தற்போதைய செய்திகள்

மாணவர் சேர்க்கையில் மட்டுமல்ல, தரத்திலும் தமிழக உயர்கல்வித்துறை முதலிடம் – சட்டப்பேரவையில் அமைச்சர் கே.பி.அன்பழகன் பெருமிதம்

சென்னை

மாணவர் சேர்க்கையில் மட்டுமல்ல, தரத்திலும் தமிழக உயர்கல்வித் துறை முதலிடம் வகிக்கிறது என்று சட்டப்பேரவையில் அமைச்சர் கே.பி. அன்பழகன் பெருமிதத்துடன் கூறினார்.

சட்டப்பேரவையில் நேற்று உயர்கல்வித்துறை மானியக் கோரிக்கை மீதான விவாதத்திற்கு அமைச்சர் கே.பி. அன்பழகன் பதிலளித்து பேசியதாவது:-

உயர்கல்வியின் நோக்கம்

“கைப்பொருள் தன்னில் மெய் பொருள் கல்வி”
-என்கிறது “கொன்றை வேந்தன்”.
“எக்குடிப் பிறப்பினும் யாவரே ஆயினும்
அக்குடியில் கற்றோரே வருக”
-என்கிறது “வெற்றி வேற்கை”

அடித்தளமக்கள், பின் தங்கிய பகுதியினர், மலைவாழ் மக்கள், மாற்றுத் திறனாளிகள், மூன்றாம் பாலினத்தவர், மெதுவாகக் கற்பவர்கள், உயர்கல்வி வாய்ப்புக் கிடைக்கப் பெறாதாவர்கள் என்று அனைவரையும் உள்ளடக்கிய உயர்கல்வி,
உயர்கல்வியுடன் மென்திறன், தொழில்திறன், ஆளுமைப் பண்புகளை வளர்க்கும் சிறப்புப் பயிற்சிகள்,
நவீன உலகத்தின் தேவைக்கு ஏற்ப, அறிவுத்திறன் கொண்ட, ஆற்றல் மிக்க இளைய சமுதாயத்தினை உருவாக்குதல்,

என்பதனை நோக்கமாகக் கொண்டது மாண்புமிகு புரட்சித்தலைவி அம்மா அவர்களின் அரசு.
உயர்கல்வியில் தமிழகம் முதலிடம்

“என்னருந் தமிழ் நாட்டின் கண்
எல்லோரும் கல்வி கற்றுப்
பன்னருங் கலை ஞானத்தால்
பராக்கிரமத்தால் அன்பால்
உன்னத இமயமலைபோல்
ஓங்கிடும் கீர்த்தி எய்தி
இன்புற்றார் என்று மற்றோர்
இயம்பக் கேட்டிடல் எந்நாளோ?
என்று ஏங்கினார்” புரட்சிக்கவிஞர் பாரதிதாசன்.

“புரட்சிக் கவிஞரின்” கனவு “புரட்சித்தலைவியின்” பொற்கால ஆட்சிக் காலத்தில் நிறைவேற்றப்பட்டு, தற்போது தமிழகத்திற்குப் புகழ் சேர்க்கப்பட்டுள்ளது.

இந்திய அரசின் மனிதவள மேம்பாட்டு அமைச்சகத்தின் அறிக்கையின்படி,

உயர்கல்வியில் இந்தியாவின் தலைசிறந்த எட்டு மாநிலங்களில் தமிழகம் முதன்மையிடம் பெறுகிறது.
18-23 வயதுக்கு உட்பட்டவர்களில் உயர்கல்வியில் சேருபவர்களின் மொத்த எண்ணிக்கையில் தமிழகம் முதன்மையிடத்தில் உள்ளது.உயர்கல்வியில் அதிக மாணாக்கர்களைக் கொண்ட மூன்று மாநிலங்களில் தமிழகம் முன்னோடியாக உள்ளது. (மற்றவை உத்திரபிரதேசம் மற்றும் மகாராஷ்டிரா)உயர்கல்வியில் மாணாக்கர்கள் சேர்வதில் மட்டுமல்லாமல், தேர்ச்சி பெறுவதிலும் தமிழகம் முதன்மையிடத்தில் உள்ளது.

