தற்போதைய செய்திகள்

கருப்பாயூரணியில் மாபெரும் கபடி போட்டி : அமைச்சர்கள் மற்றும் எம்.எல்.ஏ. தொடங்கி வைத்தனர்

மதுரை

பிரதமர் ஜனாதிபதி போன்ற உயர் பீடத்தில் இருப்பவர்கள் சிகிச்சை பெறும் எய்ம்ஸ் மருத்துவமனையை தமிழகத்தில் உருவாக்கித் தந்தவர் முதலமைச்சர் என்று மதுரை புறநகர் மாவட்டத்தில் நடைபெற்றநிகழ்ச்சியில் அமைச்சர் திண்டுக்கல் சி.சீனிவாசன் பேசினார்.

புரட்சித்தலைவி அம்மா அவர்களின் 72-வது பிறந்த நாளையொட்டி மதுரை புறநகர் கிழக்கு மாவட்டம் மதுரை கிழக்கு ஒன்றிய கழகத்தின் சார்பில் மாபெரும் கபடி போட்டி கருப்பாயூரணியில் நடைபெற்றது. இந்நிகழ்ச்சிக்கு மதுரை கிழக்கு மாவட்ட கழக செயலாளர் வி.வி.ராஜன் செல்லப்பா தலைமை வகித்தார். மதுரை கிழக்கு ஒன்றிய கழக செயலாளர் தக்கார் பாண்டி, ஆர். செந்தில்குமார், கார்த்திகேயன் ஆகியோர் முன்னிலை வகித்தனர்.

இந்நிகழ்ச்சியில் அமைச்சர் திண்டுக்கல் சி.சீனிவாசன் பேசியதாவது:-

புரட்சித்தலைவி அம்மா அவர்களின் வழியில் செயல்பட்டு முதலமைச்சர் விளையாட்டு துறைக்கு அதிக நிதி ஒதுக்கியுள்ளார். அதேபோல் விளையாட்டு வீரர்களின் நீண்ட நாள் கோரிக்கையான வேலைவாய்ப்பில் 3 சதவீத இட ஒதுக்கீட்டை அறிவித்துள்ளார். அதேபோல் ஒவ்வொரு கிராமம் தோறும் விளையாடு திடலை அமைப்பதற்கான நல்ல சூழலை உருவாக்கி உள்ளார். இன்றைக்கு கல்வித்துறைக்கு மட்டும் ரூ.34,181 கோடி நிதி ஒதுக்கி உள்ளார்.

மத்திய அரசுடன் நாங்கள் ஜால்ரா போடுவதாக ஸ்டாலின் கூறி வருகிறார். நாங்கள் மத்திய அரசுடன் இணக்கமாக இருந்து தமிழகத்திற்கு தேவையான திட்டங்களை பெற்று வருகிறோம். இன்றைக்கு ஒரே ஆண்டில் 11 மருத்துவ கல்லூரிகளுக்கு அனுமதி பெற்று முதலமைச்சர் அடிக்கல் நாட்டுகிறார். தலைநகர் டெல்லியில் எய்ம்ஸ் மருத்துவமனையில் பிரதமர் முதல் குடியரசுத் தலைவர் வரை உள்ள உயர் பீடத்தில் இருப்பவர்கள் சிகிச்சை பெறுவார்கள். அந்த எய்ம்ஸ் மருத்துவமனையை முதலமைச்சர் எடப்பாடி கே.பழனிசாமி மதுரையில் உருவாக்கியுள்ளார்.அவருக்கு உறுதுணையாக துணை முதலமைச்சர் இருக்கிறார்.

மத்திய அரசிடம் 14 ஆண்டுகள் அங்கம் வகித்த திமுக இதுபோன்ற திட்டங்களை பெற முடிந்ததா? தாங்கள் கொள்ளை அடிக்க மட்டும் வளம் கொழிக்கும் இலாகாக்களை பெற்றனர் திமுகவினர் என்பதை மக்கள் நன்கு உணர்ந்துள்ளனர். இந்துக்களும், முஸ்லிம்களும் மாமன் மச்சான்களாக இருந்து வருகின்றனர். ஆனால் ஸ்டாலின் தன் அரசியல் ஆதாயத்திற்காக சிறுபான்மை மக்களிடம் பிரிவினையை ஏற்படுத்துகிறார். அம்மாவின் வழியில் இன்றைக்கு முதலமைச்சர் சிறுபான்மையின மக்களுக்கு காவல் அரணாக உள்ளார். என்னால் பட்டியல் இட்டு சொல்ல முடியும். ஸ்டாலினால் சொல்ல முடியுமா?

தமிழகத்தின் கடன் சுமை அதிகமாக உள்ளது என்று எதிர்க்கட்சியினர் கூறி வருகின்றனர். மாநிலத்தில் கடன் அளவு மொத்த உற்பத்தியில் 25 சதவீதத்துக்குள் இருக்க வேண்டும் என்ற விதி உள்ளது. ஆனால் தமிழகத்தில் 21.33 சதவீதம் உள்ளது மற்ற மாநிலத்தை எடுத்துக் கொண்டால் ஆந்திராவில் 26.77 சதவீதம், மத்திய பிரதேசத்தில் 21. 90 சதவீதம், கேரளாவில் 29.78 சதவீதம், உத்திரபிரதேசத்தில் 32.16 சதவீதம், மேற்கு வங்காளத்தில் 29.71 சதவீதம் உள்ளது. மற்ற மாநிலங்களை காட்டிலும் தமிழகத்தில் கடன் கட்டுக்குள் இருக்கிறது.

