தற்போதைய செய்திகள்

தென்னையை தாக்கும் வெள்ளை ஈக்களை கட்டுப்படுத்த ரூ.5.90 கோடி நிதி ஒதுக்கீடு – பேரவையில் அமைச்சர் இரா.துரைக்கண்ணு தகவல்

சென்னை

தென்னையை தாக்கும் ெவள்ளை ஈக்களை கட்டுப்படுத்த ரூ.5.90 கோடி நிதி ஒதுக்கிடு செய்யப்பட்டு உள்ளதாக அமைச்சர் இரா.துரைக்கண்ணு தெரிவித்தார்.

சட்டப்பேரவையில்  பேரவை துணைத்தலைவர் பொள்ளாச்சி வி.ஜெயராமன் சிறப்பு கவன ஈர்ப்பு தீர்மானத்தை கொண்டு வந்து பேசியதாவது:-

தமிழகத்தில் நெல் விவசாயத்திற்கு அடுத்தபடியாக பெரும்பான்மையாக செய்யப்படுகின்ற தென்னை விவசாயத்திற்கு ஏற்பட்டிருக்கின்ற ஒரு சிக்கலை அரசின் கவனத்திற்கு இந்த அவையின் மூலமாகத் தெரியப்படுத்த விரும்புகிறேன்.
கோவை மாவட்டம் மற்றும் திருப்பூர் மாவட்டங்களில் தென்னை சாகுபடி அதிகமாக இருந்து வருகிறது. தமிழகம் முழுவதும் சுமார் 9 லட்சம் ஏக்கர் பரப்பளவில் தென்னை விவசாயம் செய்யப்படுகிறது. இந்தத் தென்னை மரத்தில், கேரள மாநிலத்திலிருந்து வந்த ‘வெள்ளை ஈ’ படிப்படியாக பரவி, முழுவதுமாக தென்னை மரத்தின் ஓலையின் பின்பகுதியில் இருக்கின்ற பச்சையத்தை சாப்பிட்டு, தென்னை மரம் முழுவதுமாக மூன்றில் ஒரு பங்கு காய்ப்புத் திறனை இழந்து விட்டது.

பொள்ளாச்சியிலிருந்து பரவி உடுமலை, பழனி, திண்டுக்கல், தேனி, பெரியகுளம் என்று ஒவ்வொரு ஊராக பரவி, இப்போது தமிழகமெங்கும் ஏகமாக இந்த வெள்ளை ஈயின் தாக்கம் ஏற்பட்டிருக்கிறது. விரைவில், சேலம், எடப்பாடி வரை தமிழகம் முழுவதும் பரவுவதற்கான வாய்ப்பும் உள்ளது.

தென்னையை மட்டும் தாக்கி வந்த வெள்ளை ஈ, இப்போது பப்பாளி, மாதுளை, கொய்யா, தக்காளி, வெண்டை, கத்திரி போன்ற அனைத்து காய்கறிப் பயிர்கள், பழப் பயிர்களையும் தாக்கத் தொடங்கியிருக்கிறது. எனவே, தென்னை விவசாயம் மட்டுமல்லாமல் மற்ற விவசாயப் பயிர்களையும் தாக்கியிருக்கின்ற இந்த வெள்ளை ஈயை உடனடியாக ஒழிப்பதற்கு, எப்படி கொரோனா வைரஸை ஒழிப்பதற்கு நம்முடைய அம்மா அவர்களின் அரசு தீவிர கவனம் செலுத்துகிறதோ அதேபோல இந்த வெள்ளை ஈயின் தாக்கம் ஓராண்டுக்கு முன்பு இருந்ததைவிட இப்போது 2 மடங்கு, 4 மடங்கு என்று உயர்ந்துவிட்டது.

இந்த வெள்ளை ஈயின் தாக்கத்தை முழுமையாக அழிப்பதற்கு, எப்படி மக்காச் சோளத்திலே அமெரிக்கன் படைப்புழு தாக்கியபோது, முதலமைச்சர், விவசாயிகளின் காவலர் 48 கோடி ரூபாய் நிதியை ஒதுக்கி, ஒரே சமயத்தில் தமிழகம் முழுவதும் இருக்கின்ற மக்காச்சோளப் பயிர்களுக்கு மருந்துகள் அடிக்கப்பட்டு, அந்த மக்காச்சோளப் பயிர்கள் மிக நல்ல மகசூலை எந்த ஆண்டும் இல்லாத வகையில், இந்த ஆண்டு முழுமையாக, மிகச் சிறப்பான மகசூலை எட்டியுள்ளது.

அதைப்போல, ஒரே சமயத்தில் சமச்சீராக அனைத்து பகுதிகளிலும் தென்னையில் பரவியிருக்கின்ற அந்த வெள்ளை ஈ மேற்கொண்டு பரவாமலும், வெள்ளை ஈயை ஒழிக்கத்தக்க வகையிலும், அம்மாவின் அரசு சிறப்பான கவனம் செலுத்தி, போதுமான நிதியை ஒதுக்கி, வெள்ளை ஈயை முற்றிலுமாக ஒழித்து, விவசாயத்தினை, தென்னை விவசாயத்தினை, பல பயிர் விவசாயத்தினை, காய்கறி விவசாயத்தினைக் காப்பாற்ற வேண்டுமென்று கேட்டுக் கொள்கிறேன்.