உயர்கல்வியின் அடிப்படையே “ஆராய்ச்சிப் படிப்புதான்” இதில் இந்திய அளவில் தமிழ்நாடு தான் முதல் இடத்தில் உள்ளது!
ஆசிரியர் மாணாக்கர் விகிதம் இந்திய சராசரியை விட தமிழகம் முதன்மையிடத்தில் உள்ளது.மாணாக்கர் தங்கிப் பயிலும் ‘விடுதி’ வாய்ப்பு வசதியிலும் தமிழகம் தான் முதலிடத்தில் உள்ளது. சராசரியாக ஒரு லட்சம் மக்கள் தொகைக்கு 35 கல்லூரிகள், ஒரு கல்லூரிக்கு 924 மாணாக்கர்கள் என்ற நிலையை அடைந்துள்ளோம்.ஒட்டு மொத்தத்தில் இந்திய உயர்கல்வியில் தமிழகம் தலைசிறந்து உள்ளது.இவற்றை எல்லாம் நான் சொல்லவில்லை. சமீபத்தில் இந்திய அரசு வெளியிட்ட அறிக்கை தெளிவாகச் சொல்கிறது.

மாணாக்கர் சேர்க்கையில் மட்டுமல்ல, தரத்திலும் தமிழக உயர்கல்வி முதன்மையிடத்தில் உள்ளது. தமிழ்நாட்டில் உள்ள 21 பல்கலைக்கழகங்கள், 35 கல்லூரிகள் தேசியக் கல்வித்தரக் கட்டமைப்பு NIRF தரவரிசைப் பட்டியலில் முதல் 100 இடங்களுக்குள் இடம் பெற்றுள்ளன.இந்திய அளவில் அண்ணா பல்கலைக்கழகம் தொழில் நுட்பப்பிரிவில் 9-ஆவது இடத்தில் உள்ளது.

சென்னை மாநிலக்கல்லூரி 3-ஆவது இடத்தில் உள்ளது.சென்னைப் பல்கலைக்கழகம் தேசிய அளவில் 20-ஆவது இடத்தில் உள்ளது.இலண்டனில் உள்ள “குவாக்கொரெல்லி சைமன்ஸ் 2020” ஆண்டிற்கான உலகத் தரவரிசைப் பட்டியலை வெளியிட்டுள்ளது. இதில் மதுரை காமராசர் பல்கலைக்கழகம் ‘கல்வி சார் பெருமை’ என்ற வகைப்பாட்டில் 90-ஆவது நிலைக்குள் இடம் பெற்றுள்ளது.

அண்ணா பல்கலைக்கழகம், அண்ணாமலைப் பல்கலைக்கழகம், பாரதிதாசன் பல்கலைக்கழகம், பாரதியார் பல்கலைக்கழகம், மதுரை காமராசர் பல்கலைக்கழகம் மற்றும் சென்னைப் பல்கலைக்கழகம் என 6 பல்கலைக்கழகங்களுக்கு தர மேம்பாட்டுப் பணிக்காக ரூசா திட்டத்தின் கீழ் தலா ரூ.50 கோடி வழங்கப்பட்டுள்ளது.

“தொடர் ஆராய்ச்சியின் மூலம் சமூகம்
நிலையான நீடித்த வளர்ச்சி காணமுடியும்”

உயர்கல்வியின் அடிப்படையே ஆராய்ச்சி தான்!அந்த வகையில்,இந்திய அளவில்-ஆராய்ச்சிப் படிப்புகளில் தமிழ்நாடு உயர்வான நிலையைப் பெற்று உள்ளது. 2018-2019 ஆழசுனு அறிக்கையின்படி,இந்திய அளவில் அதிக அளவு ஆராய்ச்சிப் படிப்பு மாணவர்களைக் கொண்ட மாநிலமாகத் தமிழ்நாடு திகழ்கிறது.இதன்படி 2018-2019 கல்வியாண்டில் மட்டும் 25,820 ஆய்வாளர்கள் பி.எச்.டி படிப்பில் சேர்ந்துள்ளனர். இவர்களில் 13,699 ஆண்கள், 12,121 பெண்கள்.இதே போல்,எம்.பில் படிப்பில் 12,425 சேர்ந்துள்ளனர். இவர்களில் 3,281 ஆண்கள், 9,144 பெண்கள் இதுமட்டுமல்ல ஆராய்ச்சிப் படிப்புகளில் சேர்பவர்களின் எண்ணிக்கை மட்டுமல்ல, வெற்றிகரமாகப் படிப்பை முடிப்பவர்களின் எண்ணிக்கையும் தமிழகம் தான் உயர்ந்துள்ளது.

