சிறப்பு செய்திகள்

கண்ணகி கலை மாவட்ட திட்டம்: அமைச்சர் எஸ்.பி.வேலுமணி துவக்கிவைத்தார்

சென்னை

கலை உணர்வை வளர்க்க கண்ணகி கலை மாவட்ட திட்டத்தை அமைச்சர் எஸ்.பி.வேலுமணி துவக்கிவைத்தார்.

பெருநகர சென்னை மாநகராட்சி மற்றும் ஸ்டார்ட் இந்தியா பவுண்டேஷன் நிறுவனத்தின் சார்பில் சோழிங்கநல்லூர் மண்டலம், துரைப்பாக்கம், கண்ணகி நகரில் தமிழ்நாடு குடிசை மாற்று வாரிய குடியிருப்பு கட்டிடங்களின் சுவர்களில் வண்ண ஓவியங்களுடன் கூடிய வர்ணம் பூசும் கண்ணகி கலை மாவட்ட திட்டத்திற்கான நிகழ்ச்சியினை நகராட்சி நிர்வாகம், ஊரக வளர்ச்சி மற்றும் சிறப்பு திட்டங்கள் செயலாக்கத்துறை அமைச்சர் எஸ்.பி.வேலுமணி , ஊரக தொழில்துறை அமைச்சர் பா.பென்ஜமின் ஆகியோர் இன்று துவக்கி வைத்தனர்.
பின்னர் இந்த நிகழ்ச்சியில் நகராட்சி நிர்வாகம், ஊரக வளர்ச்சி மற்றும் சிறப்பு திட்டங்கள் செயலாக்கத்துறை அமைச்சர் எஸ்.பி.வேலுமணி பேசியதாவது.

எழில்மிகு சென்னை

சென்னை மாநகரில் எழில்மிகு தோற்றத்தை உருவாக்கும் வகையில் பொது இடங்கள் மற்றும் அரசு கட்டடச் சுவர்களில் ஓவியங்களுடன் கூடிய வர்ணம் பூசும் பணி சிறப்பாக மேற்கொள்ளப்பட்டு வருகிறது. இத்திட்டத்தை செயல்படுத்தும் ஸ்டார்ட் இந்தியா அறக்கட்டளை பொது இடங்களில் ஓவியங்களின் மூலம் கலையை வளர்க்கும் ஒரு லாப நோக்கமற்ற தன்னார்வ அறக்கட்டளையாகும்.

கலை உணர்வு

2014ம் ஆண்டு முதல் இந்தியாவில் டெல்லி, மும்பை, பெங்களூரு, ஐதராபாத், சண்டிகர், கல்கத்தா, கோவா போன்ற பல்வேறு நகரங்களில் கலை தொடர்பான விழாக்களை இந்த அறக்கட்டளை நடத்தி வருகிறது.பெருநகர சென்னை மாநகராட்சியும், ஸ்டார்ட் இந்தியா அறக்கட்டளையும் இணைந்து சென்னையில் பொதுமக்களிடையே கலை உணர்வை வளர்க்கும் வகையில் கண்ணகி கலை மாவட்டம் என்ற திட்டத்தை துவங்கி உள்ளது. தமிழ்நாட்டில் இத்திட்டம் மேற்கொள்ளப்பட்டுள்ள முதல் நகரம் சென்னை. இது இந்தியாவிலேயே 5வது நகரமாகும். கலையை பொதுமக்களிடம் கொண்டு சேர்ப்பதும், அதை சமூக முன்னேற்றத்திற்கான ஊடகமாக பயன்படுத்துவதுமே இத்திட்டத்தின் முக்கிய நோக்கமாகும்.

