சிறப்பு செய்திகள்

விவசாயிகள் மீதான வழக்குகளை திரும்ப பெற அரசு பரிசீலனை: முதல்வர் அறிவிப்பு

திருவாரூர்

விவசாயிகள் அச்சப்பட தேவையில்லை,சட்டம் உங்களுக்குத் துணை நிற்கும் என்றும் என்றும் போராட்டம் நடத்தியவர்கள் மீது போடப்பட்டுள்ள வழக்குகளை திரும்ப பெற அரசு பரிசீலனை செய்யும் என்று முதல்வர் பேசினார்.

திருவாரூரில் விவசாயிகள் சங்கம் சார்பில் நடைபெற்ற பாராட்டு விழாவில் முதலமைச்சர் எடப்பாடி கே.பழனிசாமிக்கு காவேரி காப்பாளர் பட்டத்தை விவசாயிகள் வழங்கி பாராட்டு தெரிவித்தனர்.
இந்த விழாவில் முதல்வர் எடப்பாடி கே.பழனிசாமி பேசியதாவது

10 நாட்கள்,6 மாதம்

நான் ஆட்சி பொறுப்பேற்றபொழுது, இவர் எப்படி ஆட்சி செய்வார்? என்று எண்ணிக் கொண்டிருந்தார்கள். எதிர்க்கட்சிகள் எரிகின்ற நெருப்பில் எண்ணை ஊற்றுவது போல், இவர் 10 நாட்கள் தான் முதலமைச்சராக இருப்பார், 1 மாதம் தான் முதலமைச்சராக இருப்பார், 3 மாதம் தான் முதலமைச்சராக இருப்பார், 6 மாதம் தான் முதலமைச்சராக இருப்பார் என்று சொன்னார்கள். இப்பொழுது எங்கள் அரசு மூன்றாண்டுகள் நிறைவு பெற்று நான்காம் ஆண்டில் அடியெடுத்து வைத்திருக்கின்றது.

முழுவதுமாக கற்றுக்கொள்ளவேண்டும்

நானும் புதியவனாக இருந்தேன். எனவே, ஆரம்ப காலக்கட்டத்தில் நன்கு தெரிந்து கொள்ள வேண்டும்.
விவசாயத் தொழில் மேற்கொள்கின்றபொழுது, நீ முதலில் விவசாயத்தை தெரிந்து கொண்டால் தான் மற்றவர்களை வேலை சொல்ல முடியும் என்று என்னுடைய தந்தை சொல்வார். என் தந்தை கூறியவாறு விவசாயப் பணிகள் முழுவதையும் நான் கற்றுக் கொண்ட காரணத்தினால் தான் நான் விவசாயி என்று சொன்னேன். அதேபோலத் தான் எந்த நிர்வாகமாக இருந்தாலும் முதலில் தெரிந்துகொள்ள வேண்டும், தெரிந்து கொண்டால் தான் நாம் அவர்களிடத்தில் வேலை வாங்க முடியும், அப்படி வேலை வாங்கினால் தான் அதன் மூலம் மக்களுக்கு நன்மை கிடைக்கும். அந்த அடிப்படையில் பொறுமையாக இருந்து முழுவதையும் இந்த மூன்றாண்டு காலத்தில் தெரிந்து கொண்டேன். அதன் விளைவு தான் உங்களுக்கு சட்டமாக இயற்றப்பட்டு டெல்டா பகுதி பாதுகாக்கப்பட்ட வேளாண் மண்டலமாக கொடுக்கப்பட்டிருக்கிறது.

வழக்குகள் திரும்பபெற பரீசீலனை

இங்கே அமைச்சர் காமராஜ் உட்பட, மேடையில் வீற்றிருக்கின்ற விவசாய சங்கத் தலைவர்கள், விவசாயப் பிரதிநிதிகள், எங்களுடைய வாழ்வாதாரம் பாதிக்கப்படும் என்பதற்காக உரிமைக் குரல் கொடுத்துக் கொண்டிருந்தோம், அந்தக் காலக்கட்டத்தில் காவல் துறையினரால் பல்வேறு வழக்குகள் எங்கள் மீது தொடரப் பட்டிருக்கிறது, அதை நீங்கள் திரும்பப் பெற வேண்டுமென்று கோரிக்கை வைத்தார்கள். அரசு அதனைப் பரிசீலித்து உரிய நடவடிக்கை எடுக்கப்படும் என்ற செய்தியை இந்த நேரத்திலே தெரிவிக்க விரும்புகின்றேன். சட்டம் என்பது பொதுவானது, சட்டத்தின் அடிப்படையில், அந்தக் காலக்கட்டத்தில் அதுபோன்ற நடவடிக்கைகள் எடுக்கப்பட்டன. இன்றையதினம் அது முடிவுக்கு வந்து விட்டது. உரிய நேரத்தில் உரிய முடிவு எடுக்கப்படும் என்பதையும் இந்த நேரத்திலே தெரிவித்துக் கொள்கிறேன்.

