தற்போதைய செய்திகள்

ஸ்மார்ட் சிட்டி சிட்டித்தின் கீழ் மதுரையில் ரூ.1000 கோடிக்கு வளர்ச்சி திட்டப் பணிகள் – அமைச்சர் செல்லூர் கே.ராஜூ தகவல்…

மதுரை:-

ஸ்மார்ட் சிட்டி திட்டத்தின் கீழ் மதுரையில் ரூ.1000 கோடியில் வளர்ச்சி திட்டப் பணிகள் நடைபெற இருப்பதாக அமைச்சர் செல்லூர் கே.ராஜூ தெரிவித்தார்.

மதுரையில் பல்வேறு நவீன அம்சத்துடன் பல்வேறு திட்டங்கள் செயல்படுத்தப்பட்டு வருகின்றன. அதனையொட்டி பொதுமக்களின் பொழுதுபோக்கிற்காக ரூ.70 லட்சம் மதிப்பில் இசையுடன் கூடிய ஒளிக்கதிர் நீரூற்று நிகழ்ச்சி துவக்க விழா நடைபெற்றது. இந்நிகழ்ச்சிக்கு மதுரை வடக்குத்தொகுதி சட்டமன்ற உறுப்பினர் வி.வி.ராஜன்செல்லப்பா தலைமை தாங்கினார். மாநகராட்சி ஆணையாளர் விசாகன் முன்னிலை வகித்தார். இதில் கூட்டுறவுத்துறை அமைச்சர் செல்லூர் கே.ராஜூ கலந்து கொண்டு நீருற்றை துவக்கி வைத்தார்.

இந்நிகழ்ச்சியில் நகரப்பொறியாளர் அரசு, உதவி நகர்நல அலுவலர் (பொ) வினோத்ராஜா, உதவி ஆணையாளர் பிரேம்குமார், செயற்பொறியாளர் ராஜேந்திரன், மக்கள் தொடர்பு அலுவலர் சித்திரவேல், உதவிப்பொறியாளர் சோனை, சுகாதார அலுவலர் ராஜ்கண்ணன் மாவட்ட கழக துணைச்செயலாளர் சி.தங்கம், மாவட்ட கழக பொருளாளர் ஜெ.ராஜா, புறநகர் மாவட்ட இளைஞரணி செயலாளர் வக்கீல் ரமேஷ், மாநகர் மாவட்ட இளைஞரணி செயலாளர் சோலைராஜா, பகுதி கழக செயலாளர்கள் கே.ஜெயவேல், தளபதிமாரியப்பன், கருப்பசாமி, திருப்பரங்குன்றம் ஒன்றிய கழக செயலாளர் நிலையூர் முருகன், அனைத்துலக எம்.ஜி.ஆர்.மன்ற துணைச்செயலாளர் எம்.எஸ்.பாண்டியன், பரவை பேரூர் கழக செயலாளர் சி.ராஜா, முன்னாள் துணைமேயர் கு.திரவியம், மாவட்ட பாசறை செயலாளர் அரவிந்தன், மாவட்ட தகவல் தொழில் நுட்பபிரிவு செயலாளர் மாணிக்கம், மாவட்ட வர்த்தக பிரிவு செயலாளர் கிருஷ்ணன் உட்பட பலர் கலந்து கொண்டனர்.

இந்நிகழ்ச்சியில் அமைச்சர் செல்லூர் கே.ராஜூ பேசியதாவது:-

மதுரை மாவட்டத்திற்கு பல்வேறு திட்டங்களை புரட்சித்தலைவி அம்மா காலம் தொட்டு தற்போது இருக்கும் முதலமைச்சர் வரை தொடர்ந்து வழங்கி கொண்டு வருகிறார்கள். 5ம் உலகத்தமிழ் மாநாட்டை மதுரையில் தான் புரட்சித்தலைவர் நடத்தி மதுரைக்கு புகழ் சேர்த்தார். எந்த ஒரு முடிவை எடுக்க வேண்டும் என்றாலும் மதுரையில் தான் புரட்சித்தலைவரும், புரட்சித்தலைவி அம்மாவும் எடுப்பார்கள்.

முதன்முதலில் மதுரைக்கு குடிநீர் பஞ்சத்தை தீர்த்து வைத்தவர் புரட்சித்தலைவர். அதனையொட்டி புரட்சித்தலைவி அம்மாவும் பல்வேறு திட்டபணிகளுக்கு கிள்ளி கொடுத்தால் போதாது என்று அள்ளி வழங்கினார். தற்போது இருக்கும் முதலமைச்சரும் ரூ.1200 கோடி மதிப்பில் லோயர்கேம்பிலிருந்து குழாய் மூலம் மதுரைக்கு குடிநீர் திட்டத்தை அறிவித்துள்ளார்.

