தற்போதைய செய்திகள்

அமைச்சர் ஆர்.பி.உதயகுமார் தலைமையில் முதலமைச்சருக்கு வழி எங்கும் பிரம்மாண்டமான வரவேற்பு

மதுரை

கழக அம்மா பேரவை சார்பில் அமைச்சர் ஆர்.பி.உதயகுமார் தலைமையில் முதலமைச்சருக்கு வழி எங்கும் பிரம்மாண்டமான வரவேற்பு. இரண்டு கிலோமீட்டர் அளவில் திறந்த ஜீப்பில் மக்களை சந்தித்தார் முதலமைச்சர்.

திண்டுக்கல் மாவட்டத்திற்கு மருத்துவ கல்லூரிக்கான அடிக்கல் நாட்டு விழாவிற்கு காலை சென்னையிலிருந்து விமானம் மூலம் மதுரைக்கு முதலமைச்சர் வந்தடைந்தார். அதனையொட்டி காரின் மூலம் திண்டுக்கல் செல்லும்போது திருமங்கலம் தொகுதி கப்பலூரில் கழக அம்மா பேரவை செயலாளரும், மதுரை புறநகர் மேற்கு மாவட்ட செயலாளரும், அமைச்சருமான ஆர்.பி.உதயகுமார் தலைமையில் முதலமைச்சருக்கு பிரமாண்ட வரவேற்பு அளிக்கப்பட்டது.

முன்னதாக மேளதாளம் முழங்க மீனாட்சி அம்மன் கோவில், அழகர் கோவில், திருப்பரங்குன்றம் கோவில், பழமுதிர்ச்சோலை ஆகிய கோயிலிலிருந்து முதலமைச்சருக்கு பிரசாதம் வழங்கப்பட்டது. அதைத்தொடர்ந்து சாலை இருபுறம் மக்கள் வெள்ளமென திரண்டிருந்தனர், இதனை ஒட்டி கொளுத்தும் வெயிலில் திறந்த ஜீப்பில் முதலமைச்சர் மக்களை சந்தித்து இரட்டை விரலை காண்பித்தபடி இரண்டு கிலோமீட்டர் சுற்றளவு வரை சென்றார். அதைத்தொடர்ந்து விழா மேடையில் முதலமைச்சருக்கு வெற்றியின் அடையாளமாக வெற்றிலை மாலை அணிவிக்கப்பட்டது.

அதனைத் தொடர்ந்து முதலமைச்சர் எடப்பாடி கே.பழனிசாமி பேசியதாவது:-

புரட்சித்தலைவி அம்மாவின் திட்டங்களை சிந்தாமல் சிதறாமல் நாங்கள் வழங்கி வருகிறோம் ஏழை மக்களே இல்லையென்ற சூழ்நிலையை நிச்சயம் உருவாக்குவோம்.இந்த ஆட்சியில் எந்த ஒரு திட்டமும் நிறைவேற்றவில்லை என்று எதிர்க்கட்சிகள் தவறான கருத்தை, பொய்யான கருத்தை, அவதூறான கருத்தை, விஷம தக்க கருத்தை பரப்பி வருகின்றனர்.

நான் ஆட்சிப் பொறுப்பை ஏற்று மூன்று ஆண்டுகள் நிறைவு பெற்று நான்காம் ஆண்டு காலமாக அடி எடுத்து வைத்திருக்கிறோம்.எவ்வளவு இடையூறு இந்த எதிர்க்கட்சிகளால் அந்த இடையூறுகளை எல்லாம் நீக்கி தடையெல்லாம் அகற்றப்பட்டு உங்கள் ஆதரவினால் இன்றைக்கு அஇஅதிமுக அரசு நான்காம் ஆண்டு காலடி எடுத்து வைத்திருக்கிறது.

இது உங்களுடைய அரசு மக்களுடைய அரசு நான் உங்களை போல் கிராமத்திலிருந்து பிறந்து வளர்ந்து இன்றைக்கு முதலமைச்சராக வந்திருக்கின்றேன்.ஏழைகளோடு ஒன்றாக இணைந்து பணியாற்றி இன்றைக்கு உயர்ந்து உள்ளேன் உங்களின் கஷ்டங்களை முழுமையாக தெரிந்து கொண்டு இருக்கின்றேன்.

