தற்போதைய செய்திகள்

மதுரையில் முதலமைச்சர் கோப்பைக்கான மாநில கபடி போட்டி – அமைச்சர்கள் துவக்கி வைத்தனர்

மதுரை:-

மதுரையில் நடைபெற்ற முதலமைச்சர் கோப்பைக்கான மாநில அளவிலான கபடி போட்டிகளை (2019-2020) பள்ளி கல்வி. இளைஞர் நலன் மற்றும் விளையாட்டு மேம்பாட்டுத்துறை அமைச்சர் கே.ஏ.செங்கோட்டையன், கூட்டுறவுத்துறை அமைச்சர் செல்லூர் கே.ராஜூ, வருவாய் பேரிடர் மேலாண்மை மற்றும் தகவல் தொழில்நுட்பவியல்துறை அமைச்சர் ஆர்.பி.உதயகுமார் ஆகியோர் துவக்கி வைத்தனர்.

மதுரை மாவட்டம், தமுக்கம் மைதானத்தில் முதலமைச்சர் கோப்பைக்கான மாநில அளவிலான கபடி விளையாட்டுப் போட்டிகளை (2019-2020) மாவட்ட ஆட்சித்தலைவர் டி.ஜி.வினய் தலைமையில் பள்ளி கல்வித்துறை, இளைஞர் நலன் மற்றும் விளையாட்டு மேம்பாட்டுத்துறை அமைச்சர் கே.ஏ.செங்கோட்டையன், கூட்டுறவுத்துறை அமைச்சர் செல்லூர் கே.ராஜூ, வருவாய் பேரிடர் மேலாண்மை மற்றும் தகவல் தொழில்நுட்பவியல்துறை அமைச்சர் ஆர்.பி.உதயகுமார் ஆகியோர் நேற்று துவக்கி வைத்தனர்.

பள்ளி கல்வித்துறை, இளைஞர் நலன் மற்றும் விளையாட்டு மேம்பாட்டுத்துறை அமைச்சர் கே.ஏ.செங்கோட்டையன் பேசியதாவது:-

நடைபெறுகின்ற நிகழ்ச்சி இன்றைக்கும் மறைந்தும் மறையாமல் நம் நெஞ்சில் வாழ்ந்து கொண்டிருக்கிற புரட்சித்தலைவர் அவர்கள் முதன் முதலில் தமிழ்நாட்டில் கபடி விளையாட்டை அன்றைக்கு உருவாக்கி காட்டியதை நான் கண்கூடாக பார்த்திருக்கிறேன். அதற்குபிறகு புரட்சித்தலைவர் வழியிலே நம் நெஞ்சங்களில் வாழ்ந்து கொண்டிருக்கிற வங்க கடலோரம் துயில்கொண்டுள்ள சங்கத்தலைவி புரட்சித்தலைவி அம்மா அவர்கள் பல்வேறு திட்டங்களை நிறைவேற்றி காட்டினார்.

நான் குறிப்பிடுவதற்கு காரணம் 2013-14ம் ஆண்டுகளிலேதான் இதுபோன்ற விளையாட்டுக்களை ஊக்கப்படுத்துவதற்கு முதலமைச்சர் கோப்பை என்ற முறையில் ரூ.10 கோடி வழங்கிய வரலாறு தமிழ்நாட்டில் மட்டும்தான். வேறு எங்குமில்லை என்பதை தெரிவித்துக்கொள்கிறேன். அம்மா அவர்கள் வழியில் முதலமைச்சரும், துணை முதலமைச்சரும் ஒருங்கிணைந்து பல்வேறு திட்டங்களை செயல்படுத்தி வருகிறார்கள்.

