தற்போதைய செய்திகள்

தூத்துக்குடியில் 5000 பேருக்கு நலத்திட்ட உதவிகள் – அமைச்சர் கடம்பூர் செ.ராஜூ வழங்கினார்

தூத்துக்குடி

புரட்சித்தலைவி அம்மாவின் 72-வது பிறந்தநாளை முன்னிட்டு தூத்துக்குடி 49-வது வட்டம் 3 சென்ட் பகுதியில் தெற்கு மாவட்ட செயலாளர் எஸ்.பி.சண்முகநாதன் எம்.எல்.ஏ தலைமையில் 5000 பேருக்கு நலத்திட்ட உதவி வழங்கும் நிகழ்ச்சி நடந்தது. இதில் சிறப்பு விருந்தினராக கலந்து கொண்ட வடக்கு மாவட்டச் செயலாளரும், செய்தி மற்றும் விளம்பரத்துறை அமைச்சருமான கடம்பூர் செ.ராஜூ பயனாளிகளுக்கு நலத்திட்ட உதவிகளை வழங்கினார்.

பின்னர் அமைச்சர் கடம்பூர் செ.ராஜூ பேசியதாவது:-

புரட்சித்தலைவி அம்மா வாழ்ந்த காலங்களில் அவரது பிறந்தநாளை வெகு விமரிசையாக கழகத்தினர்களாகிய நாங்கள் கொண்டாடும் போது புரட்சித்தலைவி அம்மா எங்களை அழைத்து கூறும் ஆலோசனை என்ன தெரியுமா? மக்களால் நான் மக்களுக்காகவே நான் என்ற சமூக அர்ப்பணிப்போடு தமிழ்நாட்டு மக்களின் வளர்ச்சிக்காகவே இரவு பகல் பாராது மக்கள் பணி செய்து வாழ்ந்து வருகிறேன்.

எனக்கு சொந்தம் என்றால் தமிழக மக்கள் மட்டும் தான். நம் கழகத்தினர்களாகிய நீங்கள் எனக்கு செய்ய வேண்டியது என்னவென்றால் என்னுடைய பிறந்தநாளை முன்னிட்டு ஆடம்பர விழா எதுவும் கொண்டாடாமல் ஏழை எளிய மக்களுக்கு நலத்திட்ட உதவிகள் வழங்குங்கள். அதுபோல் ஏழைகளின் பசியை போக்கிடும் வகையில் அவர்களுக்கு அன்னதானம் வழங்குங்கள். அப்படி நீங்கள் செய்யும் நல்ல காரியங்களே எனக்கு மிகுந்த மன மகிழ்ச்சியை தரும் என்று புரட்சித்தலைவி அம்மா எங்களிடம் கூறுவார்கள்.

புரட்சித்தலைவி அம்மாவின் எண்ணத்திற்கேற்ப இங்கே நடைபெறும் புரட்சித்தலைவி அம்மாவின்72-வது பிறந்தநாளை முன்னிட்டு நடைபெறும் இந்த நிகழ்ச்சியில் கலந்துகொண்டு ‌மக்களுக்கு நலத்திட்ட உதவிகள் வழங்குவதில் நான் பெருமகிழ்ச்சி அடைகிறேன். இதுபோல் அம்மாவின் பிறந்தநாளை கொண்டாடும் நம் கட்சியினர் அனைவரும் நலத்திட்ட உதவிகளை ஏழை எளிய மக்களுக்கு ஏராளமாக வழங்க வேண்டும்.

இவ்வாறு அமைச்சர் கடம்பூர் செ.ராஜூ பேசினார்,

இந்நிகழ்ச்சியில் விளாத்திகுளம் தொகுதி சட்டமன்ற உறுப்பினர் பெ.சின்னப்பன், மாவட்ட மத்திய கூட்டுறவு வங்கி தலைவர் சுதாகர், மாவட்ட இந்து அறநிலையத்துறை தலைவர் மோகன், முன்னாள் மாவட்ட கவுன்சிலர் திருப்பாற்கடல், தெற்கு பகுதி செயலாளர் பி.என்.ராமகிருஷ்ணன், தெற்கு இணைச்செயலாளர் சண்முகத்தாய், வட்ட பிரதிநிதி டைமண்ட் ராஜ், பாலஜெயம், வழக்கறிஞர்கள் முனியசாமி சரவணப்பெருமாள், மாவட்ட மீனவர் அணி பி.சுரேஷ், முன்னாள் நகர செயலாளர் ஏசாதுரை, வசந்தா சகாயராஜ், தொழிலதிபர் ரமேஷ், தூத்துக்குடி மாநகர எம்..இளைஞர் அணி துணை செயலாளர் பி.ஜெகதீஸ்வரன் உட்பட ஏராளமானோர் கலந்து கொண்டனர்.