சிறப்பு செய்திகள்

தலைமைக் கழகத்தில் மகளிர் தினவிழா: ஒருங்கிணைப்பாளர் தலைமையில் உற்சாக கொண்டாட்டம்

 

சென்னை

தலைமைக்கழகத்தில் மகளிர் தினவிழா ஒருங்கிணைப்பாளர் தலைமையில் உற்சாமாக  கொண்டாடப்பட்டது.
புரட்சித் தலைவி அம்மா அவர்களின் 72-ஆவது பிறந்த நாளை முன்னிட்டும்,சர்வதேச மகளிர் தினத்தை முன்னிட்டும், கழக மகளிர் அணியின் சார்பில் ஏழை, எளியோருக்கு பல்வேறு நலத் திட்ட உதவிகளை வழங்கி, சிறப்பாகக் கொண்டாடப்பட்டது.

அம்மாவின் பிறந்தநாள்

அனைத்திந்திய அண்ணா திராவிட முன்னேற்றக் கழக நிரந்தரப் பொதுச் செயலாளர் புரட்சித் தலைவி அம்மா அவர்களின் பிறந்தநாளை முன்னிட்டும், சர்வதேச மகளிர் தினத்தை முன்னிட்டும், அனைத்திந்திய அண்ணா திராவிட முன்னேற்றக் கழக மகளிர் அணியின் சார்பில், தலைமைக் கழகத்தில் இன்று காலை நடைபெற்ற நிகழ்ச்சியில் கலந்துகொள்வதற்காக வருகை தந்த, கழக ஒருங்கிணைப்பாளரும், தமிழ் நாடு துணை முதலமைச்சருமான ஓ. பன்னீர்செல்வம் அவர்களை, தலைமைக் கழக வளாகத்தில் பெருந்திரளாகத் திரண்டிருந்த கழக மகளிர் அணியினர் பூரண கும்ப மரியாதை அளித்து, பூச்செண்டுகள் வழங்கி உற்சாகத்துடன் வரவேற்றனர். மகளிர் அணியினர் அளித்த வரவேற்பை இன்முகத்தோடு ஏற்றுக்கொண்ட கழக ஒருங்கிணைப்பாளரும், தமிழ் நாடு துணை முதலமைச்சருமான ஓ. பன்னீர்செல்வம் அனைவருக்கும் தமது இனிய மகளிர் தின நல்வாழ்த்துகளைத் தெரிவித்துக்கொண்டார்.

மரியாதை

நிகழ்ச்சியின் தொடக்கமாக, கழக ஒருங்கிணைப்பாளரும், தமிழ் நாடு துணை முதலமைச்சருமான ஓ. பன்னீர்செல்வம் அவர்கள், தலைமைக் கழக நுழைவு வாயிலில் வைக்கப்பட்டுள்ள புரட்சித் தலைவர் எம்.ஜி.ஆர்., புரட்சித் தலைவி அம்மா ஆகியோரது திருஉருவப் படங்களுக்கும், தலைமைக் கழக வளாகத்தில் நிறுவப்பட்டுள்ள புரட்சித் தலைவர் எம்.ஜி.ஆர்., புரட்சித் தலைவி அம்மா ஆகியோரது திருஉருவச் சிலைகளுக்கும் மலர் தூவி மரியாதை செலுத்தினார்.

வாழ்த்து

அதனைத் தொடர்ந்து, கழக ஒருங்கிணைப்பாளரும், தமிழ் நாடு துணை முதலமைச்சருமான ஓ. பன்னீர்செல்வம் அனைவரையும் வரவேற்று மகளிர் தின வாழ்த்துகளைத் தெரிவித்து சிறப்புரை ஆற்றினார். பின்னர், கழக மகளிர் அணியின் சார்பில் தயார் செய்யப்பட்டிருந்த கேக்கினை வெட்டி அனைவருக்கும் வழங்கினார்.