மதுரை தூங்கா நகரம். இந்த நகரத்திற்கு ஒரு பெருமை இருக்கிறது. இங்கே விளையாடுகிற விளையாட்டு வீரர்களின் செயல்பாடுகளை உங்கள் எதிர்காலத்தை நிர்ணயிக்கிற வகையில் மதுரை மண்ணிலே களம் காணுகிறீர்கள். 37 மாவட்டங்களிலே இருக்கின்ற நீங்கள் சிறந்த விளையாட்டுக்களை இந்த மதுரை மண்ணிலே விளையாடுவது இந்த மண்ணிற்கும் மட்டுமல்ல தமிழ்நாட்டிற்கும் பெருமை சேர்ப்பதாகும். முதலமைச்சர் வேலைவாய்ப்பில் விளையாட்டுத் துறைக்காகவே 3 சதவீதம் ஒதுக்கீடு செய்து நேரு ஸ்டேடியத்தில் 2019ம் ஆண்டு அறிவித்தார். இந்த ஆண்டு ரூ.218 கோடியே 66 லட்சம் விளையாட்டுத் துறைக்காக ஒதுக்கீடு செய்துள்ளார்.

உங்கள் எதிர்காலத்தை கருதிதான் 3 விளையாட்டுகளை தேர்வு செய்தார்கள். அதில் முதலிடத்தில் இருப்பது கபடி என்பதை நீங்கள் மறந்துவிடக் கூடாது. தமிழ்நாட்டில் உள்ள 12,524 ஊராட்சி மன்றங்களிலும் 528 பேரூராட்சிகளிலும் இந்த நிகழ்ச்சி நடத்தப்படவேண்டும் என்ற நோக்கத்தில் தான் ரூ.76 கோடியே 23 லட்சம் நிதி ஒதுக்கப்பட்டுள்ளது. உங்களுக்கு பயிற்சி அளிப்பதற்கு நடவடிக்கை மேற்கொண்டுள்ளது.

உங்கள் திறமையை வெளிப்படுத்துகின்ற வகையில் இந்த விளையாட்டில் 12 பேர் கலந்து கொள்ள இருக்கிறீர்கள். 12 பேர் ஒரு ஆற்றின் பாலத்தை குறிக்கிறது. 12 என்பது காலை இரவு என்பதை குறிக்கிறது. இங்கே வந்துள்ள மாணவர்கள் சிறப்பான பயிற்சியை பெற்று சிறப்பான எதிர்காலத்தை உருவாக்கின்ற வகையில் இந்த அரசு உறுதுணையாக இருக்கும்.

ஒரு நிறுவனத்தில் மூலமாக அனைத்துத்துறையிலும் இருக்கின்ற தொழில் அதிபர்களிடம் தேசிய அளவிலே தங்கப்பதக்கம் பெற்ற மாணவர்களின் எதிர்காலத்தை மனதிலே கொண்டு அவர்களை தத்து எடுத்துக்கொள்ள வேண்டும் என கோரிக்கை வைத்துள்ளேன். இங்கே இருக்கின்ற 217 பேர்கள் அவர்கள் பணியாற்றுகின்ற தொழிற்சாலை சிறந்த நிலையிலே வளர தத்து எடுத்துக் கொள்ள வேண்டும் என அரசின் சார்பாக கேட்டுக் கொள்ளப்பட்டுள்ளது.

3 சதவீதம் என்பது பொதுத்துறையில் மட்டுமல்ல தனியார் துறையிலும் கொண்டு வருவதற்கான முயற்சிகள் என்பதை இந்த நேரத்தில் தெரிவித்துக் கொள்கிறேன். நீங்கள் அனைவரும் கூட்டு முயிற்சியுடன் இணைந்து விளையாட்டை விளையாட இருக்கிறீர்கள். எனவே மதுரை மண்ணிலே வீரத்தோடு விளையாடி வெற்றிகளை குவிக்க வேண்டும். இந்த அரசு உங்களுக்கு உறுதுணையாக என்றைக்கும் இருக்கும் என தெரிவித்தார்.