உங்கள் வீட்டில் ஒருவனாக இருந்து வாழ்ந்து கொண்டிருக்கிறேன் ஆகவே உங்களுக்கு என்ன பிரச்சனை இருந்தாலும் அதை எங்களுக்கு வந்த பிரச்சினையாக கருதி அரசை வழிநடத்தி சென்று கொண்டிருக்கிறோம்.ஆகவே இந்த அரசை பொறுத்தவரை மக்களுடைய அரசு மக்களின் தேவைகளை அறிந்து நிறைவேற்றக்கூடிய அரசு எங்கள் அரசு என்பதை பல்வேறு காலகட்டங்களில் நாங்கள் நிரூபித்து காட்டியுள்ளோம்.

கிராமம் சூழ்ந்த எல்லாபகுதிகளிலும் தைப்பொங்கல் பொங்க வேண்டும் என்பதற்காக அம்மா அரசு பொங்கல் தொகுப்பு திட்டத்தை கொடுத்து இன்றைக்கு சிறப்பாக தை பண்டிகைகளை கொண்டாடுவதற்காக தைப்பொங்கல் நாளில் அனைத்து இடங்களிலும் பொங்க வைப்பதற்காக தைத்திருநாள் பரிசு ஆயிரம் ரூபாயை அனைத்து குடும்ப அட்டைகளுக்கு வழங்கிய அரசு எங்கள் அரசு.

அதுபோல கிராமத்தில் உள்ளவருக்கு உயர் சிகிச்சை பெற வேண்டும் என்பதற்காக மதுரையில் எய்ம்ஸ் மருத்துவமனையை கொண்டு வந்துள்ளோம் இதற்கு பாரதப் பிரதமர் அடிக்கல் நாட்டி சென்றார்.விரைவில் எய்ம்ஸ் மருத்துவமனை துவங்க இருக்கிறது அந்த மருத்துவமனை டெல்லியில் உள்ள எய்ம்ஸ் மருத்துவமனை உள்ள உயர்சிகிச்சை போல் மதுரை எய்ம்ஸ் மருத்துவமனையில் கிடைக்கும் இது சாதாரண விஷயமல்ல லட்சக்கணக்கான ரூபாய் செலவழித்து சிகிச்சை பெறும் நோயைக் கூட பைசா செலவில்லாமல் எய்ம்ஸ் மருத்துவமனையில் சிகிச்சை பெறலாம்.

இப்படி அற்புத திட்டங்களையெல்லாம் வழங்கும் இந்த அரசுக்கு என்றைக்கும் நீங்கள் துணையாக இருக்க வேண்டும் அம்மா அரசு தான் மக்களுக்கு நன்மை செய்யக்கூடிய அரசு ஏழை எளிய மக்களை ஒட்டி பயணம் செய்யக்கூடிய ஒரே அரசு இந்த அரசுக்கு எப்போதும் நீங்கள் ஆதரவாக இருக்க வேண்டும்.

இவ்வாறு முதலமைச்சர் எடப்பாடி கே.பழனிசாமி பேசினார்.

இந்த நிகழ்ச்சியில் அமைச்சர் செல்லூர் கே.ராஜூ, மதுரை புறநகர் கிழக்கு மாவட்ட செயலாளர் வி.வி.ராஜன் செல்லப்பா, சட்டமன்ற உறுப்பினர்கள் கே.மாணிக்கம், எஸ்.எஸ்.சரவணன், பெரியபுள்ளான் (எ) செல்வம், நீதிபதி, மாவட்ட அம்மா பேரவை செயலாளர் தமிழரசன், மாவட்டக் கழக துணை செயலாளர் ஐயப்பன், மாவட்ட இலக்கிய அணி செயலாளர் திருப்பதி, கழக அம்மா பேரவை துணை செயலாளர் வெற்றிவேல், முன்னாள் மண்டல தலைவர் சாலைமுத்து, ஒன்றியக் கழக செயலாளர்கள் செல்லப்பாண்டி, அன்பழகன், ராமசாமி, மகாலிங்கம், ராஜா, நகர செயலாளர்கள் விஜயன், பூமாராஜா உட்பட பலர் கலந்து கொண்டனர்.