தற்போதைய செய்திகள்

பெரம்பலூர் சர்க்கரை ஆலையில் இணை மின் உற்பத்தி நிலையம் – முதலமைச்சர் திறந்து வைத்தார்

சென்னை

முதலமைச்சர் எடப்பாடி கே.பழனிசாமி 6.3.2020 அன்று தலைமைச் செயலகத்தில், தொழில் துறை சார்பில் பெரம்பலூர் மாவட்டம், எறையூரில் அமைந்துள்ள பெரம்பலூர் சர்க்கரை ஆலையில் 138 கோடியே 86 லட்சம் ரூபாய் மதிப்பீட்டில் அமைக்கப்பட்டுள்ள 18 மெகாவாட் இணை மின் உற்பத்தி நிலையம் மற்றும் முடிவுற்ற ஆலை நவீனமயமாக்கல் பணிகளை துவக்கி வைத்தார்.

இது குறித்து அரசு வெளியிட்டுள்ள செய்திக்குறிப்பில் கூறியிருப்பதாவது:-

கூட்டுறவு மற்றும் பொதுத்துறை சர்க்கரை ஆலைகளின் வருவாயைப் பெருக்கிட தமிழ்நாடு அரசு 10 கூட்டுறவு சர்க்கரை ஆலைகள் மற்றும் 2 பொதுத்துறை சர்க்கரை ஆலைகளில் 964 கோடியே 88 லட்சம் ரூபாய் மதிப்பீட்டில் இணைமின் திட்டங்களையும், 276 கோடியே 27 லட்சம் ரூபாய் மதிப்பீட்டில் ஆலை நவீனமயமாக்கும் திட்டப் பணிகளையும் தமிழ்நாடு மின் உற்பத்தி மற்றும் பகிர்மானக் கழகம் மூலம் செயல்படுத்தி வருகின்றது.

அதன்படி, பெரம்பலூர் மாவட்டத்தில் அமைந்துள்ள பெரம்பலூர் சர்க்கரை ஆலையில் 138 கோடியே 86 லட்சம் ரூபாய் மதிப்பீட்டில் 18 மெகாவாட் இணைமின் உற்பத்தி நிலையம் மற்றும் முடிவுற்ற ஆலை நவீனமயமாக்கல் பணிகளை முதலமைச்சர் எடப்பாடி கே.பழனிசாமி துவக்கி வைத்தார். இதன் மூலம், இந்த ஆண்டு கரும்பு அரவைப் பருவத்தில் இணைமின் உற்பத்தி நிலையம் மற்றும் நவீனமயமாக்கப்பட்ட ஆலையில் உற்பத்தி துவக்கப்படும். மேலும், கரும்பு அரவைப் பகுதி இயந்திரங்களும், கொதிகலனும் புதிதாக நிறுவப்பட்டதால் இயந்திரப் பழுது குறைக்கப்பட்டு, கரும்பு குறித்த காலத்தில் அரைக்கப்பட்டு, விவசாயிகள் வெகுவாக பயன் அடைவார்கள்.

முதலமைச்சர் எடப்பாடி கே.பழனிசாமியிடம், தமிழ்நாடு தொழில் வளர்ச்சி நிறுவனத்தின் 2018-2019-ம் ஆண்டிற்கான தமிழ்நாடு அரசின் பங்கு ஈவுத் தொகையான 46 கோடியே 28 லட்சத்து 79 ஆயிரத்து 6 ரூபாய்க்கான காசோலையை தமிழ்நாடு தொழில் வளர்ச்சி நிறுவனத்தின் தலைவர் மற்றும் மேலாண்மை இயக்குநர் காகர்லா உஷா, தமிழ்நாடு தொழில் முன்னேற்ற நிறுவனத்தின் 2018-2019-ம் ஆண்டிற்கான தமிழ்நாடு அரசின் பங்கு ஈவுத் தொகையான 52 கோடியே 12 லட்சத்து 12 ஆயிரத்து 500 ரூபாய்க்கான காசோலையை தமிழ்நாடு தொழில் முன்னேற்ற நிறுவனத்தின் மேலாண்மை இயக்குநர் ஜெ.குமரகுரு பரன்,  தமிழ்நாடு தொழில் முதலீட்டுக் கழகத்தின் 2018-2019-ம் ஆண்டிற்கான தமிழ்நாடு அரசின் பங்கு ஈவுத் தொகையான 3 கோடியே 3 லட்சத்து 52 ஆயிரத்து 280 ரூபாய்க்கான காசோலையை தமிழ்நாடு தொழில் முதலீட்டுக் கழகத்தின் மேலாண்மை இயக்குநர் டாக்டர் மா.ஆர்த்தி ஆகியோர் வழங்கினர்.

இந்த நிகழ்ச்சியில், தொழில் துறை அமைச்சர் எம்.சி.சம்பத், அரசு தலைமைக் கொறடா எஸ்.இராஜேந்திரன், தலைமைச் செயலாளர் க.சண்முகம், தொழில் துறை முதன்மைச் செயலாளர் நா.முருகானந்தம், எரிசக்தித் துறை முதன்மைச் செயலாளர் (முழு கூடுதல் பொறுப்பு) ஆ.கார்த்திக், தமிழ்நாடு மின்உற்பத்தி மற்றும் பகிர்மானக் கழகத்தின் தலைவர் மற்றும் மேலாண்மை இயக்குநர் விக்ரம் கபூர், சர்க்கரைத் துறை ஆணையர் (முழு கூடுதல் பொறுப்பு) அஜய் யாதவ் மற்றும் அரசு உயர் அலுவலர்கள் கலந்து கொண்டனர்.

இவ்வாறு அரசு செய்திக்குறிப்பில் கூறப்பட்டுள்ளது.