்தரேவு ஊராட்சி மன்ற தலைவர் ஜெயராஜ் உள்பட பலர் கலந்து கொண்டனர்.