2018-2019இல் மட்டும் 5,844 பேர் பி.எச்.டி பட்டத்தினையும், 17,556 எம்.பில் பட்டத்தினையும் வெற்றிகரமாக முடித்துள்ளனர்.
இதற்கு எல்லாம் காரணம்- உயர்கல்வித்துறை ஆய்வுப்படிப்புகளுக்கு வழங்கும், ஊக்கமும், உதவியும்-வாய்ப்பும் – வசதியுமே தான் மூல காரணம்.

உயர் கல்வித்துறையின் கீழ் உள்ள 13 பல்கலைக் கழகங்களுக்கும் ஆண்டு தோறும் தேவைக்கு ஏற்ப ஆராய்ச்சி நிதியாக ரூ.25 கோடி வழங்கப்படுகிறது.தேர்வு செய்யப்பட்ட ஆராய்ச்சித் திட்டங்களுக்கு 100ரூ சதவீதம் ஆராய்ச்சி நிதி வழங்கப்படுகிறது.
70க்கும் மேற்பட்ட நாடுகளுடன் ஆராய்ச்சிக்கான புரிந்துணர்வு ஒப்பந்தங்கள் போடப்பட்டுள்ளன.இணைய வழியில் ஆராய்ச்சி நெறிமுறைகள் படிப்புகள் தொடங்கப்படுகின்றன.

தமிழ்நாடு மாநில உயர்கல்வி மன்றம் மூலம் ஒவ்வொரு கல்வியாண்டும் சிறு, குறு ஆராய்ச்சித் திட்டங்களுக்கு கலை அறிவியல் கல்லூரிகளில் பயிலும் இறுதி ஆண்டு பயிலும் 50 மாணாக்கர்களுக்கு தலா ரூ.15,000/- வீதம் ரூ.7.5 லட்சம் வழங்கப்பட்டு வருகிறது.

டெக்யூப் TEQIP -III திட்டத்தின் கீழ் உள்ள கல்லூரிகளில் பயிலும் பி.எச்.டி மாணாக்கர்களுக்கு டெக்யூப் நிதியில் இருந்து உதவித்தொகை வழங்கப்படுகிறது.அரசு மற்றும் அரசு உதவிபெறும் கல்லூரிகளில் ஆராய்ச்சிப் படிப்புகளில் சேர்ந்துள்ள தகுதியான மாணாக்கர்களுக்கு ரூ.60,000/- உதவித்தொகை வழங்கப்படுகிறது.

• தமிழ்நாடு திறந்தநிலைப் பல்கலைக்கழகத்தில் முழு நேர ஆராய்ச்சிபடிப்பில் சேரும் அனைத்து மாணாக்கர்களுக்கும் ஆய்வு உதவித்தொகை வழங்கப்படுகிறது.
• அறிவியல் ஆய்வுகளை ஊக்கப்படுத்த ‘அறிவியல் அறிஞர் விருதுகள், சிறந்த அறிவியல் ஆசிரியர் விருதுகள் மற்றும் ஊரகக் கண்டுபிடிப்பாளர் விருதுகள் வழங்கப்படுகிறது.
• தமிழ்நாடு அறிவியல் தொழில் நுட்ப மாநில மன்றம் சார்பில் தொழில் நுட்ப பாடங்களில் இறுதி ஆண்டு பயிலும் மாணாக்கர்களின் ஆராய்ச்சித் திட்டங்களுக்கு தலா ரூ.10 ஆயிரம் வழங்கப்படுகிறது. இதற்காக ரூ.53.68 கோடி ஒதுக்கப்பட்டுள்ளது.

இவ்வாறு சட்டபேரவையில் அமைச்சர் கே.பி. அன்பழகன் கூறினார்.