கன்னியாகுமரி

கர்ப்பிணி பெண்களுக்கு சீர்வரிசை,கலவை சாதம் – என்.தளவாய்சுந்தரம் வழங்கினார்

கன்னியாகுமரி:-

நாகர்கோவிலில் நடைபெற்ற சமுதாய வளைகாப்பு விழாவில் கர்ப்பிணி பெண்களுக்கு சீர்வரிசை மற்றும் கலவை சாதங்களை தமிழ்நாடு அரசின் டெல்லி சிறப்பு பிரதிநிதி என்.தளவாய்சுந்தரம் வழங்கினார்.

கன்னியாகுமரி மாவட்டம் நாகர்கோவில் டதி பெண்கள் மேல்நிலைப்பள்ளியில் மாவட்ட ஒருங்கிணைந்த குழந்தைகள் வளர்ச்சி திட்டத்தின் சார்பில் சமுதாய வளைகாப்பு விழா நடைபெற்றது. இவ்விழாவுக்கு மாவட்ட ஆட்சித்தலைவர் பிரசாந்த் மு.வட நரே தலைமை வகித்தார்.

 இந்நிகழ்ச்சியில் தமிழ்நாடு அரசின் டெல்லி சிறப்புப் பிரதிநிதி என்.தளவாய் சுந்தரம் பங்கறே்று கர்ப்பிணி பெண்களுக்கு சீர்வரிசை பொருட்களை வழங்கி பேசியதாவது:-

புரட்சித்தலைவி அம்மா அவர்கள் ஏழை, எளிய பெண்கள் கருவுற்றிருக்கும்போது சத்தான உணவுகள் உண்பதற்கும், வளைகாப்பு விழா நடத்துவதற்கும் வசதிகளின்றி சிரமப்படுவதை கருத்தில்கொண்டு தொலைநோக்கு பார்வையோடு 2012ம் ஆண்டு இத்திட்டத்தை செயல்படுத்தினார். இத்திட்டத்தின் மூலம் ஏராளமான ஏழை கர்ப்பிணி பெண்கள் பயனடைந்து வருகிறார்கள். இத்திட்டத்தில் 5 வகையான சத்தான கலவை சாதங்களும் வழங்க வழிவகை செய்யப்பட்டுள்ளது.

கர்ப்பிணி பெண்களாகிய நீங்கள் அனைவரும் கருவுற்றிருக்கும் இவ்வேளையில் ஆரோக்கியமான சத்தான உணவுகளை குறிப்பிட்ட நேரத்தில் உண்டு, ஆரோக்கியமான குழந்தைகளை பெற்றுக்கொள்ள வேண்டும் என்பதற்காக தமிழ்நாட்டிலுள்ள அனைத்து அரசு மருத்துவமனைகளிலும் மகப்பேறு மருத்துவ வசதிகளை சிறப்பாக செயல்படுத்தியிருக்கிறார். புரட்சித்தலைவி அம்மாவின் வழியில் செயல்படும் தமிழக அரசும் இத்திட்டத்தை தொடர்ந்து செயல்படுத்தி வருகிறது. எனவே, நீங்கள் அனைவரும் தமிழக அரசின் திட்டங்களை பெற்று, ஆரோக்கியமான குழந்தைகளை பெற்றெடுக்க மனமார வாழ்த்துகிறேன்.

இவ்வாறு தமிழ்நாடு அரசின் டெல்லி சிறப்புப் பிரதிநிதி என்.தளவாய் சுந்தரம் பேசினார்.

விழாவில் நாகர்கோவில் வட்டாரத்தை சார்ந்த 160 கர்ப்பிணி பெண்களுக்கு பூ, பழங்களுடன் வளையல் அணிவித்து வளைகாப்பு விழா நடத்தப்பட்டது. கர்ப்பிணி பெண்களுக்கு ஐந்து வகையான கலவை சாதமும் வழங்கப்பட்டது. விழாவில் தமிழ்நாடு அரசின் டெல்லி சிறப்பு பிரதிநிதி என்.தளவாய்சுந்தரம், மாவட்ட ஆட்சித்தலைவர் பிரசாந்த் மு.வடநேரே ஆகியோர் கர்ப்பிணி பெண்களுக்கு கலவை சாதங்களை பரிமாறினர்.

இந்நிகழ்ச்சியில், மாவட்ட ஆவின் பெருந்தலைவர் எஸ்.ஏ.அசோகன், அரசு ரப்பர் வளர்ப்போர் கூட்டுறவு விற்பனை சங்கத்தலைவர் டி.ஜாண் தங்கம், மாவட்ட கூட்டுறவு ஒன்றிய தலைவர் எஸ்.கிருஷ்ணகுமார், தமிழ்நாடு மாநில சிறுபான்மையினர் நல ஆணைய உறுப்பினர் அ.ராஜன், மாவட்ட மீனவ கூட்டுறவு சங்கத் தலைவர் திமிர்தியூஸ், சுகாதார பணிகள் துணை இயக்குநர் மதுசூதனன், மாவட்ட ஒருங்கிணைந்த குழந்தைகள் வளர்ச்சி திட்ட அலுவலர் ஜோஸ்பின் சகாய பிரமிளா, மாவட்ட சமூக நலத்துறை அலுவலர் சரோஜினி, குழந்தைகள் வளர்ச்சி திட்ட அலுவலர் காயத்திரி மற்றும் கர்ப்பிணி பெண்கள் மற்றும் பலர் கலந்து கொண்டனர்.