கூட்டுறவுத்துறை அமைச்சர் செல்லூர் கே.ராஜூ பேசியதாவது:-

தமிழ்நாடு விளையாட்டு மேம்பாட்டு ஆணையத்தின் சார்பாக, முதலமைச்சர் கோப்பைக்கான விளையாட்டுப் போட்டிகள் மாவட்ட மற்றும் மாநில அளவில் ஒவ்வொரு ஆண்டும் நடத்தப்பட்டு வருகிறது. இவ்வாண்டு தடகளம், நீச்சல், ஜூடோ, குத்துச்சண்டை, இறகுப்பந்து, கூடைப்பந்து, ஹாக்கி, கபாடி, டென்னிஸ் மற்றும் கையுந்துப்பந்து ஆகிய விளையாட்டுப் போட்டிகள் ஆண்கள், பெண்கள் இருபாலருக்கும் மாவட்ட அளவில் நடைபெற்றது.

இம்மாவட்ட அளவில் தடகளம், நீச்சல், ஜூடோ மற்றும் குத்துச்சண்டை ஆகிய தனிநபர் போட்டிகளில் முதலிடம் பெறுபவர்களும், குழு விளையாட்டுப் போட்டிகளில் சிறந்த விளையாட்டு வீரர், வீராங்கனையாக தேர்வுகுழு மூலம் தேர்வு செய்யப்படுபவரை மாவட்ட அணியாக, மாநில அளவிலான போட்டிகளில் கலந்து கொள்ள அரசு செலவில் அழைத்துச் செல்லப்படுவர். இவ்வருடம் மாநில அளவிலான கபாடி விளையாட்டுப்போட்டிகள் மதுரை மாவட்டத்தில் நடத்துவதற்கு ஒதுக்கீடு செய்யப்பட்டுள்ளது.

மாநில அளவிலான விளையாட்டுப் போட்டிகளில் முதல் பரிசாக தலா ரூ.1,00,000, இரண்டாமிடம் பெறுபவர்களுக்கு ரூ.75,000 பரிசுத் தொகையும், மூன்றாமிடம் பெறுபவர்களுக்கு ரூ.50,000 பரிசுத் தொகையும் வழங்கப்படுகிறது. இவ்வாறு அதிகளவில் பரிசுத்தொகை கொடுத்தவுடன் தற்போது அதிகமாக விளையாட்டு வீரர்,வீராங்கனைகள் விளையாட்டுப் போட்டிகளில் பங்கு கொள்கின்றனர். விளையாட்டு வீரர்,வீராங்கனைகளின் சாதனை அளவும் அதிகரித்துள்ளது.

மாவட்ட மற்றும் மாநில அளவில் விளையாட்டு விடுதிக்கு மாணவர்கள் தேர்வு செய்தல். பெண்கள் விளையாட்டு விழா நடத்துதல், தேசிய விளையாட்டு போட்டிகள் நடத்துதல், மாதாந்திர விளையாட்டுப் போட்டிகள் நடத்துதல், புதிய விளையாட்டுகள் நடத்துதல், அரசு ஊழியர்களுக்கான விளையாட்டு போட்டிகள் நடத்துதல், மாவட்ட மற்றும் மாநில அளவிலான கேரம் போட்டிகள் நடத்துதல், கேலோ இந்தியா மாவட்டம், மாநில மற்றும் தேசிய அளவிலான விளையாட்டு போட்டிகள் நடத்துதல், முதலமைச்சர் கோப்பைக்கான மாவட்ட மற்றும் மாநில அளவிலான விளையாட்டு போட்டிகள் நடத்துதல்,

உடற்கல்வி ஆசிரியர்களுக்கு புத்தாக்க பயிற்சி அளித்தல், பேரறிஞர் அண்ணா பிறந்த நாள் சைக்கிள் போட்டி நடத்துதல், தேசிய அளவிலான போட்டிகளில் வெற்றி பெற்றவர்களுக்கு விளையாட்டு உபகரணங்கள் வழங்குதல், தேசிய அளவிலான போட்டிகளில் வெற்றி பெற்றவர்களுக்கு ஊக்க உதவித்தொகை வழங்குதல், மாவட்ட மற்றும் மாநில அளவில் மாற்றுத்திறனாளிக்கான விளையாட்டுப் போட்டிகள் நடத்துதல், சாம்பியன் மேம்பாட்டுத் திட்டம், சிறந்த விளையாட்டு வீரர்களை வெளிநாடுகளில் சிறப்பு பயிற்சி மற்றும் போட்டிகளில் பங்கு பெற உதவி செய்தல்,

