தற்போதைய செய்திகள்

ரூ.891 லட்சத்தில் புதிய காவிரி கூட்டுக்குடிநீர் திட்டப்பணி – அமைச்சர் எம்.ஆர்.விஜயபாஸ்கர் தொடங்கி வைத்தார்

கரூர்

கரூர் ஊராட்சி ஒன்றியம் ஆத்தூர், மண்மங்கலம் மற்றும் கடம்பங்குறிச்சி ஊராட்சிகளில் ரூ.891 லட்சம் மதிப்பில் நடைபெறவுள்ள புதிய கூட்டு குடிநீர் திட்ட பணியை போக்குவரத்துத்துறை அமைச்சர் எம்.ஆர்.விஜயபாஸ்கர் தொடங்கி வைத்தார்.

கரூர் மாவட்டம் கரூர் ஊராட்சி ஒன்றியம் மேட்டுப்பாளையம் காவிரிக்கரையில் நடைபெற்ற நிகழ்ச்சியில் ஆத்தூர், மண்மங்கலம் மற்றும் கடம்பங்குறிச்சி ஊராட்சிகளுக்கான புதிய காவிரி கூட்டுக் குடிநீர்திட்ட பணியினை ரூ.891 லட்சம் மதிப்பில் போக்குவரத்துத்துறை அமைச்சர் எம்.ஆர்.விஜயபாஸ்கர், மாவட்ட ஆட்சித்தலைவர் த.அன்பழகன் தலைமையில் நேற்று பூமிபூஜையிட்டு பணிகளை தொடங்கி வைத்தார்.

இந்நிகழ்ச்சியில் அமைச்சர் எம்.ஆர்.விஜயபாஸ்கர் தெரிவித்ததாவது:-

புரட்சித்தலைவி அம்மா அவர்கள் சொன்ன இங்கு எல்லோரும் எல்லாமும் பெறவேண்டும் இங்கு இல்லாமை இல்லாத நிலை வேண்டும் என்ற தாரக மந்திரத்தில் செயல்படும் முதலமைச்சர் மற்றும் துணை முதலமைச்சர் ஆகியோரின் உத்தரவிற்கிணங்க கரூர் மாவட்டத்தில் பொதுமக்களின் அத்தியாவசிய தேவைகளை அறிந்து அது தொடர்பான பணிகள் தொடர்ந்து செயல்படுத்தப்பட்டு வருகிறது. அந்த வகையில் நகராட்சி மற்றும் பேரூராட்சி பகுதிகளுக்கு இணையாக ஊராட்சி ஒன்றியங்களுக்கும் குடிநீர் திட்டப்பணிகள் செயல் படுத்தப்படுகிறது.

நமது மாவட்டத்திலிருந்து பல்வேறு மாவட்டத்திற்கு குடிநீர் செல்கிறது ஆனால் காவிரி கரையோரத்தில் உள்ள மக்கள் குடிநீர் பற்றாக்குறையால் சிரமப்படுவதால் இத்திட்டம் முதலமைச்சரின் கவனத்திற்கு எடுத்துச்சென்று சிறப்பு நிதிபெற்று பணிகள் தொடங்கப்பட்டுள்ளது. இத்திட்டத்தின் மூலம் நாள் ஒன்றுக்கு நபர் ஒன்றுக்கு 55 லிட்டர் வீதம் வழங்கும் விதமாக அமைக்கப்பட்டுள்ளது. இதன் மூலம் இந்த ஊராட்சிகளுக்கு நிரந்தரமாக தண்ணீர் பிரச்சனை தீர்க்கப்படும்.

கரூர் மாவட்டம் முழுவதும் 40 அலுவலர்கள் 4 நாட்களாக ஆய்வுசெய்து அதன் அடிப்படையில் திட்டமிடப்பட்டு தாந்தோணி பகுதிக்கு ரூ.81.40 கோடி மதிப்பில் குடிநீர் திட்டப்பணிகள் நடைபெற்று வருகிறது. மிகவும் வரட்சி பகுதியான க.பரமத்தி மற்றும் அரவக்குறிச்சி பகுதிகளுக்கு குடிநீர்திட்ட பணிகளுக்காக முதலில் ரூ.250 கோடி நிதி ஒதுக்கப்பட்டு பின்பு மறுமதிப்பீடு செய்யப்பட்டு ரூ.310 கோடியில் பணிகள் நடைபெற உள்ளது.

