சிறப்பு செய்திகள்

க.அன்பழகன் உள்ளிட்ட மறைந்த சட்டமன்ற உறுப்பினர்களுக்கு பேரவையில் இரங்கல்

சென்னை,

க.அன்பழகன் உள்ளிட்ட மறைந்த சட்டமன்ற உறுப்பினர்களுக்கு பேரவையில் இரங்கல் தெரிவிக்கப்பட்டது.

இரண்டாவது அமர்வு

தமிழக சட்டப்பேரவையின் நிதி நிலை அறிக்கை மீதான கூட்டத்தொடர் கடந்த மாதம் 14- ம் தேதி தொடங்கியது. அன்று 2020 -2021-ம் ஆண்டுக்கான தமிழக நிதி நிலை அறிக்கையை நிதி அமைச்சர் ஓ.பன்னீர்செல்வம் தாக்கல் செய்தார். அதைத் தொடர்ந்து 4 நாட்கள் விவாதம் நடந்து முடிந்து தொடர்ந்து கூட்டம் ஒத்திவைக்கப்பட்டது.

இதைத்தொடர்ந்து மானிய கோரிக்கை விவாதங்கள் குறித்து ஆய்வு நடத்த, நிதி நிலை அறிக்கை மீதான கூட்டத்தொடரின் 2-வது அமர்வை மார்ச் 9- ம் தேதி தொடங்கி ஏப்ரல் 9 ம் தேதி வரை 23 நாட்கள் நடத்த முடிவு செய்யப்பட்டது.

இரங்கல் குறிப்பு

இதன்படி தமிழக சட்டப்பேரவை மீண்டும் நேற்ற கூடியது. பேரவை கூடியதும், சட்டமன்ற உறுப்பினர்கள் மறைவுக்கு இரங்கல் தெரிவிக்கப்பட்டது. முன்னாள் உறுப்பினர் சந்திரன்(பெரணமல்லூர்), சட்டமன்ற உறுப்பினர்கள் கே.பி.பி.சாமி (திருவொற்றியூர்), காத்தவராயன் (குடியாத்தம்) ஆகியோரின் மறைவுக்கு இரங்கல் தெரிவிக்கப்பட்டது. பேரவை தலைவர் ப.தனபால் இரங்கல் குறிப்பு வாசித்தார்.

மறைந்தவர்களுக்கு மரியாதை செலுத்தும் வகையில் 2 நிமிடம் எழுந்து நின்று மவுன அஞ்சலி செலுத்தப்பட்டது
இதனை தொடந்து மறைந்த திமுக பொதுச்செயலாளரும், முன்னாள் அமைச்சருமான க.அன்பழகன் மறைவுக்கு இரங்கல் தீர்மானம் நிறைவேற்றப்பட்டது.

க.அன்பழகன் மறைவுக்கு இரங்கல் தீர்மானம்

க.அன்பழகன் மறைவு குறித்து பேரவை தலைவர் ப. தனபால் இரங்கல் தீர்மானத்தில் பேசியதாவது க.அன்பழகன் முன்னாள் அமைச்சராகவும், அவை முன்னவராகவும் பணியாற்றியவர். திராவிட இயக்கத்தின் முன்னோடியாக திகழ்ந்தவர். பெரியார், அண்ணா, எம்ஜிஆர், கருணாநிதி ஆகியோரோடு அரசியலில் பயணித்தவர். பகுத்தறிவு, சமூகநீதி, மொழி உரிமைக்காக போராடியவர்.

1957 ம் ஆண்டு முதல் 2011 ம் ஆண்டு வரை 9 முறை சட்டபேரவை உறுப்பினராக பணியாற்றியவர். 1962 67 ம் ஆண்டுகளில் மேலவை உறுப்பினராகவும், 1967 71 ம் ஆண்டுகளில் திருச்செங்கோடு தொகுதியில் இருந்து மக்களவைக்கு தேர்ந்தெடுக்கப்பட்டவர். மக்கள் நல்வாழ்வு துறை, கல்வி, நிதி துறை அமைச்சராக திறம்பட பணியாற்றியவர்.

எதிர்கட்சி தலைவர்

எதிர்கட்சி தலைவராகவும் பொறுப்பு வகித்துள்ளார். ஜனநாயக முறைப்படி பேரவை நடைபெற உதவியவர். விவாதம் திசைமாறி செல்வதை அவர் அனுமதித்ததில்லை. அவர் கடந்த 7.3.2020 ந் தேதி அன்று மரணமடைந்ததை அறிந்து அதிர்ச்சியும் ஆற்றொண்ணா துயரமும் அடைந்தேன். அன்னாருக்கு ஆழந்த இரங்கலை தெரிவித்து கொள்கிறேன் என்றார்.

அதைத் தொடர்ந்து உறுப்பினர்கள் 2 நிமிடம் மவுன அஞ்சலி செலுத்தினார்கள். அவை 11 ம் தேதி புதன்கிழமைக்கு ஒத்திவைக்கப்பட்டது.