தற்போதைய செய்திகள்

தெற்கு வாழ்கிறது- வடக்கு வீழ்கிறது என்றிருப்பார் அண்ணா – பேரவையில் அமைச்சர் டி.ஜெயக்குமார் பேச்சு

சென்னை

பேரறிஞர் அண்ணா தற்போது வாழ்ந்திருந்தால் தெற்கு வாழ்கிறது – வடக்கு வீழ்கிறது என்று தான் கூறி இருப்பாரென மீன்வளத்துறை அமைச்சர் டி.ஜெயக்குமார் பேரவையில் தெரிவித்தார்.

சட்டப்பேரவையில் நேற்று மீன்வளத்துறை, கால்நடை பராமரிப்புத் துறை, பணியாளர் மற்றும் நிர்வாக சீர்த்திருத்தத் துறை ஆகிய துறைகளின் மீதான மானியக் கோரிக்கை விவாதம் நடைபெற்றது. இந்த விவாதத்தின் மீது திருச்செந்தூர் சட்டப்பேரவைத் தொகுதி திமுக உறுப்பினர் அனிதா ராதாகிருஷ்ணன், தூத்துக்குடி மாவட்டம் வழியாக நெடுஞ்சாலை செல்கிறது. ஆனால் இங்கு எவ்வித தொழிற்சாலையும், தொழில் வளமும் இல்லை. அறிஞர் அண்ணா சொன்னது போல், வடக்கு வாழ்கிறது – தெற்கு தேய்கிறது என்ற நிலை தான் நிலவுகிறது. என்று பேசினார்.

இதற்கு அமைச்சர் டி.ஜெயக்குமார், தமிழ்நாடு முதலமைச்சர் சட்டம் ஒழுங்கு, அடிப்படை உள்கட்டமைப்பு, வளர்ச்சி ஆகியவற்றை இரு கண்களாக கொண்டு செயல்படுகிறார். தமிழ்நாடு அமைதிப் பூங்காவாக திகழ்கிறது. உலகளாவிய தொழில் முனைவோர்கள் தமிழ்நாட்டின் சூழலைக் கண்டு தொழில் மேற்கொள்ள வருகின்றனர்.

தொழிலில் சிறந்த மாநிலமாகவும், சட்டம்- ஒழுங்கு சரியான மாநிலமாகவும் உள்ளது. மற்ற மாநிலங்களை விட தமிழ்நாடு வேகமாக முன்னேறியுள்ளது. ஆகவே பேரறிஞர் அண்ணா தற்போது உயிருடன் இருந்தால் தெற்கு வாழ்கிறது – வடக்கு வீழ்கிறது என்று தான் கூறி இருப்பார் என்று பதிலளித்தார்.