வயது முதிர்ந்த விளையாட்டு வீரர்களுக்கு உதவித்தொகை வழங்குதல், உலகத் திறனாய்வு திட்ட தேர்வுகள் நடத்துதல், மாவட்ட மற்றும் மாநில அளவில் ஹாக்கி லீக் போட்டி நடத்துதல், 21 நாட்களுக்கு கோடை கால பயிற்சி முகாம் நடத்துதல், 5 நாட்களுக்கு கல்வி மாவட்ட அளவிலான பயிற்சி முகாம் நடத்துதல், 15 நாட்களுக்கு மாவட்ட அளவிலான இருப்பிட பயிற்சி முகாம் நடத்துதல், திறமை கண்டறியும் முகாம் நடத்துதல், மாநில அளவிலான பயிற்சி முகாம் நடத்துதல், இறகுப்பந்து அகாடமி பயிற்சி முகாம் நடத்துதல், அம்மா இளைஞர் விளையாட்டு மேம்பாட்டுத் திட்டம் ஆகியவையே தமிழ்நாடு விளையாட்டு மேம்பாட்டு ஆணையத்தின் விளையாட்டுத் திட்டங்கள்.

இவ்வாறு அமைச்சர் செல்லூர் கே.ராஜூ தெரிவித்தார்.
                      
நிகழ்ச்சியில் வருவாய் பேரிடர் மேலாண்மை மற்றும் தகவல் தொழில்நுட்பவியல்துறை அமைச்சர் ஆர்.பி.உதயகுமார் பேசியதாவது:-

தமிழ்நாடு சட்டமன்றப் பேரவை 110-விதியின் கீழ் கிராமங்களில் உள்ள இளைஞர்களின் ஆரோக்கியம் மற்றும் மன வளத்தை மேம்படுத்தவும், கூட்டு மனப்பான்மையை உருவாக்கவும், இளைஞர்களின் விளையாட்டுத் திறனை ஊக்குவித்து வெளிக்கொணரவும் தமிழ்நாட்டில் உள்ள 12524 கிராம ஊராட்சிகள் மற்றும் 528 பேரூராட்சிகளில் அம்மா இளைஞர் விளையாட்டுத் திட்டம் செயல்படுத்தப்படும் என முதலமைச்சர் அறிவித்தார். இந்தத் திட்டத்தினைச் செயல்படுத்தும் பொருட்டு ரூ.76,23,09,300/-க்கான நிதி ஒதுக்கீடு செய்து அரசாணை வெளியிடப்பட்டது.

13052 கிராம ஊராட்சிகள் மற்றும் பேரூராட்சிகளில் இரு பாலருக்கும் தனித்தனியாக அம்மா இளைஞர் விளையாட்டுக் குழு அமைக்கப்பட்டுள்ளது. திட்டத்தினை 13052 கிராம ஊராட்சிகள் மற்றும் பேரூராட்சிகளில் சிறப்பாகச் செயல்படுத்திட மாவட்ட அளவிலான விளையாட்டு ஆலோசனை குழு மற்றும் ஊராட்சி, பேரூராட்சி விளையாட்டு ஆலோசனை குழு அமைக்கப்பட்டுள்ளன.

