தற்போதைய செய்திகள்

வெளிமாநில மாணவர்களுக்கு மருத்துவ சீட் கிடையாது – சட்டப்பேரவையில், அமைச்சர் டாக்டர் சி.விஜயபாஸ்கர் திட்டவட்டம்…

சென்னை:-

வெளிமாநில மாணவர்களுக்கு மருத்துவ வீட் கிடையாது என்று சட்டப்பேரவையில் அமைச்சர் டாக்டர் சி.விஜயபாஸ்கர் திட்டவட்டமாக தெரிவித்தார்.

தமிழக சட்டப்பேரவையில்  திமுக சட்டமன்ற உறுப்பினர் பழனிவேல் தியாகராஜன், சமீபத்தில் வெளியிடப்பட்ட மருத்துவ தரவரிசை பட்டியலில் இரட்டை இருப்பிட சான்றிதழ் பெற்ற வெளி மாநில மாணவர்கள் பெயர் இடம் பெற்றுள்ளதாக தகவல் வந்துள்ளது. அவர்களுக்கு மருத்துவ இடங்கள் ஒதுக்ககூடாது என பேசினார்.

அதற்கு பதிலளித்த சுகாதாரத்துறை அமைச்சர் டாக்டர் சி.விஜயபாஸ்கர், மருத்துவப் படிப்புகளுக்கு விண்ணப்பிக்கும் மாணவர்களின் விண்ணப்பங்களை”கண்கொத்தி பாம்பை” போல கூர்ந்து கவனித்து வருகிறோம். இதுவரை பெறப்பட்ட 39 ஆயிரத்து 13 விண்ணப்பங்களில் தீவிர கண்காணிப்புகளுக்கு பிறகு 3516 விண்ணப்பங்கள் நிராகரிக்கப்பட்டுள்ளது. தமிழகத்துக்காக போராடி பெற்ற மருத்துவ இடங்களில் வெளி மாநில மாணவர்களுக்கு வாய்ப்பு வழங்கப்படாது என்பதில் அரசு உறுதியாக இருக்கிறது.

இதற்காக தனியாக குழு அமைத்து விண்ணப்பிக்கும் மாணவர்களின்பிறப்பு சான்றிதழ், மாணவரின் பெற்றோர்களின் பிறப்பு சான்றிதழ், மாணவரின் பெற்றோர் தமிழ்நாட்டில் கல்வி பயின்றதற்கான சான்றிதழ், மாணவர் மற்றும் பெற்றோர்களின் சாதி சான்றிதழ், நியாயவிலை அட்டை உள்ளிட்ட விவரங்கள் பெறப்பட்டு சரிபார்க்கப்பட்டு வருகிறது. அதனோடு சேர்த்து மாணவர் மற்றும் பெற்றோரிடத்தில் பிரமாண பத்திரம் ஒன்றில் கையெழுத்து பெறப்படுகிறது.

அந்த பிரமாண பத்திரத்தில், மாணவரின் விண்ணப்பத்தில் தெரிவிக்கப்பட்டுள்ள தகவல்கள் மற்றும் சமர்பிக்கப்பட்டுள்ள சான்றிதழ்கள் அனைத்தும் உண்மையானவை. அதில் ஏதாவது தவறு இருந்தால் மாணவரை தகுதி நீக்கம் செய்யலாம், கிரிமினல் வழக்கு தொடுக்கலாம் அதற்கு சம்மதிக்கிறேன் என உறுதி கூறும் வாசகம் இந்த வருடம் இடம்பெற்றுள்ளது. எனவே எக்காரணம் கொண்டும் நமது மருத்துவ இடங்களில் வெளி மாநில மாணவர்களுக்கு இடம் கிடையாது.

இவ்வாறு அமைச்சர் டாக்டர் சி.விஜயபாஸ்கர் தெரிவித்தார்.