இதன் மூலம் 60 ஆண்டுகளுக்கு மதுரைக்கு குடிநீர் பஞ்சமே இருக்காது. இதே 5 முறை ஆண்ட திமுக மதுரை மாவட்டத்திற்கு எந்த திட்டமும் செய்யவில்லை. மாறாக இங்கு இருக்கும் மதுரை மாநகராட்சியின் நிதியினை சீரழித்தார்கள். ஆனால் இன்றைக்கு முதலமைச்சர் ஸ்மார்ட்சிட்டி மூலம் ரூ.1000 கோடி அளவில் பல்வேறு திட்டபணிகளை மதுரை மாநகராட்சிக்கு வழங்கியுள்ளார்.

தற்போது மதுரை வடக்குத்தொகுதியில் உள்ள அறிஞர் அண்ணா மாளிகை வளாகத்தில் உள்ள சுற்றுச்சூழல் பூங்காவில் 14.90 மீட்டர் நீளமும் 9.60 அகலமும் உடைய சுமார் 300 நபர்கள் அமரக்கூடிய இருக்கைகள் கொண்ட ரூ.70 லட்சம் மதிப்பீட்டில் 100 சதவீதம் தனியார் பங்களிப்புடன் 10 ஆண்டுகளுக்கு பங்களிப்பு முறையில் அமைக்கப்பட்டுள்ளது. விருப்ப வெளிப்பாடு முறையில் அடிப்படையில் தனியார் நிறுவனம் தேர்வு செய்யப்பட்டு இந்த இசை நீருற்றில் கிடைக்கும் மொத்த வருவாயில் 10 சதவீதம் மாநகராட்சிக்கு செலுத்த வேண்டும்.

இசை நீருற்றில் காண வருபவர்களுக்கு கட்டணமாக பெரியவர்களுக்கு ரூ.50ம், சிறியவர்களுக்கு ரூ.30ம் செலுத்த வேண்டும். நாள் ஒன்றுக்கு இரண்டு காட்சிகள் 30 நிமிடங்களுக்கு குறையாமல் இசை நீருற்று, நீர் திரை, லேசர் நிகழ்ச்சிகள் ஆகியவை காண்பிக்கப்படும். வருகின்ற (புதன்கிழமை) 22.08.2019 முதல் தினந்தோறும் இரவு 7 மணி முதல் 7.30 மணி வரையும் மற்றும் 7.40 மணி முதல் 8.10 மணி வரை என இரு காட்சிகள் நடைபெறும்.

இவ்வாறு அமைச்சர் செல்லூர் கே.ராஜூ பேசினார்.

நிகழ்ச்சியில் வி.வி.ராஜன்செல்லப்பா எம்.எல்.ஏ. பேசியதாவது:-

இந்த 8 ஆண்டுகளில் மதுரை மாநகராட்சிக்கு தொடர்ந்து வளர்ச்சி திட்டங்களை அம்மாவின் அரசு வழங்கி வருகிறது. நான் மதுரை மாநகராட்சி மேயராக இருந்த போது தி.மு.க.வால் சீரழிக்கப்பட்ட மதுரை மாநகராட்சியை சீர் செய்ய சிறப்பு நிதியாக ரூ.250 அம்மா கோடியை வழங்கினார்கள். அது மட்டுமல்லாது தொடர்ந்து பல்வேறு திட்டப்பணிகளுக்கு தாய் உள்ளத்தோடு நிதியினை வாரி வழங்கினார்.

இந்த வடக்குத்தொகுதிக்கு உட்பட்ட மாட்டுத்தாவணி பேருந்து நிலையத்தை புரட்சித்தலைவர் பேருந்து நிலையமாக மாற்றிக் கொடுத்தார் முதலமைச்சர். அது மட்டுமல்லாது ஒருங்கிணைந்த மாவட்ட ஆட்சியர் அலுவலகம் கட்டுவதற்கு ரூ.28 கோடியில் பணிகள் நடைபெற்று வருகிறது. நீண்ட நாட்களாக தூர்வாரப்படாமல் இருந்த செல்லூர் கண்மாய் தூர்வாரப்பட்டு இதன் மூலம் 2 லட்சம் மக்களின் குடிநீர் தட்டுப்பாட்டை முதலமைச்சர் போக்கியுள்ளார். மக்களால் நான் மக்களுக்காகவே நான் என்ற அம்மாவின் தாரக மந்திரத்தை முதலமைச்சரும், துணைமுதலமைச்சரும் தினந்தோறும் உச்சரிக்கும் வண்ணம் அன்றாடம் மக்களுக்கான புதுப்புது திட்டங்களை அறிவித்து செயல்படுத்தி வருகின்றனர்.

இவ்வாறு வி.வி.ராஜன்செல்லப்பா எம்.எல்.ஏ பேசினார்.