சிலருக்கு சந்தேகம்

அதுமட்டுமல்ல, விவசாயப் பெருங்குடி மக்கள், இன்னும் பலர் சந்தேகத்தை எழுப்பிக் கொண்டிருக்கிறார்கள். அண்மையில்கூட திராவிட முன்னேற்றக் கழகத்தைச் சேர்ந்த நாடாளுமன்ற உறுப்பினர், மத்திய அரசு நிறைவேற்றக் கூடிய சட்டத்தை எப்படி மாநில அரசு நிறைவேற்ற முடியும்? என்று நாடாளுமன்றத்திலே ஒரு கேள்வியை எழுப்பியுள்ளார். எனக்கு முன்னால் விவசாயச் சங்கப் பிரதிநிதிகள் சொன்னதைப் போல, சிலருக்கு இது பிடிக்கவில்லை. இந்தச் சட்டம் நிறைவேற்றப்பட்டதே பிடிக்கவில்லை. இந்தச் சட்டத்தை நிறைவேற்றும்பொழுதே சிலர் வெளிநடப்பு செய்தார்கள். இதனை மக்களும், விவசாயிகளும் தெரிந்து கொண்டால் போதும். யார் விவசாயிகள் பக்கம் இருக்கின்றார்கள் என்பதை நீங்கள் உணர்வுப்பூர்வமாகத் தெரிந்து கொள்ளுங்கள்.

அச்சப்படத் தேவையில்லை

இப்பொழுது சட்டம் நிறைவேற்றப்பட்டு, அரசிதழில் வெளியிடப்பட்டு ரெங்கநாதன் குறிப்பிட்டதைப் போல உங்களிடத்திலே கொடுத்து விட்டோம். இதிலும் ஒரு சந்தேகத்தை தமிழ்நாட்டைச் சேர்ந்த நாடாளுமன்ற உறுப்பினர் நாடாளுமன்றத்தில் எழுப்பிகிறார் என்றால் அவர்கள் எவ்வளவு கோபத்தில் இருக்கிறார்கள் என்று எண்ணிப் பாருங்கள். மாநில அரசிற்கு அனைத்து உரிமையும் இருக்கிறது என்று மத்திய சுற்றுச்சூழல் துறை அமைச்சர் தெளிவாகச் சொல்லிவிட்டார். இவ்வளவு இடர்பாடுகளுக்கு இடையிலும், உங்களுடைய பல ஆண்டுகால உரிமைக் குரலுக்கு எங்கள் அரசு நல்ல சட்டத்தை இயற்றிக் கொடுத்திருக்கிறது என்பதை இந்த நேரத்திலே தெரிவித்துக் கொள்கிறேன். டெல்டா பகுதி விவசாயிகள் அச்சப்படத் தேவையில்லை. இனி எந்தக் காலத்திற்கும் இந்தச் சட்டம் உங்களுக்குத் துணை நிற்கும் என்பதை ஆணித்தரமாகச் சொல்கிறேன்.

கட்சி பாகுபாடு கிடையாது

என்னைப் பொறுத்தவரைக்கும், விவசாயி என்று சொல்கிறபொழுது கட்சி பாகுபாடு இல்லாமல் தான் நான் பேசிக் கொண்டிருக்கிறேன். பல்வேறு அரசியல் கட்சிகளில் விவசாயிகள் இருக்கிறார்கள். மேடையில் வீற்றிருப்பவர்களும் கட்சி சார்பற்ற விவசாய சங்கத் தலைவர்கள் தான். இப்படிப்பட்ட விவசாயிகள் இந்த நன்றி பாராட்டுக் கூட்டம் ஏற்பாடு செய்தார்கள். எனவே, என்னைக் கலந்துகொள்ளக் கேட்டவுடன் நான் நான் நிச்சயமாக உங்களின் நன்றி பாராட்டு விழாவில் கலந்து கொள்கிறேன் என்று சொன்னேன். அவர்களும் நடுநிலைமையோடு பேசிக் கொண்டிருக்கிறார்கள். விவசாயிகளுக்கு ஏற்படுகின்ற பிரச்சினைகளைத் தீர்க்க அரசை நாடி, தீர்வு காண வேண்டும் என்ற விவசாயிகளின் எண்ணம் எங்களுடைய அரசால் நிறைவேற்றப்பட்டிருக்கிறது.இவ்வாறு பேசினார்.