தற்போதைய செய்திகள்

உள்ளாட்சி தேர்தலை சந்திக்க பயந்து மக்களை குழப்பி வருகிறார் ஸ்டாலின் – பா.வளர்மதி கடும் தாக்கு

திருவள்ளூர்

உள்ளாட்சித் தேர்தலை சந்திக்க பயந்து மக்களை ஸ்டாலின் குழப்பி வருகிறார் என்று கழக இலக்கிய அணி செயலாளர் பா.வளர்மதி கூறினார்.

திருவள்ளூர் மேற்கு மாவட்டம் பூந்தமல்லி தொகுதி உள்ளாட்சித் தேர்தலில் போட்டியிடும் வேட்பாளர் அறிமுக கூட்டம் நடைபெற்றது. இக்கூட்டத்திற்கு திருவள்ளூர் மேற்கு மாவட்ட கழக செயலாளரும், பொன்னேரி தொகுதி சட்டமன்ற உறுப்பினருமான பி.பலராமன் தலைமை தாங்கினார். இதில் கழக இலக்கிய அணி செயலாளர் பா.வளர்மதி ஆலோசனை வழங்கினார்.

கூட்டத்தில் மாவட்ட அவைத்தலைவர் தீ.பா.கண்ணன், முன்னாள் சட்டமன்ற உறுப்பினரும் மாவட்ட அம்மா பேரவை செயலாளருமான இரா. மணிமாறன், ஒன்றிய செயலாளர்கள் ஜி. திருநாவுக்கரசு, புட்லூர் சந்திரசேகர், மாவட்ட சிறுபான்மை பிரிவு செயலாளர் ஜாவித் அகமது, மாவட்ட அம்மா பேரவை துணை செயலாளர் ரவிசந்திரன், ஒன்றியக் கழக துணைச் செயலாளர் வைத்தியநாதன், மாவட்ட வழக்கறிஞர் அந்தமான் முருகன், காட்டுப்பாக்கம் தலைவர் கே.ஜி.டி.கவுதமன், திருவள்ளூர் நகர செயலாளர் ஜி.கந்தசாமி உள்பட பலர் கலந்து கொண்டனர்.

இதில் கழக இலக்கிய அணி செயலாளர் பா.வளர்மதி பேசியதாவது:-

நடைபெறும் உள்ளாட்சி தேர்தலில் நம்பிக்கையுடன் களப்பணியாற்றுங்கள். மக்களிடத்தில் நேரில் சென்று சந்தித்து அவர்களின் அடிப்படை தேவைகளை குறித்து கேளுங்கள். மக்களின் தேவைகளை பூர்த்தி செய்யுங்கள் நாம் தான் உள்ளாட்சித் தேர்தலில் அனைத்து இடங்களிலும் 100% வெற்றிபெறுவோம். இன்றைக்கு முதலமைச்சர் கூடுதலாக 5 லட்சம் பேருக்கு முதியோர் உதவித்தொகை வழங்கி நிதி ஒதுக்கீடு செய்துள்ளார். ஆகவே தகுதியான அனைவருக்கும் முதியோர் உதவித்தொகை வழங்கப்படும் என்று கூறுங்கள். அதேபோல் ஐந்து வருடத்தில் அரசு புறம்போக்கு நிலத்தில் குடியிருந்து வந்தால் அவர்களுக்கு 318 அரசாணை வீட்டுமனை பட்டா வழங்கப்படும் என்று உறுதிபட கூறுங்கள்.

முதலமைச்சரின் சாதனை திட்டங்களை மட்டுமல்லாது. இன்றைக்கு வலிமையான பாரதத்தை உருவாக்கிவரும் பாரத பிரதமரின் சாதனை திட்டங்களை எடுத்துக்கூறுங்கள். மக்களை அதிக முறை நாடி சென்ற கூட்டணி கழக கூட்டணி தான் என்ற வரலாற்றை உருவாக்குங்கள். தி.மு.க.விற்கு மக்களை சந்திக்க இன்னமும் மனம் வரவில்லை. ஏனென்றால் அவர்களுக்கு தேர்தல் என்ற பயம் தான் கண்முன் தெரிகிறது. இன்றைக்கு தேர்தலை சந்திக்க தைரியமில்லாமல் ஸ்டாலின் மக்களிடத்தில் தேவை இல்லாத குழப்பத்தை ஏற்படுத்தி வருகிறார்.

குடியுரிமை சட்டத் திருத்த மசோதா நாடாளுமன்றத்தில் தாக்கல் செய்யப்பட்ட போது அதில் விவாதம் நடைபெற்று இரு அவைகளிலும் வெற்றிபெற்றது. ஜனாதிபதி இதற்கு ஒப்புதல் அளித்துள்ளார். இதனை தடை செய்ய வேண்டும் என்று 59 மனுக்கள் உச்சநீதிமன்றத்தில் தாக்கல் செய்யப்பட்டபோது உச்சநீதிமன்றம் தடை விதிக்க முடியாது என்று கூறிவிட்டது. மேலும் வழக்கு உச்ச நீதிமன்றத்தில் நிலுவையில் உள்ளது. இந்த மசோதா இன்னும் அமல்படுத்தவில்லை. அப்படி அமல்படுத்தும் போது புதிய விதிகள் எல்லாம் அமல்படுத்தப்படும். அப்போது தான் அதில் என்ன நன்மை தீமை உள்ளது என்பதை நாம் அறிந்து கொள்ள முடியும்,

ஆனால் குடியுரிமை சட்டத் திருத்த மசோதாவை முழுமையாக ஸ்டாலின் படித்து தெரிந்து கொள்ளாமல் ஆர்ப்பாட்டம் நடத்துகிறார். தேவையில்லாமல் மக்களை குழப்பி ஸ்டாலின் நாட்டில் பிரிவினையை ஏற்படுத்துகிறார். அனைத்து மதத்தினரும் அண்ணன் தம்பியாக வாழ்கிறோம். இலங்கை தமிழர் பிரச்சினையில் ஒருமணி.நேரம் கருணாநிதி உண்ணாவிரதம் இருந்த நாடகத்தை இன்று வரைக்கும் மக்கள் மறக்கவில்லை. உள்ளாட்சித் தேர்தலை தடுத்து நிறுத்த ஸ்டாலின் உச்சநீதிமன்றம் சென்றார். ஆனால் உச்சநீதிமன்றமும் மக்களை சந்தியுங்கள் என்று சொல்லி விட்டது மக்களை சந்திக்க தைரியமில்லாமல் இதுபோன்று குழப்பத்தை ஏற்படுத்தி வருகிறார்.

இவ்வாறு கழக இலக்கிய அணி செயலாளர் பா.வளர்மதி பேசினார்.