சிறப்பு செய்திகள்

கோவையில் 22-ந்தேதி 72 ஜோடிகளுக்கு இலவச திருமணம் – கால்கோள் விழாவை அமைச்சர் எஸ்பி.வேலுமணி தொடங்கி வைத்தார்

கோவை

புரட்சித்தலைவி அம்மா அவர்களின் 72-வது பிறந்த நாளையொட்டி கோவை புறநகர் மாவட்ட கழகம் சார்பில் ஏழை எளிய குடும்பங்களை சேர்ந்த 72 ஜோடிகளுக்கு பேரூர் செட்டிபாளையத்தில் வருகிற 22-ந்தேதி திருமணம் நடைபெற உள்ளது. இதற்கான கால்கோள் விழாவை அமைச்சர் எஸ்.பி.வேலுமணி தொடங்கி வைத்தார்.

புரட்சித்தலைவி அம்மா அவர்களின் 72-வது புனித பிறந்தநாளையொட்டி கோவை புறநகர் மாவட்ட கழகம் சார்பில் ஏழை எளிய குடும்பங்களை சேர்ந்த 72 ஜோடி மணமக்களுக்கு 72 வகை சீர்வரிசை பொருட்களுடன் கோவை மாவட்டம் பேரூர் செட்டிபாளையத்தில் வருகிற 22-ந்தேதி திருமணம் நடைபெற உள்ளது.

இதையொட்டி கழக அமைப்புச் செயலாளரும், கோவை புறநகர் மாவட்டக் கழகச் செயலாளரும், நகராட்சி நிர்வாகம், ஊரக வளர்ச்சி மற்றும் சிறப்புத் திட்டங்கள் செயலாக்கத்துறை அமைச்சருமான எஸ்.பி.வேலுமணி கோவை பேரூர் செட்டிபாளையத்தில் கால்கோள் விழாவினைதொடங்கி வைத்தார்.

பின்னர் அமைச்சர் எஸ்.பி.வேலுமணி செய்தியாளர்களிடம் கூறியதாவது:-

புரட்சித்தலைவி அம்மா அவர்களின் 72-வது பிறந்த நாள் விழா கோவை மாவட்டத்தில் உள்ள 10 தொகுதிகளிலும் பல்வேறு நலத்திட்ட உதவிகளை வழங்கி சிறப்பாக கொண்டாடப்பட்டு வருகிறது. மேலும் கோவை புறநகர் மாவட்ட கழகம் சார்பில் முதலமைச்சர் எடப்பாடி கே.பழனிசாமி, துணை முதலமைச்சர் ஓ.பன்னீர்செல்வம் ஆகியோர் வழிகாட்டுதலின்படி
வருகிற 22-ந் தேதி புரட்சித்தலைவி அம்மா அவர்களின் 72-வது பிறந்த நாளையொட்டி 72 ஜோடி ஏழை எளிய மணமக்களுக்கு 72 சீர்வரிசை பொருட்களுடன் பேரூர் செட்டிபாளையத்தில் திருமணம் நடைபெற உள்ளது.

புரட்சித்தலைவி அம்மா அவர்கள் கொண்டு வந்த திட்டங்களை தமிழகத்தில் சிறப்பாக செயல்படுத்தியதோடு மட்டுமல்லாமல் மக்களுக்கு தேவையான திட்டங்களையும் முதல்வரும், துணை முதல்வரும் செயல்படுத்தி சிறப்பான ஆட்சியை தந்து வருகிறார்கள். இதனால் இந்தியாவிலேயே முதன்மை மாநிலமாக தமிழகம் விளங்குகிறது.

மேலும் முதலமைச்சர் எடப்பாடி கே.பழனிசாமி தமிழகத்திற்கு 11 மருத்துவ கல்லூரிகளை பெற்றுத்தந்து சரித்திர சாதனை படைத்துள்ளார். கோவை மாவட்டத்தில் 50 ஆண்டுகாலம் காணாத அற்புத வளர்ச்சித் திட்டங்கள் செயல்படுத்தப்பட்டு வருகிறது.கோவை மாவட்டத்தில் 142 ஆண்டுகள் இல்லாத வறட்சி வந்தபோது கூட சமாளித்தோம். கோவை மாவட்டத்தில் போதிய மழை பெய்து, அனைத்து நீர்நிலைகளும் நிரம்பி உள்ளது. அனைத்து குளங்களும் தூர்வாரப்பட்டு உள்ளது. குடிமராமத்து பணிகள் முழுமையாக கோவை மாவட்டத்தில் செயல்படுத்தப்பட்டுள்ளது. இதனால் கூடுதல் நீர் தேக்கி வைக்கப்பட்டுள்ளது.

இவ்வாறு அமைச்சர் எஸ்.பி. வேலுமணி கூறினார்.

இந்நிகழ்ச்சியில் மாநகர் மாவட்ட கழக செயலாளர் பி.ஆர்.ஜி.அருண்குமார் எம்.எல்.ஏ,சட்டமன்ற உறுப்பினர்கள் அம்மன் கே.அர்ச்சுனன், வி.சி.ஆறுகுட்டி, ஓகே. சின்ராஜ், எட்டிமடை சண்முகம், கஸ்தூரி வாசு, வி.பி.கந்தசாமி மற்றும் மாவட்ட கழக நிர்வாகிகள், மாவட்ட சார்பு அணி நிர்வாகிகள் உள்பட பலர் கலந்து கொண்டனர்.