சென்னையில் 15 இடங்கள்

பெருநகர சென்னை மாநகராட்சியுடன், ஸ்டார்ட் இந்தியா அறக்கட்டளை ஐந்து வருட காலத்திற்கு கலை உணர்வுடன் கூடிய ஓவியங்களை சுவர்களில் வரைய புரிந்துணர்வு ஒப்பந்தம் மேற்கொண்டுள்ளது. இதில் நடப்பாண்டில் கண்ணகி நகர், எழில் நகர் மற்றும் சுனாமி நகர் பகுதிகளில் உள்ள 15 சுவர்களில் ஓவியங்கள் வரையும் பணிகள் நடைபெற்று வருகின்றன. இந்த ஓவியங்கள் சர்வதேச கலைஞர்களால் வரையப்படுகின்றன.

40 லட்சம் செலவில்

இவ்வோவியங்கள் வரைவதற்காக பெருநகர சென்னை மாநகராட்சியின் சார்பில் அவர்களுக்கு தேவையான அடிப்படை வசதிகளான தங்கும் வசதி, போக்குவரத்து வசதி, உணவு வசதி போன்றவை ஏற்பாடு செய்யப்படுகின்றன. ஓவியங்கள் வரைய தேவையான மூலப்பொருட்கள் ஸ்டார்ட் இந்தியா அறக்கட்டளை மூலம் வழங்கப்படுகின்றன. இதுவரை இத்திட்டத்திற்காக ரூ.40 லட்சம் செலவினம் மேற்கொள்ளப்பட்டுள்ளன. பொதுமக்கள் வசிக்கும் பகுதிகளில் இதுபோன்ற சர்வதேச அளவிலான கலைநயத்துடன் கூடிய ஓவியங்கள் வரைவதன் மூலம் அம்மக்களின் மதிப்பும் மனமும் மேன்மையடைகிறது. இத்திட்டத்தை செயல்படுத்தும் பெருநகர சென்னை மாநகராட்சி ஆணையாளர் , அலுவலர்களுக்கும், ஸ்டார்ட் இந்தியா அறக்கட்டளையின் பிரதிநிதிகளுக்கும் வாழ்த்துக்களையும், நன்றிகளையும் தெரிவித்தார்.

சமூகத்தில் பின்தங்கிய நிலையில் உள்ள மக்களின் வாழ்வாதாரத்தை மேம்படுத்த இதுபோன்ற சமூக அக்கறையுடன் கூடிய நல்ல பல திட்டங்களை தமிழ்நாடு முதலமைச்சர் தலைமையிலான அம்மாவின் அரசு தொடர்ந்து செயல்படுத்தும் என நகராட்சி நிர்வாகம், ஊரக வளர்ச்சி மற்றும் சிறப்பு திட்டங்கள் செயலாக்கத்துறை அமைச்சர் எஸ்.பி.வேலுமணி தெரிவித்தார்.

பாராட்டு சான்றிதழ்

பின்னர் கண்ணகி கலை மாவட்டத்தில் ஓவியங்கள் வரைவதில் கலந்து கொண்ட ஓவிய கலைஞர்கள், தன்னார்வலர்கள் மற்றும் உறுதுணையாக இருந்த திருநங்கைகள் ஆகியோரை பாராட்டி சான்றிதழ்களையும், கண்ணகி நகரில் நடைபெற்ற ரங்கோலி, ஓவியம் போன்ற பல்வேறு போட்டிகளில் கலந்து கொண்ட மாணவ, மாணவியர்களை பாராட்டி சான்றிதழ்கள் மற்றும் கேடயங்களையும் அமைச்சர்கள் வழங்கினார்கள்.

இந்நிகழ்ச்சியில் ஆணையாளர் கோ.பிரகாஷ், சென்னை பெருநகர காவல் ஆணையாளர் ஏ.கே.விஸ்வநாதன், துணை ஆணையாளர் டாக்டர் ஆல்பி ஜான் வர்கீஷ், ஸ்டார்ட் இந்தியா பவுண்டேஷன் திட்ட இயக்குநர் தனிஷ் தாமஸ் உட்பட பலர் கலந்து கொண்டனர்.