13052 கிராம ஊராட்சி மற்றும் பேரூராட்சிகளிலும் கபடி, வாலிபால், கிரிக்கெட் அல்லது பூப்பந்து ஆகிய விளையாட்டுக்களில் பயிற்சி அளிக்கப்படும். அந்தந்த கிராமங்கள் அல்லது அருகாமையில் உள்ள பள்ளிகளில் பணிபுரியும் உடற்கல்வி ஆசிரியர். உடற்கல்வி இயக்குநர்கள் மூலம் இந்தப் பயிற்சி அளிக்கப்படும். இதற்காக அவர்களுக்கு ஆண்டொன்றுக்கு ரூ.4,000 தொகுப்பூதியமாக வழங்கப்படும்.

இந்த விளையாட்டுக்களை விளையாடத் தேவையான கம்பங்கள், வலைகள் , கிரிக்கெட் மட்டைகள், பந்துகள், கையுறைகள், முதலான பொருட்கள் 13052 கிராம ஊராட்சிகள் மற்றும் பேரூராட்சிகளில் இருபாலருக்கும் வழங்கப்பட்டு வருகின்றன. மேலும், திறந்தவெளி உடற்பயிற்சி மையத்திற்குத் தேவையான உபகரணங்களும் வழங்கப்பட்டு வருகின்றன. இது தவிர, மேற்படி விளையாட்டுக்களுக்கான ஆடுகளங்கள் ஊரக வளர்ச்சித் துறை மூலம் அமைக்கப்பட்டு வருகின்றன.

கபடி, வாலிபால், கிரிக்கெட் அல்லது பூப்பந்து ஆகிய விளையாட்டுக்களில் ஊராட்சி ஒன்றிய அளவில், மாவட்ட அளவில் மற்றும் மாநில அளவில் போட்டிகள் நடத்தப்படும். மாநில அளவில் நடைபெறும் போட்டிகளில் வெற்றி பெறும் அணிக்கு பரிசுகள் வழங்கப்படும்.

மதுரை மாவட்டத்தில் உள்ள 420 கிராம ஊராட்சிகளும், 9 பேரூராட்களிலும் கபடி, வாலிபால், கிரிக்கெட் அல்லது பூப்பந்து ஆகிய விளையாட்டு மைதானங்கள் அமைக்கப்படும். 429 கிராம மற்றும் பேரூராட்சிகளுக்கும் விளையாடத் தேவையான கம்பங்கள், வலைகள், கிரிக்கெட் மட்டைகள், பந்துகள், கையுறைகள், முதலான பொருட்கள் வழங்கப்படும். மேலும், திறந்தவெளி உடற்பயிற்சி மையத்திற்குத் தேவையான உபகரணங்களும் வழங்கப்பட்டு வருகின்றன.

மதுரை மாவட்டத்தில் உள்ள 429 கிராம மற்றும் பேரூராட்சிகளிலும் விளையாட்டு மைதானங்கள் அமைப்பதற்கு ரூ.2,93,46,500 க்கான நிதி ஒதுக்கீடு செய்யப்பட்டுள்ளது. 429 கிராம மற்றும் பேரூராட்சிகளிலும் விளையாட்டு உபகரணங்கள் வாங்குவதற்கு ரூ.1,15,89309 க்கான நிதி ஒதுக்கீடு செய்யப்பட்டுள்ளது. 429 கையுந்துப்பந்து மைதானங்கள் ரூ.11,15,400/- செலவில் (ரூ.26,000/- மான்யம்) அமைக்க தேர்வு செய்யப்பட்டும், 429 கபாடி மைதானங்கள் ரூ.96,52,500 செலவில் (ரூ.22,500/- மான்யம்) அமைக்க தேர்வு செய்யப்பட்டும், 301 கிரிக்கெட் மைதானங்கள் ரூ.36,12,000/-செலவில் (ரூ.12,000/- மான்யம்) அமைக்க தேர்வு செய்யப்பட்டும், 128 பூப்பந்து மைதானங்கள் ரூ.49,28,000/-செலவில் (ரூ.38,500/- மான்யம்) அமைக்க தேர்வு செய்யப்பட்டும், ஆக மொத்தம் 2,93,46,500/- செலவில் அமைக்கப்பட உள்ளது.

