சிறப்பு செய்திகள்

கொரோனா வைரஸ் பற்றி யாரும் அச்சப்பட தேவையில்லை – சட்டப்பேரவையில் முதலமைச்சர் திட்டவட்டம்

ஒன்றரை லட்சம் பேரை பரிசோதனை செய்ததில் யாருக்கும் பாதிப்பு இல்லை. எனவே கொரோனாவை பற்றி யாரும் அச்சப்பட தேவையில்லை என்று சட்டப்பேரவையில் முதலமைச்சர் எடப்பாடி கே.பழனிசாமி திட்டவட்டமாக தெரிவித்தார்.

சட்டப்பேரவையில் முதலமைச்சர் எடப்பாடி கே.பழனிசாமி தமிழ்நாட்டில் மேற்கொள்ளப்பட்டுள்ள கொரோனா வைரஸ் தடுப்பு நடவடிக்கைகள் குறித்து அளித்த விளக்கம் வருமாறு:-

கொரோனா வைரஸ் பற்றிய சந்தேகங்கள் இருக்கக்கூடாது என்பதற்காகத் தான் மக்கள் நல்வாழ்வுத் துறை அமைச்சர் விளக்கமாக, தெளிவாக சிறப்பாக பேசியிருக்கிறார். என்னென்ன காரணத்தினால் இந்த நோய் வரும், எப்படி எல்லாம் பரவும் என்பதை தெளிவுப்படுத்தி இருக்கிறார். நீங்கள் அச்சப்பட வேண்டிய அவசியம் இல்லை. அதாவது, இந்த நோயினால் பாதிக்கப்பட்டவர்கள் இருமினால், தும்மினால் வரும் என்று தான் சொல்லி இருக்கிறார்களே தவிர, இங்கு யாருக்கும் பாதிப்பு இல்லை.

அதனால் நீங்கள் அச்சப்பட வேண்டியதில்லை. ஏற்கனவே மக்கள் நல்வாழ்வுத் துறை அமைச்சர் அவர்கள் சொன்னார்க, 70 வயதிற்கு மேலே பாதிப்புக்கு வாய்ப்பு என்று, அதனால் அச்சப்படுகிறீர்களோ, என்னவோ, தெரியவில்லை. அந்த கவலையே வேண்டியதில்லை. நமது தமிழக சுகாதாரத் துறையை பொறுத்தவரைக்கும், நம்முடைய மருத்துவர்கள் சிறப்பான மருத்துவர்கள், இந்தியாவிலேயே சிறந்த மருத்துவர்கள் தமிழகத்திலே இருக்கின்றார்கள். ஒருவருக்கு பாதிப்பு ஏற்பட்டு இருக்கிறது என்பது தெரிந்தவுடன் அவரை குணப்படுத்துகிற அளவிற்கு சிறப்பான சிகிச்சையை நம்முடைய மருத்துவர்கள் அளித்திருக்கிறார்கள். அதனால் கவலைப்பட வேண்டிய அவசியமே கிடையாது.

வெளிநாட்டிற்கு சென்று வந்தவர்கள் மூலமாகத் தான் இந்நோய் பரவுவதாக மக்கள் நல்வாழ்வுத் துறை அமைச்சர் தெளிவாக சொல்லியிருக்கிறார். வெளிநாட்டிலிருந்து வருகை தந்த சுமார் ஒன்றரை லட்சம் பேர் Screening செய்யப்பட்டு, அதில் யாருக்கு இந்நோய் வந்திருக்கிறதோ, அவர்களைத் தான் மருத்துவ சிகிச்சைக்கு உட்படுத்தப்பட்டு, பரிசோதனை செய்கிறார்கள். அதில் பாதிப்பு இல்லாதவர்களை வீட்டிற்கு அனுப்பிவிடுகிறார்கள். ஆகவே, தமிழகத்தை பொறுத்தவரைக்கும் யாரும் அச்சப்பட வேண்டிய அவசியமே இல்லை.

இந்த நோயால் பாதிக்கப்பட்டவர்கள் இருமினாலோ, தும்மினாலோ, அல்லது நீங்கள் சொன்னது போல மேஜையை தொட்டாலோ, திருமணத்திற்கு போனாலோ, விமான நிலையத்திற்கு போனாலோ, ரயில் நிலையங்களுக்கு போனாலோ இப்படிப்பட்ட பாதிப்பு, அவர்கள் மூலமாக வருகிறது. விமானத்திலிருந்து இறங்கும் போதே, நம்முடைய சுகாதாரத் துறை அதிகாரிகள் அவர்களை பரிசோதித்து, மருத்துவமனைகளுக்கு அழைத்துச் சென்று, பாதிக்கப்பட்டு இருந்தால், அதற்கான சிகிச்சை அளிக்கப்படுகிறது என்பதை தங்கள் வாயிலாக எதிர்க்கட்சி துணைத்தலைவருக்கு தெரிவித்துக் கொள்கிறேன்.

எதிர்க்கட்சி துணைத் தலைவர் அவர்கள் வருத்தப்பட தேவையில்லை, அச்சப்படவும் தேவையில்லை. உங்களுக்கு வயது அதிகமாக இருந்தாலும் கூட, அதற்கும் தகுந்த சிகிச்சை கொடுப்பதற்கு நம்முடைய மருத்துவர்கள் தயாராக இருக்கிறார்கள் என்பதையும் தங்கள் வாயிலாக திர்க்கட்சி துணைத் தலைவருக்கு தெரிவித்துக் கொள்கிறேன்.

இந்த நோயால் பாதிக்கப்பட்டவர்கள் இருமினால் தான் இந்த பிரச்சனைக்கு உட்படுகிறார்கள். வெளிநாட்டிலிருந்து வருபவர்களுக்கு தான் இந்த நோயே இருக்கிறது. உள்நாட்டில் இருப்பவர்களுக்கு யாருக்கும் கிடையாது. வெளிநாட்டிலிருந்து வருபவர்களை பரிசோதனை செய்து, அவர்கள் பாதிக்கப்பட்டு இருந்தால் உடனடியாக மருத்துவ சிகிச்சை அளிப்பதற்கு அரசு உரிய நடவடிக்கை மேற்கொண்டு வருகிறது. இதனால் யாரும் அச்சப்பட தேவையில்லை மக்கள் நல்வாழ்வுத் துறை அமைச்சர் தெளிவாக, விளக்கமாக பேசிவிட்டார்.

இவ்வாறு முதலமைச்சர் எடப்பாடி கே.பழனிசாமி விளக்கம் அளித்தார்.