இதற்கு வேளாண்துறை அமைச்சர் இரா.துரைக்கண்ணு பதிலளித்து பேசியதாவது:-

தற்போது கோயம்புத்தூர், திருப்பூர், கன்னியாகுமரி, ஈரோடு, சேலம், நாமக்கல் மற்றும் கடலூர் உள்ளிட்ட 19 மாவட்டங்களில் சாகுபடி செய்யப்பட்டுள்ள தென்னை மரங்களில், Rugose Spiraling White fly-சுருள் வெள்ளை ஈ பூச்சியின் தாக்குதல் காணப்படுகிறது. தமிழ்நாட்டில், மொத்தமுள்ள 4 லட்சத்து 39 ஆயிரத்து 746 ஹெக்டேர் தென்னை சாகுபடி பரப்பில், 25,000 ஹெக்டேரில் சுருள் வெள்ளை ஈ தாகுதல் அதிகமாகக் காணப்படுகிறது. குறிப்பாக, கோயம்புத்தூர் மாவட்டத்தில் உள்ள பொள்ளாச்சி வடக்கு, பொள்ளாச்சி தெற்கு, ஆனைமலை ஆகிய வட்டாரங்களில் இப்பூச்சியின் தாக்குதல் அதிகமாகக் காணப்படுகிறது.

தற்போது, அதிகரித்து வரும் வெப்பத்தின் காரணமாக சுருள் வெள்ளை ஈ-யின் தாக்குதல் திடீரெனப் பெருகியுள்ளது. தென்னை மட்டுமல்லாது, அருகிலுள்ள பாக்கு மற்றும் காய்கறி பயிர்களிலும் இந்த ஈயின் தாக்குதல் காணப்படுகிறது. இந்த ஈயின் தாக்குதல் பற்றிய விவரம் தெரிந்தவுடனேயே, எப்படி போர்க்கால அடிப்படையில் அமெரிக்கன் படைப் புழுவை அழித்து, இரு மடங்கு உற்பத்தி, மும்மடங்கு இலாபம் என்கிற அடிப்படையில் இன்றைக்கு மக்காச்சோளம் உற்பத்தியில் விவசாயிகள் அதிக இலாபத்தைக் கண்டிருக்கின்றார்கள். அந்த அடிப்படையில், முதலமைச்சர் போர்க்கால அடிப்படையில் நடவடிக்கை மேற்கொண்டு, பயிர் பாதுகாப்பு நடவடிக்கைகளை மேற்கொள்ளுமாறு துறை அலுவலர்களுக்கு முதலமைச்சர் உத்தரவிட்டிருக்கிறார்.

பயிர் பாதுகாப்பு நடவடிக்கைகள் குறித்த விழிப்புணர்வுகள், எடுக்கப்பட்ட நடவடிக்கைகளுடன் சுருள் வெள்ளை ஈயினால் பாதிக்கப்பட்ட தென்னை, பாக்கு மற்றும் காய்கறிகளை சாகுபடி செய்துள்ள விவசாயிகள் அனைவரும் பரிந்துரைக்கப்பட்ட பயிர் பாதுகாப்பு நடவடிக்கையை பின்பற்ற வேண்டுமென்பதற்காக, முதலமைச்சரின் ஆணையைப்பெற்று, சுருள் வெள்ளை ஈயின் தாக்குதலை கட்டுப்படுத்திட, 5 கோடியே 90 லட்சம் ரூபாய் அளவுக்கு நிதி ஒதுக்கீடு செய்ய நடவடிக்கை மேற்கொள்ளப்பட்டு வருகிறது.

இதன்படி, தண்ணீரால் பாதிக்கப்பட்ட தென்னை மற்றும் பாக்கு மரங்களின் இலைகளின் அடிப்பகுதிகளில் வேகமாகப் படுமாறு தெளிப்பதற்கு நிதியுதவியாக ஹெக்டேருக்கு ரூ.1,000-ம் பின்னேற்பு மானியமாகவும், மஞ்சள் நிற ஒட்டும் பொறி, கண்ணாடி இறக்கை பூச்சிகளின் முட்டைகள் ஆகியவற்றை வழங்கிட ரூ.1,100-ம், ஆக மொத்தம் ஹெக்டேருக்கு ரூ.2,100- வீதமும், பாதிக்கப்பட்டுள்ள காய்கறி பயிர்களுக்கு மஞ்சள் நிற ஒட்டும் பொறி, கண்ணாடி இறக்கை பூச்சிகளின் முட்டைகள் ஆகியவற்றை வழங்கிட ஹெக்டேருக்கு ரூ.1,900-ம் நிதி ஒதுக்கீடு செய்யப்பட்டு, திட்டம் மேற்கொள்ளப்படும்.எனவே, மக்காச்சோளத்தில் படைப்புழு எப்படிக் கட்டுப்படுத்தப்பட்டதோ அதேபோன்று தென்னை, பாக்கு மற்றும் காய்கறி பயிர்களில் சுருள் வெள்ளை ஈயின் தாக்குதலைக் கட்டுப்படுத்த நடவடிக்கை மேற்கொள்ளப்படும்்.