காதப்பறை ஊராட்சிக்காக ரூ.3.10 கோடி மதிப்பில் 11 கிலோ மீட்டர் நீளத்திற்கு பைப்லைன் அமைத்து தண்ணீர் எடுத்து வரப்படுகிறது. அதே போல் பஞ்சமாதேவியில் ரூ. 1 கோடி மதிப்பில் 3 லட்சம் லிட்டர் கொள்ளளவு கொண்ட தரைமட்ட நீர் சேமிப்பு தொட்டி அமைத்து குடிநீர் வழங்கப்பட்டு வருகிறது. இத்துடன் பல்வேறு குடிநீர் திட்டப்பணிகள் நடைபெற்று வருகிறது. அவை அனைத்தும் முடிக்கப்பட்டு விரைவில் கரூர் மாவட்டம் குடிநீர் தன்னிறைவு பெற்ற மாவட்டமாக உருவாகும்.

புகளூர் வாய்க்கால் அரசு நிதியை எதிர்பார்க்காமல் அது வரும் போது வரட்டும் என்று ரூ.25 லட்சத்தில் தூர்வாரப்பட்டு இன்று கடைமடை வரை தண்ணீர் சென்று கொண்டிருக்கிறது. புகளூர் காவிரி பகுதியில் ரூ.500 கோடியில் கதவணை அமைக்கும் பணி தொடங்கப்பட உள்ளது. கரூர் மாவட்டம் நெரூர் நாமக்கல் மாவட்டம் ஒருவந்தூர் இடையேயும், குளித்தலை மற்றும் முசிறி இடையேயும் கதவை அமைக்க நிலம் எடுக்கும் பணிகள் நடைபெற்று வருகிறது.

ஏழை எளிய மற்றும் தாழ்த்தப்பட்ட மக்கள் பயன் பாட்டிற்காக வாங்கலில் ரூ.1 கோடி மதிப்பிலும், ஆத்தூர் மற்றும் மின்னாம்பள்ளியில் ரூ.80 லட்சம் மதிப்பிலும் சமுதாயக்கூடம் கட்டப்பட உள்ளது. சின்னகாளிபாளையத்தில் 30 குடும்பங்களுக்கு முதலமைச்சரின் சூரியசக்தியுடன் கூடிய பசுமை வீடுகள் கட்டிக்கொடுக்கப்பட உள்ளது. அதற்கு நிதி பற்றாக்குறை ஏற்படும் எனது சொந்த நிதியில் கட்டிகொடுத்து பிற அடிப்படை வசதிகள் செய்து கொடுத்து தாழ்த்தப்பட்ட மக்கள் வசிக்கும் மாதிரி கிராமமாக மாற்றி அமைக்கப்படும். வெண்ணமலை அருள்மிகு பாலசுப்பிரமணியசுவாமி திருக்கோவிலில் ரூ.3 கோடி மதிப்பில் திருமண மண்டபம் மற்றும் பிற மேம்பாட்டு பணிகள் நடைபெற்று வருகிறது.

முதலமைச்சர் மற்றும் துணை முதலமைச்சர் ஆகியோர் பாரத ரத்னா புரட்சித்தலைவர் எம்.ஜி.ஆரின் நூற்றாண்டு விழாவில் கானகத்திற்குள் கரூர் என்ற திட்டத்தில் மரக்கன்றுகள் நடவு செய்யும் பணியினை தொடங்கி வைத்தார். அதைத்தொடர்ந்து கரூர் நகரப்பகுதி மற்றும் கிராம பகுதியில் எம்.ஆர்.வி. அறக்கட்டளையின் சார்பில் நாவல், புங்கை, வேம்பு உள்ளிட்ட சுமார் 14 ஆயிரத்திற்கும் மேற்பட்ட மரக்கன்றுகள் இதுவரை நடவு செய்யப்பட்டுள்ளது. அந்த மரங்கள் அனைத்தும் வளர்த்து காப்பாற்ற நாள்தோறும் தண்ணீர் ஊற்றப்படுகிறது. அதேபோல் பள்ளி மாணவர்களிடையே மரம் வளர்ப்பதை ஊக்குவிக்க ஒரே நேரத்தில் 5000 மரக்கன்றுகள் கொடுக்கப்பட்டுள்ளது.

கழிவுநீர் கால்வாய் அமைக்க மட்டும் ரூ13.10 கோடி நிதி பெறப்பட்டு பணிகள் நடைபெற்று வருகிறது. அதேபோல் கரூர் நகராட்சிக்கு மட்டும் ரூ.22 கோடி நிதி பெறப்பட உள்ளது. கரூர் ரயில் நிலையம் முதல் சேலம் புறவழிச்சாலை வரை ரூ.22 கோடியில் அம்மா சாலை அமைக்கும் பணி நடைபெற்று வருகிறது. இதற்காக 57 நில உரிமைதாரர்களிடம் குழு அமைத்து பேச்சுவார்த்தை நடத்தி அனுமதி பெற்று உள்ளோம்.

