தற்போதைய செய்திகள்

முடசல்ஓடையில் அம்மா உடற்பயிற்சி கூடம் அமைக்க அரசு பரிசீலனை – அமைச்சர் கே.ஏ.செங்கோட்டையன் தகவல்

சென்னை

பரங்கிப்பேட்டை ஒன்றியம் முடசல்ஓடை கிராமத்தில் அம்மா உடற்பயிற்சி கூடம் அமைக்க அரசு பரிசீலனை செய்யும் என்று அமைச்சர் கே.ஏ.செங்கோட்டையன் தெரிவித்தார்.

சட்டப்பேரவையில் நேற்று கேள்வி நேரத்தின்போது சிதம்பரம் தொகுதி சட்டமன்ற உறுப்பினர் கே.ஏ.பாண்டியன் கேள்வி ஒன்றை எழுப்பினார். சிதம்பரம் தொகுதிக்குட்பட்ட பரங்கிப்பேட்டை ஒன்றியம், முடசல்ஓடை கிராமத்தில் அம்மா உடற்பயிற்சி கூடம் அமைக்க அரசு முன் வருமா? என்று கேட்டார்.

இதற்கு பள்ளி கல்வித்துறை அமைச்சர் கே.ஏ. செங்கோட்டையன் பதில் அளிக்கையில், முதலமைச்சர் எடப்பாடி கே.பழனிசாமி அறிவித்த அம்மா இளைஞர் விளையாட்டு திட்டம் தமிழகம் முழுவதும் நிறைவேற்றப்பட்டு வருகிறது. தமிழகத்தில் உள்ள 12,524 ஊராட்சிகள், 528 பேரூராட்சிகளில் இந்தப் பணிகள் மேற்கொள்ளப்பட்டு வருகிறது. இவை ஒரு வாரத்தில் முடிக்கப்பட்டு பயன்பாட்டுக்கு வரும். அதேபோல் உறுப்பினர் கோரிக்கையான அம்மா உடற்பயிற்சி கூடம் அமைக்கவும் அரசு கவனத்தில் கொள்ளும். மேலும் உறுப்பினர் கூறிய கூடுதல் வகுப்பறை கட்டடங்கள், அறிவியல் கூடம் ஆகியவை நபார்டு திட்டத்தின்கீழ் இந்த ஆண்டே நிறைவேற்றி தரப்படும் என்றார்.

இதனைத் தொடர்ந்து பேரவை துணைத்தலைவர் பொள்ளாச்சி வி.ஜெயராமன் பேசுகையில், பொள்ளாச்சி பகுதியில் அதிக அளவில் விளையாட்டு வீரர்கள் உருவாகி வருகிறார்கள். வாலிபாலில் சிறந்த வீரர்கள் உள்ளனர். உள்ளாட்சி விளையாட்டு வீரர்கள் தோன்றும் இடம் என்பதால், அங்கு உள்விளையாட்டு அரங்கம், திறந்தவெளி விளையாட்டு அரங்கம், நீச்சல் குளம் போன்றவற்றை அரசு அமைத்து தர நடவடிக்கை எடுக்க வேண்டும் என்று கோரிக்கைவிடுத்தார்.

இதற்கு அமைச்சர் கே.ஏ. செங்கோட்டையன் பதிலளிக்கையில், மாவட்ட அளவில் இத்தகைய வசதிகள் உள்ளன. எங்கெங்கு விளையாட்டு திடல் தேவையோ அங்கெல்லாம் அமைக்க அரசு நடவடிக்கை மேற்கொள்கிறது. பெரிய நிறுவனங்களுடன் இணைந்து உறுப்பினர் கோரியவற்றை செய்து தர அரசு நடவடிக்கை மேற்கொள்ளும். அதற்குரிய நிதியை ஒதுக்கீடு செய்யும் என்று தெரிவித்தார்.