தற்போதைய செய்திகள்

351 கர்ப்பிணிகளுக்கு சீர்வரிசை பொருட்கள் – அமைச்சர் சேவூர் எஸ்.இராமச்சந்திரன் வழங்கினார்

திருவண்ணாமலை:-

திருவண்ணாமலை மாவட்டம் ஆரணியை அடுத்த கொங்கராம்பட்டு கிராமத்தில் சமுதாய வளைகாப்பு விழா நடைபெற்றது. விழாவுக்கு மாவட்ட ஆட்சித்தலைவர் க.சு.கந்தசாமி தலைமை வகித்தார். விழாவில் இந்து சமய அறநிலையத்துறை அமைச்சர் சேவூர் எஸ்.இராமச்சந்திரன் கலந்து கொண்டு 351 கர்ப்பிணி பெண்களுக்கு வளையல், புடவை, மஞ்சள், குங்குமம், வெற்றிலைப் பாக்கு, பூ, பழம், இனிப்புகள் உள்ளிட்ட சீர்வரிசை பொருட்களை வழங்கி பேசியதாவது:-

திருவண்ணாமலை மாவட்டத்தில் ஒருங்கிணைந்த குழந்தை வளர்ச்சிப் பணிகள் திட்டத்தின் சார்பாக 2127 அங்கன்வாடி மையங்கள் செயல்பட்டு வருகின்றன. இம்மையங்கள் மூலம் கர்ப்பிணிகள், பாலூட்டும் தாய்மார்கள், குழந்தைகள் பயன் அடைந்து வருகிறார்கள்.

திருவண்ணாமலை மாவட்டத்தில் ஒவ்வொரு ஆண்டும் ரூ.6.80 லட்சம் செலவில் கர்ப்பிணி தாய்மார்களுக்கு சமுதாய வளைகாப்பு நடத்தப்பட்டு வருகிறது தாய்- சேய் நலனை மேம்படுத்துவதற்காகவும், “சமுதாய வளைகாப்பு” விழா நடத்தப்படுகிறது. மாவட்டத்தில் கடந்த 2011-ம் ஆண்டு முதல் 13,600 கர்ப்பிணி தாய்மார்களுக்கு ரூ.34 லட்சம் செலவில் வளைகாப்பு நடத்தப்பட்டுள்ளது. தற்போது இந்த ஆண்டு 2720 கர்ப்பிணி தாய்மார்களுக்கு ரூ.6.80 லட்சம் செலவில் சமுதாய வளைகாப்பு நடத்தப்பட்டுகிறது.

மாவட்டத்தில் உள்ள 2127 அங்கன்வாடி மையங்களுக்கு வரும் குழந்தைகளின் சிறப்பு ஊட்டச்சத்து தேவைகளை கருத்தில் கொண்டு அனைத்து வட்டாரங்களிலும் தக்காளி சாதம், பருப்பு சாதம், வேக வைத்த உருளைக்கிழங்கு, அவித்த முட்டை ஆகிய புதிய வகை கலவை சாதம் திங்கள் முதல் ஞாயிறு வரை தொடர்ந்து வழங்கப்பட்டு வருகிறது.

குழந்தைகளின் வளர்ச்சியை கண்காணிப்பதற்காக மூன்று விதமான எடை எடுக்கும் கருவிகள் ரூ97.94 லட்சம் செலவில் வழங்கப்பட்டுள்ளது. அவசர தேவைக்கு பயன்படும் மருந்துகள் அடங்கிய மருந்து பெட்டி ஒரு மையத்திற்கு ரூ.1000 வீதம் மொத்தம் ரூ21.27 லட்சம் செலவிலும், முதலுதவி பெட்டி ஒரு மையத்திற்கு 405.50 வீதம் 8.62 லட்சம் செலவில் வழங்கப்பட்டுள்ளது.

வளர் இளம்பெண்களுக்கு இரும்புச்சத்து மாத்திரைகள் வழங்கப்படுகிறது. ரூ.35.71 லட்சம் மதிப்பில் அங்கன்வாடி மையங்களுக்கு தேவையான பொருட்கள் வழங்கப்பட்டுள்ளது. முன் பருவ கல்வி பயில ரூ.3000 மதிப்பிலான உபகரணங்கள் 63.81 லட்சம் மதிப்பில் வழங்கப்பட்டுள்ளது. அரசு கட்டடங்களில் இயங்கும் 1618 அங்கன்வாடி மையங்களுக்கு மின் வசதி செய்து கொடுக்கப்பட்டுள்ளது. 2127 மையங்களை நவீன மயமாக்குவதற்கு 1.05 கோடி செலவும் ஒதுக்கப்பட்டுள்ளது.837 மையங்களில் வண்ண மையமான சுவர் சித்திரங்கள் வரையப்பட்டுள்ளது.

4266 மெட்ரிக் டன் அளவிலான இணை உணவு ரூ22.81 கோடி செலவில் வழங்கப்பட்டு வருகிறது. இதன் மூலம் 6 மாதம் முதல் 36 மாதம் வரை உள்ள குழைந்தைகளும், 14,783 கர்பிணிகளும் 15,537 பாலூட்டும் தாய்மார்களும் பயன் அடைந்து வருகிறார்கள். 2வயது முதல் 5 வயது வரையுள்ள 54,388 குழந்தைகளுக்கு முட்டையுடன் கூடிய கலவை சாதம் ஆண்டொன்றுக்கு ரூ.8.80கோடி செலவில் வழங்கப்பட்டு வருகிறது. 1 வயது முதல் 2 வயதுடைய குழந்தைகளுக்கு 40 லட்சம் ரூபாய் செலவில் முட்டை வழங்கப்பட்டு வருகிறது. 57,226 வளர் இளம் பெண்களுக்கு இணை உணவு வழங்கப்பட்டு வருகிறது

இவ்வாறு அமைச்சர் சேவூர் எஸ்.இராமச்சந்திரன் பேசினார்.

விழாவில் கோட்டாட்சியர் மைதிலி, மேற்கு ஆரணி ஒன்றிய செயலாளர் பி.ஆர்.ஜி.சேகர், மேற்கு ஆரணி ஒன்றிய செயலாளர் எம்.வேலு, முன்னாள் ஒன்றியக்குழு தலைவர் அ.கோவிந்தராசன், மாவட்ட துணை செயலாளர் டி.கருணாகரன், முன்னாள் ஒன்றிய கவுன்சிலர்கள் ப.திருமால், ரவி, கோபி, கண்ணமங்கலம் நகர செயலாளர் பாண்டியன், கே.டி.குமார், மாவட்ட திட்ட அலுவலர் கந்தன், குழந்தை வளர்ச்சி திட்ட அலுவலர் கண்ணகி, உள்ளிட்டோர் கலந்து கொண்டனர்.