முதலமைச்சரின் சிறப்பு குறை தீர்க்கும் திட்டத்தில் கிராமம், கிராமமாக சென்று பொதுமக்களிடம் 35,327 ஆயிரம் மனுக்கள் பெறப்பட்டு அதில் 23,939 தீர்வு கானப்பட்டுள்ளது. அதில் 8 ஆயிரம் பேருக்கு முதியோர் மற்றும் விதவை உதவித்தொகை வழங்கப்பட்டுள்ளது. மீண்டும் 8 ஆயிரம் பேருக்கு முதியோர் உதவித்தொகை வழங்க நடவடிக்கை எடுக்கப்பட்டு வருகிறது.

மக்கள் தொகை அடிப்படையில் மருத்துவக்கல்லூரி மருத்துவமனைகள் அமைக்க மத்திய அரசு 72 மருத்துவக்கல்லூரி மருத்துவமனைகளை அறிவித்திருந்தது. அதில் 11 மருத்துவக்கல்லூரி மருத்துமனைகளை முதலமைச்சர் பெற்று தந்துள்ளார். அதேபோல் மதுரையில் ரூ.1500 கோடி மதிப்பில் அமைக்க எய்ம்ஸ் மருத்துவமனையும் பெற்று தந்துள்ளார்.

கரூர் மாவட்டத்தின் மையபகுதியில் கட்டப்பட்டுள்ள மிக பிரமாண்டமான மருத்துவக்கல்லூரி மருத்துவமனையை முதலமைச்சர் 5.3.2020 அன்று திறந்து வைத்தார். அப்போது கட்டடத்தின் அழகை பார்த்து இனி கட்டப்படும் அனைத்து மருத்துவக்கல்லூரி மருத்துவமனைகளும் கரூர் மாடலில் கட்ட வேண்டும் என அறிவித்துள்ளார். எந்த திட்டமாக இருந்தாலும் தொலைநோக்கு பார்வையில் சிந்தித்து தரமாகவும் சிறப்பாகவும் செய்யப்பட்டு வருகிறது.

இவ்வாறு அமைச்சர் எம்.ஆர்.விஜயபாஸ்கர் தெரிவித்தார்.

பின்னர் ஆத்தூர் ஊராட்சி தன்னாசிகவுண்டனூரில் ரூ. 7 லட்சம் மதிப்பில் 30,000 லிட்டர் கொள்ளளவு கொண்ட மேல்நிலை நீர்தேக்க தொட்டியமைக்கும் பணிக்கும், புஞ்சை கடம்பங்குறிச்சி ஊராட்சி சின்னபவரப்பாளையத்தில் ரூ.15 லட்சம் மதிப்பில் சமூதாய கூடம் அமைக்கும் பணிக்கும், வங்கால் ஊராட்சி குப்புச்சிபாளையம் அரசு பெண்கள் மற்றும் ஆண்கள் மேல்நிலைப்பள்ளியில் தலா ரூ.5 லட்சம் மதிப்பில் சமையற் கூடம் அமைக்கும் பணிக்கும், சோமூர் ஊராட்சி திருமூக்கூடலூர் அம்பேத்கார் நகரில் ரூ.15 இலட்சம் மதிப்பில் சமூதயக் கூடம் அமைக்கும் பணிக்கும், நெரூர் வடக்கு ஊராட்சி ஒத்தக்கடையில் ரூ.15 லட்சம் மதிப்பில் சமுதாயக்கூடம் அமைக்கும் பணிக்கும், நெரூர் தெற்கு ஊராட்சி மறவாபாளையத்தில் ரூ.15 லட்சம் மதிப்பில் சமுதாயக் கூடம் அமைக்கும் பணிக்கும் மற்றும் வேடிச்சிபாளையத்தில் ரூ.22.67 லட்சம் மதிப்பில் கழிவுநீர் வடிகால் அமைக்கும் பணிகளுக்கும் என மொத்தம் ரூ.990.67 லட்சம் பணிகளை தொடங்கி வைத்தார். அதனைத்தொடர்ந்து மின்னாம்பள்ளியில் மரகன்றுகளை நடவு செய்தார்.

இந்நிகழ்ச்சிகளில் மாவட்ட ஊரக வளர்ச்சி முகமை கூடுதல் இயக்குநர் எஸ்.கவிதா, தமிழ்நாடு குடிநீர் வடிகால் வாரிய செயற்பொறியாளர் பிரபுராம், நகரகூட்டுறவு வங்கித்தலைவர் திருவிகா, மாவட்ட ஊராட்சித் துணைத்தலைவர் ந.முத்துக்குமார், கரூர் ஊராட்சி ஒன்றியக் குழுத்தலைவர் பாலமுருகன், வட்டார வளர்ச்சி அலுவலர்கள் புவனேஸ்வரி, பாலச்சந்திரன், மண்மங்கலம் வட்டாட்சியர் செந்தில், கூட்டுறவு சங்கங்களின் பிரதிநிதிகள் கமலக்கண்ணன், ரேணுகா, உள்ளிட்ட அலுவலர்கள் கலந்து கொண்டனர்.