திமுக ஆட்சியில் போடப்பட்ட பட்ஜெட் ரூ.80,000 கோடி தான். தற்பொழுது போடப்பட்டுள்ள பட்ஜெட் 2,40,992 கோடியாகும் இதில் ஒட்டுமொத்த பெண்கள் நலத்திற்காக ஒதுக்கப்பட்ட தொகை மட்டும்78,756 கோடியாகும். காவேரி டெல்டா பகுதிகளில் சிறப்பு வேளாண் மண்டலமாக அறிவித்ததன் மூலம் 28 லட்சம் ஏக்கர் நிலங்களில் 33 லட்சம் டன் உணவு தானிய உற்பத்தி செய்ய முடியும். ஆகவே ஒட்டுமொத்த தமிழக மக்களுக்கு திட்டங்களை வாரி வழங்கும் இந்த அரசுக்கு நீங்கள் மகத்தான ஆதரவைத் தரும் வண்ணம் நகர்ப்புற உள்ளாட்சி தேர்தலில் உங்கள் ஆதரவை தந்து அமோக வெற்றி பெறச் செய்யுமாறு கேட்டுக்கொள்கிறேன்.

இவ்வாறு அமைச்சர் திண்டுக்கல் சி.சீனிவாசன் பேசினார்.

கூட்டுறவுத்துறை அமைச்சர் செல்லூர் கே.ராஜூ பேசியதாவது:-

மக்களை கவரும் விளையாட்டுகள் மூன்று உள்ளன. அதில் கபடி, ஜல்லிக்கட்டு, கிரிக்கெட் ஆகியவை மக்களை ஈர்க்கும் விளையாட்டு ஆகும். ஆசியாவிலேயே மிகப்பெரிய விளையாடு திடலான நேரு ஸ்டேடியத்தை அம்மா திறந்து வைத்தார். அது மட்டுமல்லாது சர்வதேச தரத்தில் உள்விளையாட்டு அரங்கம், நீச்சல் குளங்கள் போன்றவை உருவாகி மட்டுமல்லாது 29 கோடி செலவில் உலக அளவில் மாபெரும் செஸ் போட்டியை சென்னையில் அம்மா நடத்தினார்.

அதுமட்டுமல்லாது விளையாட்டு வீரர்களுக்கு பொறியியல் கல்லூரி, மருத்துவக் கல்லூரி ஆகிய இடங்களில் இட ஒதுக்கீடு அளித்தார். தற்போது முதலமைச்சர் எடப்பாடி கே.பழனிசாமி விளையாட்டு வீரர்களுக்கு அம்மா வழியில் வேலைவாய்ப்பில் 3 சதவீத இட ஒதுக்கீட்டை அளித்துள்ளார்.

அதேபோல் கிராமம் தோறும் இன்றைக்கு விளையாட்டு போட்டிகள் அரசு சார்பில் நடத்தப்பட்டு வருகிறது. தற்போது முதலமைச்சர் கோப்பைக்கான விளையாட்டுப் போட்டிகள் நடைபெற்று வருகிறது. இதில் மதுரையில் உள்ள தமுக்கம் மைதானத்தில் 13, 14, 15 ஆகிய தேதிகளில் முதலமைச்சர் கோப்பைக்கான கபடி போட்டி நடைபெறுகிறது. இதில் அனைவரும் பங்கு ஏற்குமாறு கேட்டுக் கொள்கிறேன்.

இவ்வாறு அமைச்சர் செல்லூர் கே.ராஜூ பேசினார்.

மதுரை புறநகர் கிழக்கு மாவட்ட கழக செயலாளர் வி.வி.ராஜன்செல்லப்பா பேசியதாவது:-

இன்றைக்கு அம்மாவிற்கு அழியாப் புகழை உருவாக்கும் வண்ணம் நமது முதலமைச்சர் அம்மா பிறந்த பிப்ரவரி 24-ந்தேதியை மாநில பெண் குழந்தைகள் பாதுகாப்பு தினமாக அறிவித்துள்ளார். மேலும் காவேரி டெல்டா பகுதியை பாதுகாக்கப்பட்ட வேளாண் மண்டலமாக முதலமைச்சர் அறிவித்துள்ளார். இதன் மூலம் ஒட்டுமொத்த விவசாயிகளின் மனதை குளிர செய்து உள்ளார். அதனால்தான் இன்றைக்கு திருவாரூரில் ஒட்டுமொத்த விவசாயிகளும் திரண்டு முதலமைச்சருக்கு நன்றி தெரிவித்துள்ளனர்.

திமுக ஆட்சி காலத்தில் இது போன்ற திட்டங்கள் மூலம் ஒரு விவசாயிக்கு கூட ஸ்டாலின் நன்மை செய்தது உண்டா? இவர்கள் ஆட்சியில் தான் கூலி உயர்வு கேட்டு போராடிய தேயிலை தோட்ட தொழிலாளர்கள் மீது தடியடி நடத்தி அதில் 16 அப்பாவி விவசாய கூலி தொழிலாளர்கள் பலியானார்கள் என்பதை விவசாயிகள் மறக்கவில்லை என்பதை ஸ்டாலின் புரிந்து கொள்ள வேண்டும்.

இவ்வாறு அவர் பேசினார்.