சிறப்பு செய்திகள்

தூய்மையில் சிறந்த மாநிலமாக தமிழகத்திற்கு மத்திய அரசு விருது – பிரதமரிடம் இருந்து அமைச்சர் எஸ்.பி.வேலுமணி பெற்றுக் கொண்டார்.

புதுடெல்லி:-

மத்திய அரசின் குடிநீர் மற்றும் சுகாதார அமைச்சகத்தின் சார்பில், ஊரகப் பகுதிகளின் சுகாதாரத்தின் தரம் மற்றும் சுகாதார கட்டமைப்பில் அடைந்த முன்னேற்றம் ஆகியவற்றின் முக்கிய அளவீடுகளை கொண்டு மேற்கொள்ளப்பட்ட ஆய்வில் கிடைக்கப்பெற்ற மதிப்புகளின் அடிப்படையில் இந்திய அளவில் சிறந்த மாநிலத்திற்கான விருதினை குஜராத் மாநிலம் அகமதாபாத்தில் நடைபெற்ற தூய்மை பாரத விழாவில் பிரதமரிடமிருந்து, தமிழக அரசின் சார்பில் நகராட்சி நிர்வாகம் ஊரக வளர்ச்சி மற்றும் சிறப்பு திட்ட செயலாக்கத் துறை அமைச்சர் எஸ்.பி.வேலுமணி பெற்றுக் கொண்டார்.

மத்திய அரசின் குடிநீர் மற்றும் சுகாதார அமைச்சகம் ஊரகப் பகுதிகளின் சுகாதாரத்தின் தரம் மற்றும் சுகாதார உட்கட்டமைப்பில் அடைந்த முன்னேற்றம் ஆகியவற்றின் முக்கிய அளவீடுகளை தூய்மை கணக்கெடுப்பு ஊரகம்-2019 மூலம் இந்தியாவிலுள்ள மாநிலங்கள் மற்றும் மாவட்டங்கள் தரவரிசைபடுத்தப்பட்டுள்ளது.இந்த ஆய்வுகள் 2019-ம் ஆண்டு ஆகஸ்டு 17-ந்தேதி முதல் செப்டம்பர் 5-ந்தேதி வரை தனியார் நிறுவனம் ஒன்றின் மூலம் இந்தியாவில் உள்ள 690 மாவட்டங்களில் உள்ள 17,400 க்கும் மேற்பட்ட கிராம ஊராட்சிகளில் நடத்தப்பட்டது.

தமிழ்நாட்டில் 31 ஊரக மாவட்டங்களில் உள்ள 800-க்கும் மேற்பட்ட கிராம ஊராட்சிகளில் இந்த தூய்மை கணக்கெடுப்பு மேற்கொள்ளப்பட்டது. இத்தூய்மை ஆய்வுகள் கீழ்கண்ட முக்கியமான மூன்று காரணிகளின் அடிப்படையில் மதிப்பீடு செய்யப்பட்டுள்ளது.

• பொது இடங்களாகிய பள்ளிகள், அங்கன்வாடி மையங்கள், ஆரம்ப சுகாதார நிலையங்கள், கிராமச் சந்தைகள், வழிபாட்டு தலங்கள் போன்றவற்றில் தூய்மை குறித்த நேரடி களஆய்வு (30 சதவீதம்)

• கிராமப்புறங்களில் பல்வேறு தகவல்கள் அறிந்த முக்கிய நபர்கள் மற்றும் பொதுமக்களிடம் தூய்மை குறித்த கருத்துக்களை அறிதல் (35 சதவீதம்)

• தூய்மைக்கான கட்டமைப்பு வசதிகளின் செயல்திறன் முன்னேற்றம், (வீடுகளில் கழிப்பறை வசதிகள், ஒருங்கிணைந்த சமுதாய கழிப்பறைகள் போன்றவை) (35 சதவீதம்)

இந்த ஆய்வுகளில் மாவட்டத்திற்கான மதிப்பெண்கள், கிராமங்கள் பெறும் மதிப்பெண்களின் சராசரி ஆகும். அதே போல் மாநிலத்திற்கான மதிப்பெண்கள், மாவட்டங்கள் பெறும் மதிப்பெண்களின் சராசரியாகும்.

மேற்படி அகில இந்திய அளவில் மேற்கொள்ளப்பட்ட இந்த ஆய்வில் கிடைக்கப்பெற்ற ஒட்டுமொத்த மதிப்பெண்களின் அடிப்படையில், தமிழ்நாடு இந்திய அளவில் சிறந்த மாநிலமாக தேர்வு செய்யப்பட்டுள்ளது. இதற்கான விருதினை குஜராத் மாநிலம், அகமதாபாத்தில் நேற்று நடைபெற்ற தூய்மை பாரத விழாவில் பிரதமரால் தமிழக அரசின் சார்பில் நகராட்சி நிர்வாகம் ஊரக வளர்ச்சி மற்றும் சிறப்பு திட்டங்கள் செயலாக்கத் துறை அமைச்சர் எஸ்.பி.வேலுமணியிடம் வழங்கி சிறப்பிக்கப்பட்டுள்ளது.