திருநெல்வேலி

எதிர்க்கட்சிகள் சதியை முறியடித்து கழகத்தை வெற்றிபெற செய்வோம் – வி.வி.ராஜன்செல்லப்பா எம்.எல்.ஏ. சபதம்

திருநெல்வேலி:-

எதிர்க்கட்சிகளின் சதியை முறியடித்து கழக வேட்பாளரை வெற்றி பெற செய்வோம் என்று மதுரை புறநகர் கிழக்கு மாவட்ட கழக செயலாளர் வி.வி.ராஜன் செல்லப்பா எம்.எல்.ஏ. கூறினார்.

நாங்குநேரி சட்டமன்ற தொகுதி இடைத்தேர்தலில் போட்டியிடும் கழக வேட்பாளர் ரெட்டியார்பட்டி வெ.நாராயணனை ஆதரித்து அமைச்சர்கள் மற்றும் கழக நிர்வாகிகள் தீவிர தேர்தல் பிரச்சாரத்தில் ஈடுபட்டுள்ளனர். இந்நிலையில் சீவலப்பேரி பகுதியில் பூத் கமிட்டி நிர்வாகிகள் ஆலோசனை கூட்டம் நடைபெற்றது. இக்கூட்டத்தில் மதுரை புறநகர் கிழக்கு மாவட்ட கழகச் செயலாளர் வி.வி.ராஜன் செல்லப்பா கலந்து கொண்டு ஆலோசனை வழங்கி பேசியதாவது:-

விக்கிரவாண்டி, நாங்குநேரி ஆகிய இரண்டு தொகுதி இடைத்தேர்தல் வருகின்ற 21-ந்தேதி நடைபெறுகிறது.நாங்குநேரி சட்டமன்ற தொகுதி கழக வேட்பாளர் ரெட்டியார்பட்டி வெ.நாராயணன் இமாலய வெற்றி பெறும் வண்ணம் பல்வேறு தேர்தல் பணிகளை நாம் மேற்கொள்ள வேண்டும். வாக்காளர் பட்டியலில் எதிர்க்கட்சிகள் பல்வேறு குளறுபடி செய்வார்கள். அதையெல்லாம் நீங்கள் விழிப்புடன் இருந்து கவனிக்க வேண்டும். இந்தியாவில் எந்த மாநிலத்திலும் இல்லாத வகையில் முதலமைச்சர் எடப்பாடி கே.பழனிசாமி பல்வேறு சாதனைகளை படைத்து வருகிறார். அவருக்கு துணை முதலமைச்சர் உறுதுணையாக இருக்கிறார்.

பூத் கமிட்டி நிர்வாகிகள் ஒவ்வொருவரும் காலையிலும், மாலையிலும் வீடு வீடாக சென்று கழக அரசின் சாதனைகளை மக்களிடம் எடுத்துக் கூறி இமாலய வெற்றியை தேடி தர தீவிர களப்பணி ஆற்ற வேண்டும். எதிர்க்கட்சிகளின் சதியை முறியடித்து கழகத்தை வெற்றி பெற செய்வோம்.இடைத்தேர்தல் வெற்றி என்பது வருகின்ற உள்ளாட்சித் தேர்தலுக்கான வெற்றியின் முதல் படியாக இருக்கும்.

இவ்வாறு வி.வி.ராஜன் செல்லப்பா எம்.எல்.ஏ. பேசினார்.

இக்கூட்டத்தில் மேலூர் தொகுதி சட்டமன்ற உறுப்பினர் பெரியபுள்ளான் என்ற செல்வம், முன்னாள் சட்டமன்ற உறுப்பினர் கே.தமிழரசன், மாவட்ட இளைஞரணி செயலாளர் வக்கீல் ரமேஷ், மாவட்ட கழக நிர்வாகிகள் எஸ்.எஸ்.ராஜேந்திரன், அம்பலம் ஒன்றிய கழக செயலாளர் நிலையூர் முருகன், மேலூர் நகர செயலாளர் பாஸ்கரன், மாவட்ட எம்.ஜி.ஆர். மன்ற செயலாளர் ஓம்.கே.சந்திரன் உள்பட பலர் கலந்து கொண்டனர்.