திருவண்ணாமலை

சாதாரண இருமல் தும்மலுக்கு எல்லாம் கொரோனா என்று அச்சம் கொள்ளத் தேவையில்லை – தொழிலாளிகளிடம், வி.பன்னீர்செல்வம் எம்.எல்.ஏ விழிப்புணர்வு

திருவண்ணாமலை

சாதாரண இருமல், தும்மலுக்கு எல்லாம் கொரோனா என்று அச்சம் கொள்ளத் தேவையில்லை என்று நூறு நாள் வேலை திட்ட தொழிலாளிகளிடம் வி.பன்னீர்செல்வம் எம்.எல்.ஏ விழிப்புணர்வு ஏற்படுத்தினார்.

திருவண்ணாமலை மாவட்டம் கலசபாக்கம் அடுத்த பழங்கோயில் கிராமத்தில் புதிதாக ரூபாய் 21 லட்சம் மதிப்பீட்டில் கட்டப்பட்டு வரும் துணை சுகாதார நிலையத்தை பார்வையிட்டு அங்கிருந்த தேசிய ஊரக வேலை உறுதியளிப்புத் திட்ட தொழிலாளர்களிடம் கொரோனா வைரஸ் குறித்து சட்டமன்ற உறுப்பினர் வி.பன்னீர்செல்வம் பேசியதாவது:-

தமிழகத்தில் கொரோனா குறித்து யாரும் பீதியடைய வேண்டாம். காரணம் வைரஸ் என்பது ஏற்கனவே தாக்கத்தில் உள்ளவர்களிடம் நாம் பழகி இருந்தாலும் அல்லது அவர்களுடன் டிராவல் செய்து இருந்தால் தான் நமக்கு வரும். இல்லை என்றால் வருவதற்கு உண்டான வாய்ப்பில்லை. சாதாரண இருமல் தும்மலுக்கு எல்லாம் கொரோனா என்று அச்சம் கொள்ளத் தேவையில்லை. கலசப்பாக்கம் பகுதிக்குட்பட்ட அனைத்து ஆரம்ப சுகாதார நிலையங்களிலும் காய்ச்சல், இருமல் தலைவலி என்று வந்தால் உடனடியாக அதற்கு தேவையான மருத்துவரிடம் மருந்துகளை எடுத்துக் கொண்டாலே சரியாகி விடுகிறது.

ஆனால் நீங்கள் டிவி பார்ப்பதாலும் மற்றும் செல்போனில் ரிங்டோன் கேட்பதாலும் நமக்கும் வந்துவிடுமோ என்று அச்சம் கொள்ளாதீர்கள். நீங்கள் செய்ய வேண்டியவை வீட்டிற்கு வெளியில் இருந்து உள்ளே செல்லும் போது கைகளையும் கால்களையும் சுத்தமாக கழிவு சென்றாலே போதுமானது. குழந்தைகளுக்கும் அடிக்கடி கை கழுவும் பழக்கத்தை கற்றுக் கொடுங்கள். இப்படி இருந்தாலே எப்படிப்பட்ட வைரஸ் நம்மை தாக்காது. மேலும் முகத்தில் மாஸ்க் அணிவது தேவை இல்லாதது. வைரஸ் இருக்கும் இடங்களில் மட்டும் தான் மாஸ்க் அணிய வேண்டும். எனவே மற்றவர் சொல்வதை கேட்டு வைரஸ் என்று யாரும் பீதியடைய வேண்டாம்.

இவ்வாறு வி.பன்னீர்செல்வம் எம்.எல்.ஏ பேசினார் .

அதனைத் தொடர்ந்து கடலாடி வட்டார மருத்துவ அலுவலர் மணிகண்டபிரபு பொதுமக்களிடம் கொரோனா வைரஸ் பற்றி விளக்கிப் பேசினார். எவ்வாறு பாதுகாத்துக் கொள்வது, சளி இருமல் இருந்தால் உடனடியாக அரசு மருத்துவமனைகளை அணுக கேட்டுக்கொண்டார். இந்நிகழ்ச்சியில் வீட்டு வசதி சங்க துணைத்தலைவர் பொய்யாமொழி, தலைவர்களின் கூட்டமைப்பு தலைவர் ஆறுமுகம், பழங்கோயில் ஊராட்சி மன்ற தலைவர் செல்வராஜ் உட்பட உள்ளாட்சி அமைப்பு பிரதிநிதிகள் கூட்டுறவு சங்க பிரதிநிதிகள்அரசு அதிகாரிகள் ஆகியோர் கலந்து கொண்டனர்.