420 வாலிபால் உபகரணங்கள் ரூ.1,09,20,000/- செலவில் (ரூ.5,740/- மான்யம்) வாங்குவதற்கும், 420 கிரிக்கெட் உபகரணங்கள் ரூ.94,50,000/-செலவில் (ரூ.11,471/- மான்யம்) வாங்குவதற்கும், 297 பூப்பந்து உபகரணங்கள் ரூ.35,64,000/-செலவில் (ரூ.8,219/- மான்யம்) வாங்குவதற்கும், 123 ஜிம் உபகரணங்கள் ரூ.47,35,500/-செலவில் (ரூ.10,774/- மான்யம்) வாங்குவதற்கும், ஆக மொத்தம் 1,15,89,309/- செலவில் வாங்கப்பட உள்ளது.

மின்னொளி வசதியுடன் கூடிய செயற்கை இழை 400 மீட்டர் தடகள மைதானம், பல்நோக்கு உள்விளையாட்டரங்கம், கால்பந்து ஆடுகளம் – 1, பயிற்சி கால்பந்து மைதானம் – 1, மின்னொளி வசதியுடன் கூடிய செயற்கை இழை வளைகோல்பந்து மைதானம், பயிற்சி செயற்கை இழை வளைகோல்பந்து மைதானம், செயற்கை இழை பயிற்சி ஓடுதல் பாதை – 1, வளைகோல்பந்து ஆடுகளம், கையுந்துபந்து ஆடுகளம் – 3, கடற்கரை கையுந்துபந்து ஆடுகளம், மின்னொளியுடன் கூடிய கபாடி ஆடுகளம், கோ-கோ ஆடுகளம்,

மின்னொளியுடன் கூடிய 1 செயற்கை இழை கூடைப்பந்து ஆடுகளம், கூடைப்பந்து மைதானம், பல்நோக்கு உடற்பயிற்சி கூடம் – 1, செயற்கை இழை டென்னிஸ் ஆடுகளம் – 2, கிரிக்கெட் வலை பயிற்சி – 3, குத்துச்சண்டை வளையம் – 1, கைப்பந்து ஆடுகளம் – 1, டென்னிகாய்ட் ஆடுகளம் – 7, ஜிம்னாஸ்சியம் கூடம் – 1, உடற்பயிற்சி கூடம் – 1, மின்னொளியுடன் கூடிய இறகுப்பந்து மைதானம், மின்னொளியுடன் கூடிய இறகுப்பந்து மைதானம், மேசைப்பந்து மைதானம், நீச்சல்குளம் ஆகியவை தமிழ்நாடு விளையாட்டு மேம்பாட்டு ஆணையம், மதுரை பிரிவு விளையாட்டு கட்டமைப்பு வசதிகள் ஏற்பட உள்ளது என தெரிவித்தார்.

இவ்விழாவில் சட்டமன்ற உறுப்பினர்கள் வி.வி.ராஜன் செல்லப்பா(மதுரை வடக்கு), டாக்டர் பரமசிவம் (வேடசந்தூர்), கூடுதல் ஆட்சியர் (வளர்ச்சி) பிரியங்கா, உசிலம்பட்டி வருவாய் கோட்டாட்சியர் ராஜ்குமார் அவர்கள், ஒலிம்பிக் சங்கத்தலைவர் சோலை எம்.ராஜா, தமிழ்நாடு விளையாட்டு மேம்பாட்டு ஆணைய பொது மேலாளர் டேனியல், மாவட்ட விளையாட்டு அலுவலர் லெனின் அவர்கள், தமிழ்நாடு விளையாட்டு மேம்பாட்டு ஆணைய மண்டல மேலாளர் புண்ணியமூர்த்தி, மதுரை மாவட்ட மத்திய கூட்டுறவு வங்கி தலைவர் எம்.எஸ்.பாண்டியன், அரசு அலுவலர்கள், விளையாட்டு வீரர்கள் மற்றும் பொது மக்கள் பலர் கலந்து கொண்டனர்.