சிறப்பு செய்திகள்

தமிழகத்தில் கொரோனா வைரஸ் பாதிப்பு இல்லை – முதலமைச்சர் பேட்டி

மதுரை

தமிழகத்தில் கொரோனா வைரஸ் பாதிப்பு இல்லை என்று முதலமைச்சர் எடப்பாடி கே.பழனிசாமி தெரிவித்துள்ளார்.

முதலமைச்சர் எடப்பாடி கே.பழனிசாமி  மதுரை விமான நிலையத்தில் செய்தியாளர்களுக்கு அளித்த பேட்டி வருமாறு:

இன்றையதினம் இதயதெய்வம் புரட்சித்தலைவி அம்மா அவர்களின் நல்லாசியோடு திண்டுக்கல் மாவட்டத்தில் அரசு மருத்துவக் கல்லூரிக்கு அடிக்கல் நாட்டப்பட்டுள்ளது.

கேள்வி:கொரோனா வைரஸ் காரணமாக பள்ளிகளுக்கு விடுமுறை அறிவிக்கப்படுமா?

பதில்: எல்.கே.ஜி, யூ.கே.ஜி படிக்கும் சிறு குழந்தைகளுக்கு 15 நாட்கள் விடுமுறை குறித்து அறிவிக்கப்படும்.

கேள்வி: கொரோனா வைரஸ் தாக்கத்தை பேரிடராக நினைத்து நடவடிக்கை எடுக்க வேண்டுமென்று மத்திய அரசு, மாநில அரசுகளுக்கு அறிவுறுத்தியுள்ளதற்கு தமிழகத்தில் எடுக்கப்பட்ட நடவடிக்கைகள் என்ன?

பதில்: நேற்றையதினம் கொரோனா வைரஸ் குறித்து துணை முதலமைச்சர், மக்கள் நல்வாழ்வு மற்றும் குடும்ப நலத்துறை அமைச்சர், வருவாய்த் துறை அமைச்சர், உள்ளாட்சித் துறை அமைச்சர் என சம்பந்தப்பட்ட துறை அமைச்சர்கள், துறைச் செயலாளர்கள் அனைவரும் கொரோனா வைரஸைக் கட்டுப்படுத்துவது குறித்து கலந்து ஆலோசித்தோம், விரைவில் அதுகுறித்து அறிக்கை வெளியிடப்படும்.

கேள்வி: கொரோனா வைரஸ் காரணமாக கல்வி மற்றும் வணிக நிறுவனங்களை மூட வேண்டுமென்று உங்கள் கூட்டணியில் உள்ள பா.ம.க.வினர் கோருகிறார்களே?

பதில்: தமிழகத்தில் அந்தளவிற்கு பாதிப்பு இல்லை.

கேள்வி: ரஜினிகாந்த், கட்சிக்கு ஒரு தலைமை, ஆட்சிக்கு ஒரு தலைமை என்று கூறியுள்ளாரே?

பதில்: அவர் இன்னும் கட்சியே ஆரம்பிக்கவில்லை. எனவே, கற்பனையான கருத்தைத் தெரிவிக்கக்கூடாது.

கேள்வி: பிஜேபி-ல் புதிதாக பொறுப்பேற்றுள்ள முருகன் அவர்கள் சட்டமன்றத்தில் எங்கள் கூட்டணி தொடரும், அதிகமான சட்டமன்ற இடங்களை கேட்டுப் பெறுவோம். ஆளும் கட்சியைவிட கூடுதலாக சட்டமன்ற உறுப்பினர்களாக இருப்போம் என்று சொல்லியுள்ளாரே?

பதில்: கட்சியை வளர்க்க வேண்டுமென்றுதான் அந்தந்தக் கட்சித் தலைவர்கள் பேசுவார்கள். மேலும், அனைத்துக் கட்சியினரும், அவர்களுடைய கட்சிகள் அதிக இடத்தில் வர வேண்டுமென்று தான் கட்சி நடத்துகிறார்கள். அந்த அடிப்படையில், புதிதாகத் தேர்ந்தெடுக்கப்பட்டவர் என்பதால் அவரும் அந்த ஆர்வத்தில் கருத்து தெரிவித்திருப்பார்.

கேள்வி: கமலஹாசன், சந்திப்போம் என்று சொல்லமாட்டேன், சந்தித்தே ஆக வேண்டுமென்று சொல்லியிருக்கின்றாரே?

பதில்: எதைச் சந்திப்போம் என்று சொல்லியிருக்கிறார்.

கேள்வி: தேர்தலையும், மக்களையும்.

பதில்: இது மிகப்பெரிய ஜனநாயக நாடு, இதில் யாரும் கட்சி ஆரம்பிக்கலாம், தேர்தலை சந்திக்கலாம், அதில் எந்தத் தடையும் கிடையாது.

கேள்வி: மாற்றம் வேண்டுமென்று ரஜினிகாந்த் சொன்னது போன்ற தாக்கத்திலே இவரும் பேசியிருக்கின்றாரே?

பதில்: இவருடைய சக்தி என்னவென்று கடந்த தேர்தலிலேயே பார்த்து விட்டார்களே.

கேள்வி: அமமுக ஆரம்பித்து மூன்றாண்டுகள் ஆகிவிட்டது. இனி உண்மையான தொண்டர்கள் எங்களிடம் வர ஆரம்பித்து விடுவார்கள் என்று தினகரன் சொல்கிறாரே?

பதில்: அப்பொழுதும் அப்படித் தான் சொன்னார், இப்பொழுதும் அப்படித் தான் சொல்கிறார். தேர்தலுக்குப் பிறகு அது இருக்குமா இல்லையா என்பதை மக்கள் முடிவு செய்வார்கள்.

கேள்வி: தமிழகத்திலுள்ள சிறுபான்மை மக்கள் அச்சத்தில் உள்ளார்கள். அந்த அச்சத்தைப் போக்குவது தமிழக அரசின் கடமையாக இருக்குமென்று வைரமுத்து சொல்லியிருக்கின்றாரே?

பதில்: நேற்றைய தினம், சட்டமன்றத்தில், நானும், வருவாய்த்துறை அமைச்சரும் தெளிவாக, விளக்கமாக சிறுபான்மையின மக்களின் அச்சத்தைப் போக்குவதற்கான கருத்துக்களைத் தெரிவித்துள்ளோம். அவை பத்திரிகைகள் மற்றும் தொலைக்காட்சிகளிலும் வெளி வந்துள்ளது.

இவ்வாறு முதலமைச்சர் எடப்பாடி கே.பழனிசாமி தெரிவித்தார்.