நலத்திட்ட உதவிகள்

அடுத்ததாக, கழக ஒருங்கிணைப்பாளரும், தமிழ் நாடு துணை முதலமைச்சருமான ஓ. பன்னீர்செல்வம் அவர்கள் தமது அன்புக் கரங்களால், கழக மகளிர் அணியின் சார்பில் ஏற்பாடு செய்யப்பட்டிருந்தபடி, தென் சென்னை வடக்கு மாவட்டம், லாயிட்ஸ் காலனியைச் சேர்ந்த ஆதிராவுக்கு லேப்டாப்பும், ராயப்பேட்டை, அவ்வை சண்முகம் சாலையைச் சேர்ந்த கோவிந்தம்மாவுக்கு மாவு அரைக்கும் இயந்திரமும், திருவள்ளூர் கிழக்கு மாவட்டம், வளசரவாக்கம், 152-வது வட்டத்தைச் சேர்ந்த சுபாஷினிக்கு தையல் மெஷினும், தென் சென்னை வடக்கு மாவட்டம், அரும்பாக்கம், 105-ஆவது வட்டத்தைச் சேர்ந்த மஞ்சுளாவுக்கு இஸ்திரிப் பெட்டியும், ஆயிரம்விளக்கு பகுதி, 117-வது வட்டத்தைச் சேர்ந்த சசிரேகாவுக்கு இட்லி பாத்திரமும், காஞ்சிபுரம் கிழக்கு மாவட்டம், நன்மங்கலம் ஊராட்சி, 7-ஆவது வார்டைச் சேர்ந்த பூங்கொடிக்கு அன்னகூடையும், வட சென்னை தெற்கு மாவட்டம், சேத்துபட்டு, 107-ஆவது வட்டத்தைச் சேர்ந்த கலைச்செல்விக்கு எவர்சில்வர் குடமும், தென் சென்னை தெற்கு மாவட்டம், ஆ. ஏ. புரம், 171-ஆவது வட்டத்தைச் சேர்ந்த பத்மாவுக்கு தள்ளுவண்டியும், தென் சென்னை வடக்கு மாவட்டம், ராயப்பேட்டை, 119-ஆவது வட்டத்தைச் சேர்ந்த சித்ராக்கு ஹாட்பாக்சும், திருவள்ளூர் மேற்கு மாவட்டம், மீஞ்சூர் ஒன்றியம், பொன்னேரி, 3-வது வார்டைச் சேர்ந்த ஷமிளாக்கு புடவையும் வழங்கி, வாழ்த்து கூறினார்.

ஆக மொத்தம், ஒருவருக்கு லேப்டாப், 4 பேருக்கு மாவு அரைக்கும் இயந்திரம், 20 பேருக்கு தையல் மெஷின், 27 பேருக்கு இஸ்திரிப் பெட்டி, 30 பேருக்கு இட்லி பாத்திரம், 200 பேருக்கு எவர்சில்வர் குடம், 100 பேருக்கு அன்னகூடை, 200 பேருக்கு 11/2 லிட்டர் ஹாட்பாக்ஸ், 6 பேருக்கு தள்ளுவண்டி, 1200 பேருக்கு புடவை முதலான நலத்திட்ட உதவிகளும், 2000 பேருக்கு மதிய உணவும் வழங்கப்பட்டது.

மகளிர் அணி ஏற்பாடு

புரட்சித் தலைவி அம்மா அவர்களின் பிறந்தநாள் விழா மற்றும் சர்வதேச மகளிர் தின விழாவை சிறப்பாகக் கொண்டாடுவதற்கான ஏற்பாடுகளை, கழக மகளிர் அணிச் செயலாளரும், கழக மாநிலங்களவைக் குழு கொறடாவுமான விஜிலா சத்தியானந்த், எம்.பி, கழக மகளிர் அணி இணைச் செயலாளர் கீர்த்திகா முனியசாமி, கழக மகளிர் அணி இணைச் செயலாளரும், சமூக நலம் மற்றும் சத்துணவுத் திட்டத் துறை அமைச்சருமான டாக்டர் ஏ. சரோஜா ஆகியோர் செய்திருந்தனர்.

எழுச்சிமிகு வரவேற்பு

இன்றைய நிகழ்ச்சியில், தலைமைக் கழக நிர்வாகிகளும், அமைச்சர் பெருமக்களும், மாவட்டக் கழகச் செயலாளர்களும், முன்னாள் அமைச்சர்களும், முன்னாள் நாடாளுமன்ற, சட்டமன்ற உறுப்பினர்களும், கழக மகளிர் அணியில் பல்வேறு பொறுப்புகளில் பணியாற்றி வரும் நிர்வாகிகளும், கழக மகளிர் அணியினரும், கழக நிர்வாகிகளும்,
கழக உடன்பிறப்புகளும் பெருந்திரளான அளவில் கலந்துகொண்டு சிறப்பித்தனர். மேலும், தலைமைக் கழக வளாகம் அமைந்துள்ள பகுதியில், சாலையின் இரு மருங்கிலும் கழகக் கொடித் தோரணங்கள் அழகுற அமைக்கப்பட்டு, செண்டை மேளம் முழங்க எழுச்சிமிகு வரவேற்பு வழங்கப்பட்டது.