சிறப்பு செய்திகள்

பிளாஸ்டிக்கை ஒழிக்க மக்கள் ஒத்துழைப்பு தர வேண்டும் – பேரவையில் முதலமைச்சர் வேண்டுகோள்

சென்னை

பிளாஸ்டிக்கை ஒழிக்க மக்கள் ஒத்துழைப்பு தரவேண்டும் என்று பேரவையில் முதலமைச்சர் வேண்டுகோள் விடுத்தார்.

தமிழக சட்டபேரவையில் முதலமைச்சர் எடப்பாடி கே.பழனிசாமி தடை செய்யப்பட்ட நெகிழி பயன்பாடு குறித்து அளித்த விளக்கம் வருமாறு:-

உறுப்பினர் பிளாஸ்டிக்கை முழுமையாக ஒழிக்க வேண்டும் என்று இங்கே தனது கருத்தை தெரிவித்திருக்கிறார். முழுமையாக ஒழிக்க வேண்டும் என்பதற்காக தான் அரசாங்கமே அதை தடை செய்திருக்கிறது. இதற்கு மக்களுடைய ஒத்துழைப்பு முழுமையாக தேவை. ஏன் என்றால், பல ஆண்டு காலமாக மக்கள் இந்த பிளாஸ்டிக் பொருட்களை பயன்படுத்தி வந்திருக்கின்றார்கள்.

உடனடியாக அதை அமலுக்கு கொண்டுவர வேண்டும் என்றால் அத்தனை எளிதான காரியம் அல்ல. மக்களும் ஒத்துழைப்பு கொடுக்க வேண்டும், வியாபாரிகளும் ஒத்துழைப்பு கொடுக்க வேண்டும். அப்படி முழுமையாக ஒத்துழைப்பு கொடுத்தால் தான், முழுமையாக இந்த பிளாஸ்டிக்கை தடை செய்ய முடியும். இருந்தாலும் ஒருமுறை பயன்படுத்தி தூக்கி எறியப்பட்ட இந்த நெகிழி பொருட்களை இன்றைக்கு அரசு தடை செய்ய நடவடிக்கை எடுத்து வருகிறது.

அதற்கு உரிய முறையிலே நம்முடைய வருவாய்துறை அதிகாரிகள், சுற்றுச்சூழல் அதிகாரிகள், உள்ளாட்சி துறை அதிகாரிகள் எல்லாம் நியமிக்கப்பட்டு, அவர்கள் ஆங்காங்கே கடைகளில் போய் சோதனை செய்து, தடை செய்யப்பட்ட பிளாஸ்டிக் பொருட்களை வைத்திருப்போர் மீது உரிய நடவடிக்கை எடுக்கிறார்கள். அபராதமும் விதிக்கப்படுகிறது. இருந்தாலும் பொதுமக்கள் ஒத்துழைப்பு நல்கினால் தான் முழுமையாக இந்த திட்டத்தை நிறைவேற்ற முடியும். அரசாங்கத்தை பொறுத்தவரைக்கும் இதற்கு உரிய நடவடிக்கை எடுக்கப்பட்டு வருகிறது.

ஊட்டி மட்டுமல்ல, கொடைக்கானல், ஏற்காடு போன்ற மலை பிரதேசங்களிலும், எல்லா பகுதிகளிலுமே நெகிழியை தடை செய்ய வேண்டும் என்பதற்காகத்தான், அரசு முழுமையாக ஒருமுறை பயன்படுத்தி தூக்கி எறியப்பட்ட நெகிழியை தடை செய்திருக்கின்றது. இருந்தாலும் பொதுமக்கள் ஒத்துழைப்பு நல்க வேண்டும். பொதுமக்களின் ஒத்துழைப்பு இல்லாமல் இதை நடைமுறைப்படுத்த முடியாது. நீண்ட நெடிய காலமாக மக்கள் பிளாஸ்டிக்கை பயன்படுத்தி வந்து விட்டார்கள். ஆகவே, இது தொடர்பான விழிப்புணர்வை மக்களிடம் அரசு ஏற்படுத்தி வருகிறது. இன்றைக்கு பள்ளி, கல்லூரி மாணவ, மாணவிகள், இளைஞர்கள், தன்னார்வ அமைப்புகள் மூலமாக விழிப்புணர்வை ஏற்படுத்தி வருகின்றோம்.

அனைத்து தரப்பு மக்களும் இதற்கு ஒத்துழைப்பு தந்தால் தான், அரசு கொண்டு வந்த இந்த திட்டத்தை நிறைவேற்ற முடியும். மலைகளுக்கு மட்டுமல்ல, அரசு போட்டுள்ள சட்டம் மாநிலம் முழுமைக்கும் பொருந்தும். ஒருமுறை மட்டுமே பயன்படுத்தி தூக்கி எறியக்கூடிய பிளாஸ்டிக் பொருட்கள் தடை செய்யப்பட்டு இருக்கின்றது. எல்லா கடைகளிலுமே, வருவாய்துறை அதிகாரிகள், சுற்றுச்சூழல் துறை அதிகாரிகள், உள்ளாட்சி துறை அதிகாரிகள் ஆங்காங்கே சென்று சோதனை நடத்துகின்றார்கள்.

சோதனையில் சில கடைகளில் வைக்கப்பட்டுள்ள தடை செய்யப்பட்ட நெகிழிகளை பறிமுதல் செய்கிறார்கள். அவர்களுக்கு அபராதம் விதிக்கப்படுகிறது. அரசு தொடர்ந்து நடவடிக்கை எடுத்து வருகிறது. இன்னும் கடுமையான நடவடிக்கை எடுத்து இந்த சட்டத்தை முழுமையாக அமல்படுத்துவதற்கு அனைத்து தரப்பு மக்களும் ஒத்துழைப்பு கொடுத்தால் அரசு இதை செய்வதற்கு தயாராக இருக்கிறது. நெகிழி ஒழிப்பு என்பது மிக மிக முக்கியமானது. முதன்முதலாக இந்தியாவிலேயே நாம் தான் இதை தடை செய்வதற்காக சட்டம் கொண்டுவந்து, நிறைவேற்றி இருக்கின்றோம்.

இவ்வாறு முதலமைச்சர் எடப்பாடி கே.பழனிசாமி விளக்கம் அளித்தார்.